NEET UG: నీట్ యూజీ-2026 కౌన్సెలింగ్‌కు రంగం సిద్ధం.. త్వరలో షెడ్యూల్ విడుదల చేయనున్న ఎంసీసీ!

నీట్ ఫలితాల తర్వాత తదుపరి కీలక ఘట్టం.. త్వరలో కౌన్సెలింగ్ ప్రారంభం..

నాలుగు దశల్లో నీట్ యూజీ-2026 కౌన్సెలింగ్.. విద్యార్థులకు కీలక సూచనలు..

న్యూఢిల్లీ: దేశవ్యాప్తంగా వైద్య విద్యలో ప్రవేశం కోసం ఎదురుచూస్తున్న లక్షలాది మంది విద్యార్థులకు కీలక అప్‌డేట్ వచ్చింది. నీట్ యూజీ-2026 ఫలితాలు జూలై 16న ప్రకటించిన నేపథ్యంలో, త్వరలోనే మెడికల్ కౌన్సెలింగ్ కమిటీ (MCC) అండర్‌గ్రాడ్యుయేట్ వైద్య కోర్సుల కౌన్సెలింగ్ ప్రక్రియను ప్రారంభించనుంది. ఇందుకు సంబంధించిన పూర్తి షెడ్యూల్‌ను అధికారిక వెబ్‌సైట్ mcc.nic.inలో విడుదల చేయనున్నారు.

గత ఏడాది జూలై 21న మొదటి విడత కౌన్సెలింగ్ ప్రారంభమైన దృష్ట్యా, ఈ ఏడాది కూడా అదే సమయంలో ప్రక్రియ ప్రారంభమయ్యే అవకాశం ఉందని అధికారులు భావిస్తున్నారు. నీట్ ఫలితాలను ప్రకటించిన సందర్భంగా నేషనల్ టెస్టింగ్ ఏజెన్సీ (NTA) కీలక ప్రకటన చేసింది. వైద్య ప్రవేశాలు, కౌన్సెలింగ్ షెడ్యూల్ ఎలాంటి ఆలస్యం లేకుండా కొనసాగేందుకు ఫలితాలను సమయానికి విడుదల చేసినట్లు తెలిపింది.

ఈ ఏడాది దేశంలోని 551 నగరాల్లోని 5,440 పరీక్షా కేంద్రాల్లో, అలాగే విదేశాల్లోని 14 నగరాల్లో నీట్ యూజీ-2026 పరీక్ష నిర్వహించారు. మొత్తం సుమారు 20 లక్షల మంది అభ్యర్థులు పరీక్షకు హాజరయ్యారు. వీరిలో 11.21 లక్షల మంది ఎంబీబీఎస్, బీడీఎస్, ఆయుష్ మరియు ఇతర అనుబంధ వైద్య కోర్సుల్లో ప్రవేశాలకు అర్హత సాధించినట్లు ఎన్‌టీఏ వెల్లడించింది.

ఎంసీసీ విడుదల చేసే షెడ్యూల్‌లో ఆల్ ఇండియా కోటా (AIQ), రాష్ట్ర కోటా, డీమ్డ్ యూనివర్సిటీలు, కేంద్ర విశ్వవిద్యాలయాల సీట్లకు సంబంధించిన తేదీలు ఉంటాయి. గత సంవత్సరాల తరహాలో ఈసారి కూడా కౌన్సెలింగ్‌ను నాలుగు దశల్లో నిర్వహించే అవకాశం ఉంది.

రౌండ్-1
రౌండ్-2
రౌండ్-3 (మాప్-అప్ రౌండ్)
స్ట్రే వెకెన్సీ రౌండ్
ఆన్‌లైన్ నమోదు తప్పనిసరి

కౌన్సెలింగ్‌లో పాల్గొనాలనుకునే అభ్యర్థులు ముందుగా ఆన్‌లైన్‌లో నమోదు చేసుకోవాలి. అనంతరం నిర్దేశిత కౌన్సెలింగ్ ఫీజు చెల్లించి, తమకు ఇష్టమైన కాలేజీలు, కోర్సులను ఎంపిక చేసి వాటిని లాక్ చేయాలి.

ప్రతి దశలో అభ్యర్థి నీట్ ర్యాంక్, కేటగిరీ, రిజర్వేషన్ నిబంధనలు, ఎంపిక చేసిన కాలేజీలు, అందుబాటులో ఉన్న సీట్లు వంటి అంశాల ఆధారంగా సీట్ల కేటాయింపు జరుగుతుంది. సీటు కేటాయించిన తర్వాత సంబంధిత కళాశాలకు వెళ్లి సర్టిఫికెట్ ధృవీకరణ పూర్తి చేసి, అడ్మిషన్ ప్రక్రియను ముగించాల్సి ఉంటుంది.

ఈ ఏడాది నీట్‌లో అర్హత సాధించిన వారిలో 58 శాతానికి పైగా మహిళా అభ్యర్థులే ఉండటం విశేషం. అలాగే అత్యుత్తమ ప్రతిభ కనబరిచిన వారిలో ఎక్కువ మంది 17 నుంచి 19 సంవత్సరాల వయస్సు కలిగిన విద్యార్థులే ఉన్నట్లు ఎన్‌టీఏ తెలిపింది.

నీట్ యూజీ-2026లో 720 మార్కులకు గాను 715 మార్కులు సాధించి పంజాబ్‌కు చెందిన ఆర్యన్ గుప్తా, హర్యానాకు చెందిన పాన్షుల్ బన్సాల్ సంయుక్తంగా తొలి స్థానం సాధించారు.

కౌన్సెలింగ్ షెడ్యూల్ విడుదలయ్యే వరకు అభ్యర్థులు అధికారిక వెబ్‌సైట్‌ను నిరంతరం పరిశీలిస్తూ అవసరమైన పత్రాలను ముందుగానే సిద్ధం చేసుకోవాలని విద్యా నిపుణులు సూచిస్తున్నారు.