New Bypass: ముగింపు దశకు చేరిన బైపాస్, ఏడీబీ రోడ్డు పనులు.. గంట ప్రయాణం కేవలం 20 నిమిషాల్లోనే!

• కూటమి సర్కార్ స్పీడ్ డెసిషన్!.. ఆగిపోయిన రోడ్డు పనుల్లో అద్భుత ప్రగతి!

• అచ్చంపేట ఫ్లైఓవర్‌తో పోర్టు వాహనాలకు బిగ్ రిలీఫ్!.. నగరంలో తగ్గనున్న రద్దీ!

• 95 శాతం పనులు పూర్తి!.. త్వరలోనే ప్రజలకు అందుబాటులోకి కాకినాడ నయా బైపాస్!

New Bypass: కాకినాడ నగరంలో రోజురోజుకూ పెరిగిపోతున్న హెవీ ట్రాఫిక్ సమస్యలకు చెక్ పెట్టేలా చేపట్టిన కీలక రహదారుల నిర్మాణ పనులు వేగంగా ముగింపు దశకు చేరుకున్నాయి. గతంలో నిలిచిపోయిన 18 కిలోమీటర్ల కాకినాడ బైపాస్ మరియు ఏడీబీ (ADB) రోడ్డు పనులను కూటమి ప్రభుత్వం ప్రత్యేక దృష్టి సారించి పునరుద్ధరించడంతో, నిర్మాణాలు ఇప్పుడు చివరి విడతకు వచ్చాయి. ఈ రెండు కీలక మార్గాలు పూర్తిస్థాయిలో అందుబాటులోకి వస్తే కాకినాడ నగరవాసులకు సుదీర్ఘకాలంగా ఉన్న రవాణా కష్టాల నుంచి శాశ్వత విముక్తి లభించనుంది.

ముఖ్యంగా కత్తిపూడి నుండి యానాం, అమలాపురం మరియు కాకినాడ పోర్టు వైపు వెళ్లే భారీ రవాణా వాహనాల వల్ల నగర వీధుల్లో నిత్యం తీవ్రమైన ట్రాఫిక్ జాం ఏర్పడేది. ఈ సమస్య పరిష్కారానికి తిమ్మాపురం నుండి చొల్లంగి వరకు 18 కిలోమీటర్ల పొడవునా బైపాస్ రోడ్డు నిర్మాణాన్ని చేపట్టారు. ప్రస్తుతం ఈ బైపాస్ రోడ్డు పనులు దాదాపు 95 శాతం పూర్తయ్యాయి. మాధవపట్నం, చీడిగ, కొవ్వూరు మీదుగా చొల్లంగి వరకు ఇప్పటికే తారు రోడ్డు పనులు పూర్తి కాగా, ఇటీవల మాధవపట్నం దగ్గర రైల్వే క్రాసింగ్ నిర్మాణాన్ని కూడా విజయవంతంగా పూర్తి చేశారు.

ప్రస్తుతం ఈ బైపాస్ మార్గంలో తుది విడత రంగులు వేయడం, లైన్ మార్కింగ్స్ మరియు సూచిక బోర్డులు ఏర్పాటు చేసే పనులు వేగంగా సాగుతున్నాయి. గతంలో నగరంలోంచి ప్రయాణిస్తే గంటకు పైగా పట్టే ప్రయాణ సమయం, ఈ బైపాస్ పూర్తిగా అందుబాటులోకి వస్తే కేవలం 20 నిమిషాలకే తగ్గిపోనుంది. మాధవపట్నం టు చొల్లంగి మార్గంలో ఇప్పటికే పలు వాహనాల రాకపోకలు తాత్కాలికంగా ప్రారంభమవ్వడంతో స్థానిక ప్రజలు మరియు వాహనదారులు సంతోషం వ్యక్తం చేస్తున్నారు.

మరోవైపు రాజానగరం నుండి రాక్ సిరామిక్ కూడలి మీదుగా కాకినాడ పోర్టును అనుసంధానించే ఏడీబీ (ADB) రోడ్డు పనులు కూడా శరవేగంగా ముగింపునకు వచ్చాయి. అచ్చంపేట జంక్షన్ వద్ద ఇటీవల నిర్మాణం పూర్తి చేసుకున్న ఫ్లైఓవర్‌ను ప్రయాణికులకు అందుబాటులోకి తీసుకురావడంతో మెడికవర్ ఆసుపత్రి మార్గంలో పోర్టుకు వెళ్లే భారీ వాహనాల రాకపోకలు నగరంలోకి రాకుండానే సజావుగా సాగుతున్నాయి. ప్రసుతం ఏడీబీ రోడ్డుపై మిగిలి ఉన్న కొన్ని రైల్వే క్రాసింగ్ పనులు కూడా తుది దశకు చేరుకున్నాయి.

ఈ రెండు ప్రధాన రహదారులు పూర్తిస్థాయిలో అందుబాటులోకి వస్తే, కాకినాడ పోర్టుకు వెళ్లే సరుకు రవాణా లారీలు మరియు సుదూర ప్రాంతాలకు వెళ్లే ఆర్టీసీ, ప్రైవేటు బస్సులు నగరంలోకి ప్రవేశించాల్సిన అవసరం ఉండదు. ఇది నగర అంతర్గత రోడ్లపై ఒత్తిడిని తగ్గించడమే కాకుండా, పోర్టు ఆధారిత వ్యాపార రంగానికి వేగవంతమైన కనెక్టివిటీని అందిస్తుంది. మౌలిక వసతుల కల్పనలో కాకినాడ రూపురేఖలను మార్చేలా ఈ రోడ్డు ప్రాజెక్టులు నిలుస్తాయని అధికారులు భావిస్తున్నారు.