Minister Savitha: బీసీల అభ్యున్నతే ప్రభుత్వ లక్ష్యం.. రూ.1.37 లక్షల కోట్ల కేటాయింపుతో చరిత్ర సృష్టించాం.. మంత్రి సవిత కీలక వ్యాఖ్యలు!

మూడు బడ్జెట్లలో బీసీల సంక్షేమానికి రూ.1.37 లక్షల కోట్ల కేటాయింపు..

బీసీ విద్య, గురుకులాలు, హాస్టళ్ల అభివృద్ధికి భారీ ప్రాధాన్యం..

మంగళగిరి: బీసీల సంక్షేమం, విద్య, ఉపాధి, రాజకీయ సాధికారతకు కూటమి ప్రభుత్వం అత్యంత ప్రాధాన్యం ఇస్తోందని రాష్ట్ర బీసీ సంక్షేమ శాఖ మంత్రి సవిత తెలిపారు. మంగళగిరిలోని తెలుగుదేశం పార్టీ కేంద్ర కార్యాలయంలో నిర్వహించిన మీడియా సమావేశంలో ఆమె మాట్లాడుతూ.. ముఖ్యమంత్రి చంద్రబాబు నాయుడు నాయకత్వంలో బీసీల అభివృద్ధికి ఎన్నడూ లేనంతగా నిధులు కేటాయిస్తున్నామని చెప్పారు.

మంత్రి వివరాల ప్రకారం.. కూటమి ప్రభుత్వం తొలి మూడు బడ్జెట్లలో బీసీ సంక్షేమానికి రూ.39 వేల కోట్లు, రూ.47 వేల కోట్లు, రూ.51 వేల కోట్లు కేటాయించగా, మొత్తం రూ.1.37 లక్షల కోట్లకు పైగా నిధులు కేటాయించడం రాష్ట్ర చరిత్రలోనే తొలిసారని తెలిపారు. బీసీలే సమాజానికి వెన్నెముక అని భావించే ప్రభుత్వం వారి సంక్షేమాన్ని అత్యున్నత ప్రాధాన్యంగా తీసుకుందని చెప్పారు.

రాష్ట్రంలో ప్రస్తుతం 109 మహాత్మా జ్యోతిరావు పూలే గురుకులాలు పనిచేస్తున్నాయని, అందులో సుమారు 50 వేల మంది విద్యార్థులు చదువుతున్నారని మంత్రి వెల్లడించారు. మరో 10 కొత్త గురుకులాలు ఏర్పాటు చేయనున్నట్లు చెప్పారు. గురుకులాల్లో ఒక్కో విద్యార్థిపై ప్రభుత్వం ఏడాదికి రూ.1.50 లక్షలు, బీసీ హాస్టళ్లలో ఒక్కో విద్యార్థిపై రూ.75 వేల వరకు ఖర్చు చేస్తోందని తెలిపారు.

గురుకులాలకు శాశ్వత భవనాల నిర్మాణం కోసం రూ.500 కోట్లు కేటాయించామని, రాష్ట్రవ్యాప్తంగా 62 భవనాలకు మరమ్మతులు చేపట్టామని చెప్పారు. గత ప్రభుత్వ కాలంలో నిలిచిపోయిన గుడిబండ, గుండుమల, పులివెందుల, రొద్దం గురుకులాల నిర్మాణాలను పూర్తి చేసి త్వరలో ప్రారంభించనున్నట్లు వెల్లడించారు.

ఈ ఏడాది గురుకుల విద్యార్థులు పదో తరగతిలో 96.02 శాతం, ఇంటర్మీడియట్లో 94 శాతం ఉత్తీర్ణత సాధించారని మంత్రి తెలిపారు. ఐఐటీ, నీట్ వంటి పోటీ పరీక్షలకు ప్రత్యేక శిక్షణ అందించేందుకు శ్రీసత్యసాయి జిల్లా టేకులోడు, విశాఖ జిల్లా సింహాచలంలో రెండు ఎక్స్లెన్స్ సెంటర్లు ఏర్పాటు చేస్తున్నట్లు చెప్పారు.

