చైనాలో వివిధ దేశాల ప్రతినిధులతో ఘనంగా 10వ ప్రపంచ తెలుగు సాహితీ వైభవం!

చైనాలో తెలుగు భాషకు అంతర్జాతీయ వేదిక.. షాంఘై సదస్సులో 10 పుస్తకాల ఆవిష్కరణ..

షాంఘైలో ప్రపంచ తెలుగు సాహితీ సదస్సు.. 30కి పైగా ప్రసంగాలు, విశేష సాంస్కృతిక కార్యక్రమాలు..

తెలుగు భాష, సాహిత్యం, సంస్కృతుల గొప్పతనాన్ని ప్రపంచానికి చాటిచెప్పే మరో అంతర్జాతీయ వేదికగా చైనాలోని షాంఘై నగరం నిలిచింది. వంగూరి ఫౌండేషన్ ఆఫ్ అమెరికా, షాంఘై తెలుగు సంఘం సంయుక్త ఆధ్వర్యంలో అక్టోబర్ 24, 25 తేదీల్లో నిర్వహించిన 10వ ప్రపంచ తెలుగు సాహితీ సదస్సు ఘనంగా ముగిసింది. వివిధ దేశాలకు చెందిన తెలుగు సాహితీవేత్తలు, రచయితలు, కవులు, భాషాభిమానులు ప్రత్యక్షంగా, ఆన్‌లైన్ ద్వారా పాల్గొని ఈ కార్యక్రమాన్ని విజయవంతం చేశారు. చైనాలో ఇంత విస్తృత స్థాయిలో తెలుగు సాహితీ సదస్సు నిర్వహించడం ప్రత్యేకతను సంతరించుకుంది.

అంతర్జాతీయ స్థాయిలో తెలుగు సాహిత్యానికి వేదిక

వంగూరి ఫౌండేషన్ ఆఫ్ అమెరికా, షాంఘై తెలుగు సంఘం నిర్వహించిన ఈ సదస్సుకు శ్రీ సాంస్కృతిక కళాసారథి సింగపూర్, హాంకాంగ్ తెలుగు సమాఖ్య, లోక్ నాయక్ ఫౌండేషన్, వంశీ ఆర్ట్ థియేటర్స్, మలేషియా తెలుగు సంఘం సహకారం అందించాయి. భారత్‌తో పాటు అమెరికా, మలేషియా, ఆస్ట్రేలియా, హాంకాంగ్, సింగపూర్, ఒమాన్, యునైటెడ్ అరబ్ ఎమిరేట్స్ తదితర దేశాల నుంచి పలువురు ప్రతినిధులు పాల్గొన్నారు.

మాజీ ఉపరాష్ట్రపతి ఎం. వెంకయ్య నాయుడు పంపిన అభినందన సందేశం, ప్రముఖ నటుడు, రచయిత తనికెళ్ల భరణి ప్రధానోపన్యాసం, ప్రముఖ సాహితీవేత్త డాక్టర్ యార్లగడ్డ లక్ష్మీప్రసాద్ కీలకోపన్యాసం సదస్సులో ప్రత్యేక ఆకర్షణగా నిలిచాయి. చైనాలో తొలిసారిగా ఈ స్థాయిలో తెలుగు సాహిత్య కార్యక్రమం జరగడం తెలుగు భాషకు అంతర్జాతీయ గుర్తింపును తీసుకొచ్చే పరిణామమని వక్తలు పేర్కొన్నారు.

రెండు రోజుల పాటు సాగిన ఈ సదస్సులో రచయితలు తమ రచనలు, పరిశోధనలు, సాహిత్య అనుభవాలను ఇతర సాహితీవేత్తలు, అభిమానులతో పంచుకున్నారు. తెలుగు భాష, సాహిత్యం, సంస్కృతి, ఆధునిక రచనా ధోరణులు, ప్రవాస తెలుగు సాహిత్యం వంటి అంశాలపై ముప్పైకి పైగా ప్రసంగాలు జరిగాయి. ప్రపంచంలోని వివిధ ప్రాంతాల్లో నివసిస్తున్న తెలుగువారిని భాష, సాహిత్యాల ద్వారా అనుసంధానించడంలో ఈ సమావేశం కీలక పాత్ర పోషించింది.

