ఆంధ్రప్రదేశ్ రాష్ట్రం సత్యసాయి జిల్లాలో మహిళా శిశు సంక్షేమ శాఖ (ICDS) కీలక నోటిఫికేషన్ను విడుదల చేసింది. జిల్లాలోని వివిధ గ్రామాల్లో ఖాళీగా ఉన్న అంగన్వాడీ వర్కర్, మినీ అంగన్వాడీ వర్కర్, అంగన్వాడీ హెల్పర్ పోస్టుల భర్తీ కోసం అర్హులైన మహిళా అభ్యర్థుల నుంచి దరఖాస్తులు ఆహ్వానిస్తోంది. ఈ నోటిఫికేషన్ ద్వారా మొత్తం 69 పోస్టులను భర్తీ చేయనున్నట్లు అధికారులు వెల్లడించారు. ఆసక్తి కలిగిన అర్హులైన అభ్యర్థులు డిసెంబర్ 30, 2025లోపు ఆఫ్లైన్ విధానంలో దరఖాస్తు చేసుకోవాల్సి ఉంటుంది.
ఈ అంగన్వాడీ పోస్టులకు దరఖాస్తు చేసుకునే అభ్యర్థులు పోస్టును బట్టి కనీసం పదో తరగతి ఉత్తీర్ణత పొంది ఉండాలి. ముఖ్యంగా వివాహిత మహిళా అభ్యర్థులు మాత్రమే అర్హులు. అలాగే స్థానికులైన ఎస్సీ, ఎస్టీ అభ్యర్థులు మాత్రమే దరఖాస్తు చేసుకోవాల్సి ఉంటుంది. వయోపరిమితి విషయానికి వస్తే, జూలై 1, 2025 నాటికి 21 ఏళ్ల నుంచి 35 ఏళ్లలోపు ఉండాలి. ఈ అర్హతలు పూర్తిగా కలిగిన అభ్యర్థులు మాత్రమే దరఖాస్తు చేయాలని ICDS అధికారులు స్పష్టం చేశారు.
అభ్యర్థులు దరఖాస్తుతో పాటు అవసరమైన పత్రాలను తప్పనిసరిగా జతపరచాలి. కుల ధృవీకరణ పత్రం (SC/ST/BC అయితే), నివాస ధృవీకరణ, పుట్టిన తేదీ సర్టిఫికేట్, పదో తరగతి మార్కుల మెమో, ఆధార్ కార్డు, వికలాంగత్వ ధృవీకరణ పత్రం (ఉండితే) వంటి పత్రాలను గజిటెడ్ అధికారిచే ధృవీకరింపజేసి సమర్పించాల్సి ఉంటుంది. అలాగే ఆంధ్రప్రదేశ్ ఓపెన్ స్కూల్ సొసైటీ నుంచి పదో తరగతి ఉత్తీర్ణులైన అభ్యర్థులు తప్పనిసరిగా TC / స్టడీ సర్టిఫికేట్ జత చేయాలి. స్క్రూటినీ సమయంలో ఎలాంటి అవకతవకలకు అవకాశం లేకుండా సంబంధిత CDPO అధికారులు పత్రాలను క్షుణ్ణంగా పరిశీలించనున్నారు. అదేవిధంగా CDPOలు నిర్వహించే తెలుగు డిక్టేషన్ పరీక్షలో ఉత్తీర్ణత సాధించాల్సి ఉంటుంది.
ఎంపికైన అభ్యర్థులకు నెలవారీగా వేతనం చెల్లించనున్నారు. అంగన్వాడీ వర్కర్, మినీ అంగన్వాడీ వర్కర్కు రూ.11,500, అంగన్వాడీ హెల్పర్కు రూ.7,000 చొప్పున జీతం అందించనున్నారు. అభ్యర్థులు పూర్తి చేసిన దరఖాస్తులను తమ స్థానిక ICDS ప్రాజెక్టు కార్యాలయంలో సమర్పించాలి. మరిన్ని వివరాల కోసం సంబంధిత CDPO కార్యాలయాన్ని లేదా అనంతపురం జిల్లా అధికారిక వెబ్సైట్ను సందర్శించాలని అధికారులు సూచించారు.
