ఆంధ్రప్రదేశ్ నైపుణ్యాభివృద్ధి సంస్థ ఎస్సీ, ఎస్టీ మహిళలకు మంచి అవకాశాన్ని కల్పిస్తోంది. నర్సింగ్ కోర్సులు పూర్తి చేసిన మహిళలకు జర్మనీలో ఉద్యోగావకాశాలు కల్పించేలా ప్రత్యేక కార్యక్రమాన్ని ప్రారంభించింది. ఈ విషయాన్ని విశాఖపట్నం జిల్లా నైపుణ్యాభివృద్ధి సంస్థ అధికారులు అధికారికంగా ప్రకటించారు. ఆసక్తి ఉన్న అర్హులైన మహిళలు ఈ అవకాశాన్ని ఉపయోగించుకోవాలని సూచించారు.
జర్మనీలో వృద్ధుల సంరక్షణకు నర్సుల కొరత ఎక్కువగా ఉండటంతో అక్కడ నర్సింగ్ ఉద్యోగాలకు భారీ డిమాండ్ ఉంది. బీఎస్సీ నర్సింగ్, జీఎన్ఎం, ఏఎన్ఎం వంటి కోర్సులు పూర్తిచేసిన వారికి జర్మనీలో ఆకర్షణీయమైన వేతనాలు, ఉద్యోగ భద్రత లభిస్తున్నాయని అధికారులు తెలిపారు. ఈ పరిస్థితిని దృష్టిలో పెట్టుకుని ఏపీ నైపుణ్యాభివృద్ధి సంస్థ రాష్ట్ర నర్సింగ్ విద్యార్థులకు అంతర్జాతీయ అవకాశాలు కల్పిస్తోంది.
ఈ కార్యక్రమంలో భాగంగా అభ్యర్థులకు ఆరు నెలల పాటు జర్మన్ భాషలో శిక్షణ అందించనున్నారు. జర్మనీలో ఉద్యోగం పొందాలంటే జర్మన్ భాషలో కనీసం బీ1 స్థాయి సర్టిఫికెట్ అవసరం ఉంటుంది. అందుకే ఏ1 నుంచి బీ2 స్థాయి వరకు భాషా శిక్షణను నైపుణ్యాభివృద్ధి సంస్థ అందించనుంది. శిక్షణ పూర్తైన తర్వాత జర్మనీలో ఉద్యోగాలు కల్పిస్తామని అధికారులు స్పష్టం చేశారు.
ఈ అవకాశానికి ఎస్సీ, ఎస్టీ సామాజికవర్గాలకు చెందిన మహిళలు మాత్రమే అర్హులు. వయసు 18 నుంచి 40 సంవత్సరాల మధ్య ఉండాలి. శిక్షణ మరియు వసతి సదుపాయాలను విశాఖపట్నం మధురవాడ పరదేశీపాలెంలోని సాంఘిక సంక్షేమ శాఖ బాలికల హాస్టల్లో ఏర్పాటు చేసినట్లు తెలిపారు. శిక్షణ పూర్తయిన అభ్యర్థులకు జర్మనీలో ఉద్యోగ నియామకం జరుగుతుంది.
జర్మనీలో ఉద్యోగం పొందిన వారికి నెలకు రూ.2.40 లక్షల నుంచి రూ.3.10 లక్షల వరకు జీతం లభిస్తుందని అధికారులు వెల్లడించారు. మరిన్ని వివరాల కోసం 9030108030 ఫోన్ నంబర్ను సంప్రదించాలని సూచించారు. అలాగే నర్సింగ్ ఉద్యోగాల పేరుతో మోసపూరిత ప్రకటనలు చేస్తున్న ప్రైవేట్ సంస్థల పట్ల అప్రమత్తంగా ఉండాలని, ప్రభుత్వ సంస్థల ద్వారానే శిక్షణ తీసుకోవడం భద్రమని అధికారులు హెచ్చరించారు.