విద్యార్థుల్లో మేధస్సు పెంపొందించేందుకు ఏపీ చెస్ అకాడమీతో ఒప్పందం కుదుర్చుకున్నామని, క్రీడా సామగ్రి, ట్రాక్సూట్లు కూడా అందజేస్తున్నట్లు తెలిపారు.

'తల్లికి వందనం' పథకం కింద కుటుంబంలోని ప్రతి విద్యార్థికి రూ.15 వేల చొప్పున ఆర్థిక సహాయం అందిస్తున్నామని, విద్యామిత్ర కిట్లు పంపిణీ చేస్తున్నామని మంత్రి తెలిపారు. ఆరు బాలికల గురుకులాలను జూనియర్ కళాశాలలుగా అప్గ్రేడ్ చేయడంతో పాటు కొత్త గురుకులాల ద్వారా మరో 5 వేల మంది విద్యార్థులకు విద్యావకాశాలు కల్పించనున్నట్లు చెప్పారు.

రాష్ట్రంలో 998 బీసీ హాస్టళ్లలో 85 వేల మంది విద్యార్థులు ఉంటున్నారని మంత్రి పేర్కొన్నారు. హాస్టళ్లలో మరమ్మతులు, ఆర్వో ప్లాంట్లు, దోమతెరలు, వంట సామగ్రి, సీసీ కెమెరాలు, ఇన్వర్టర్లు, మరుగుదొడ్లు, బట్టలు ఆరేసే స్టాండ్లు ఏర్పాటు చేస్తున్నట్లు చెప్పారు. నాణ్యమైన భోజనం కోసం సన్నబియ్యం సరఫరా చేస్తున్నామని, కొత్తగా వంట కార్మికులు, పారిశుధ్య సిబ్బందిని నియమిస్తున్నామని తెలిపారు.

సివిల్ సర్వీసెస్, డీఎస్సీ, గ్రూప్-1, గ్రూప్-2, బ్యాంకులు, రైల్వే వంటి పోటీ పరీక్షలకు ఉచిత కోచింగ్ అందిస్తున్నామని మంత్రి తెలిపారు. విజయవాడ గొల్లపూడిలో ప్రత్యేక సివిల్స్ కోచింగ్ సెంటర్ ఏర్పాటు చేశామని, శిక్షణతో పాటు ఉచిత వసతి, భోజనం, స్టైఫండ్ కూడా అందిస్తున్నామని చెప్పారు. డీఎస్సీ కోచింగ్ ద్వారా ఇప్పటికే వందలాది మంది ఉద్యోగాలు సాధించారని వెల్లడించారు.

ఆదరణ 3.0 పథకం కోసం రూ.1,000 కోట్లు కేటాయించినట్లు మంత్రి తెలిపారు. స్వర్ణకారులకు ప్రత్యేక కార్పొరేషన్, గీత కార్మికులకు మద్యం దుకాణాల్లో 10 శాతం వాటా, వడ్డెరలకు క్వారీల్లో 33 శాతం రిజర్వేషన్, మత్స్యకారులకు వేట నిషేధ కాలంలో ఆర్థిక సాయాన్ని రూ.20 వేలకు పెంపు వంటి నిర్ణయాలు తీసుకున్నామని చెప్పారు. నాయీ బ్రాహ్మణులు, నేతన్నలకు ఉచిత విద్యుత్, గౌరవ వేతనాల పెంపు కూడా అమలు చేస్తున్నట్లు తెలిపారు.

చట్టసభల్లో బీసీలకు 33 శాతం రిజర్వేషన్ కల్పించాలని అసెంబ్లీలో తీర్మానం చేసి కేంద్రానికి పంపినట్లు మంత్రి తెలిపారు. నామినేటెడ్ పదవుల్లో 34 శాతం రిజర్వేషన్లు అమలు చేస్తున్నామని, స్థానిక సంస్థల్లో కూడా అదే స్థాయిలో రిజర్వేషన్లు కల్పించేందుకు చర్యలు కొనసాగుతున్నాయని చెప్పారు.

బీసీల ఆత్మగౌరవం, సామాజిక రక్షణ కోసం దేశంలోనే తొలిసారిగా 'బీసీ రక్షణ చట్టం-2026' తీసుకురానున్నట్లు మంత్రి వెల్లడించారు. ఈ చట్టం ద్వారా 138 బీసీ కులాలకు రక్షణ కల్పించనున్నామని చెప్పారు. అలాగే ప్రతి జిల్లా కేంద్రంలో బీసీ భవనాలు, రాష్ట్రవ్యాప్తంగా 48 బీసీ కమ్యూనిటీ హాళ్ల నిర్మాణం చేపడుతున్నట్లు తెలిపారు.

గత రెండేళ్లలో బీసీ కార్పొరేషన్ ద్వారా 117.68 లక్షల మంది లబ్ధిదారులకు రూ.32,533 కోట్లకు పైగా ప్రయోజనం అందించామని మంత్రి వివరించారు. ఎన్టీఆర్ భరోసా పెన్షన్లు, దీపం-2, ఫీజు రీయింబర్స్మెంట్, తల్లికి వందనం, ఆటో డ్రైవర్ సేవ, విదేశీ విద్య, మత్స్యకార సేవ వంటి పథకాల ద్వారా భారీగా ఆర్థిక సహాయం అందించినట్లు తెలిపారు.

రాయలసీమను పరిశ్రమలు, ఐటీ, డిఫెన్స్, హార్టికల్చర్, పర్యాటకం, డ్రోన్ రంగాల్లో అగ్రగామిగా తీర్చిదిద్దేందుకు ప్రభుత్వం కృషి చేస్తోందని మంత్రి తెలిపారు. రాయలసీమ స్టీల్ ప్లాంట్, సోలార్ ప్రాజెక్టులు, హైడ్రో ఎనర్జీ, గోల్డ్ మైనింగ్, డ్రోన్ సిటీ, డీఆర్డీవో యుద్ధ విమానాల తయారీ కేంద్రం, రాయల్ ఎన్ఫీల్డ్ ప్లాంట్ వంటి భారీ పెట్టుబడులు ఈ ప్రాంతానికి వస్తున్నాయని చెప్పారు.

సాగునీటి ప్రాజెక్టులు, రహదారులు, పారిశ్రామిక కారిడార్లు, ఐటీ మౌలిక సదుపాయాల అభివృద్ధికి ప్రభుత్వం ప్రాధాన్యం ఇస్తోందని తెలిపారు.

గత వైఎస్సార్సీపీ ప్రభుత్వం బీసీ సబ్ప్లాన్ నిధులను దారి మళ్లించిందని, హాస్టళ్లు, గురుకులాలను నిర్లక్ష్యం చేసిందని మంత్రి ఆరోపించారు. రాయలసీమ అభివృద్ధి ప్రాజెక్టులను నిలిపివేసిందని, కొత్త పరిశ్రమలను తీసుకురాలేదని విమర్శించారు.

బీసీల విద్య, ఉపాధి, స్వయం ఉపాధి, రాజకీయ సాధికారత, సామాజిక రక్షణ కోసం ప్రభుత్వం నిరంతరం పనిచేస్తోందని మంత్రి సవిత స్పష్టం చేశారు. బడ్జెట్ కేటాయింపుల నుంచి విద్యా సంస్థలు, హాస్టళ్లు, సంక్షేమ పథకాలు, ఉచిత కోచింగ్, ఉపాధి అవకాశాలు, బీసీ రక్షణ చట్టం వరకు ప్రతి అంశంలో బీసీలకు ప్రాధాన్యం ఇస్తున్నామని తెలిపారు. ముఖ్యమంత్రి చంద్రబాబు నాయుడు నాయకత్వంలో బీసీల అభ్యున్నతే ప్రభుత్వ ప్రధాన లక్ష్యమని ఆమె పేర్కొన్నారు.