తెలుగు భాషాభివృద్ధే ప్రధాన లక్ష్యం

వంగూరి ఫౌండేషన్ అధినేత వంగూరి చిట్టెన్ రాజు మాట్లాడుతూ, తెలుగు భాషాభివృద్ధిపై ఆసక్తిని పెంచడం, సాహిత్యంపై అభిరుచిని ప్రోత్సహించడం ఈ సదస్సు ప్రధాన ఉద్దేశమని తెలిపారు. షాంఘైతో పాటు చైనాలోని ఇతర నగరాల్లో నివసిస్తున్న తెలుగువారికి ఈ కార్యక్రమం స్ఫూర్తినిస్తే, తమ ప్రయత్నం సఫలమైనట్లేనని పేర్కొన్నారు. సదస్సు నిర్వహణలో భాగస్వాములైన ప్రతి ఒక్కరి కృషికి అప్పుడే నిజమైన సార్థకత లభిస్తుందని ఆయన అభిప్రాయపడ్డారు.

ఈ సందర్భంగా మలేషియాకు చెందిన ప్రముఖ తెలుగు భాషాభిమాని డాక్టర్ మద్దెల అచ్చయ్య కుమార్ రావుకు “జీవన సాఫల్య పురస్కారం” అందజేశారు. సాహిత్యం, తెలుగు భాషపై ఆయనకున్న అభిరుచికి గుర్తింపుగా ఈ పురస్కారం ప్రదానం చేశారు. దివంగత సాహితీవేత్త డాక్టర్ తెన్నేటి సుధాదేవి స్మృతికి సదస్సును అంకితం చేయడం ద్వారా ఆమె సాహిత్య సేవలను నిర్వాహకులు స్మరించుకున్నారు.

పది కొత్త పుస్తకాల ఆవిష్కరణ

శాయి రాచకొండ నిర్వహణలో జరిగిన ఈ సదస్సులో మొత్తం పది నూతన గ్రంథాలను ఆవిష్కరించారు. వెంకట్ నాగం రచించిన “రచ్చబండ చర్చలు”, “కలగూర గంప”, రాధిక మంగిపూడి రచించిన “గీత నుంచి గీతాల దాకా”, ఆర్. శర్మ దంతుర్తి రచించిన “విలువల వంతెన”, డాక్టర్ నోముల నర్మద రెడ్డి రచించిన “చుక్ చుక్ రైలులో మా ప్రయాణం” పుస్తకాలు ఈ కార్యక్రమంలో పరిచయమయ్యాయి.

వంగూరి చిట్టెన్ రాజు రచించిన “అవేమైనా జ్ఞాపకాలా, మర్చిపోవడానికి?”, న్యూజిలాండ్ రచయిత సతీష్ గొల్లపూడి రాసిన బాలసాహిత్య గ్రంథం “స్వర్గ కాలం” కూడా ఆవిష్కృతమయ్యాయి. చైనా నుంచి వెలువడిన తొలి తెలుగు గ్రంథంగా పేర్కొన్న సురేంద్ర నూకల, షాంఘై రచించిన “భారతీయ హృదయం ప్రవాస జీవితం” పుస్తకం సదస్సులో ప్రత్యేకంగా నిలిచింది.

రామా చంద్రమౌళి రచించిన బృహత్ గ్రంథం “కాల నాళిక”కు డాక్టర్ దుర్గా శశికిరణ్ చేసిన స్వేచ్ఛానువాదం “KairoNexus” ఆంగ్ల గ్రంథాన్ని అంతర్జాతీయ స్థాయిలో ఆవిష్కరించడం మరో విశేషం. భాషల మధ్య సాహిత్య అనుసంధానానికి ఈ ప్రయత్నం ప్రాధాన్యాన్ని చాటిచెప్పింది.

చైనాలోని తెలుగువారి అనుభవాలు.. ప్రత్యేక ప్రసంగాలు

షాంఘైలో నివసిస్తున్న పలువురు తెలుగు ప్రతినిధులు తమ అనుభవాలు, పరిశోధనలు, భాషా సంబంధిత అంశాలను సదస్సులో వివరించారు. భవాని వాసిరెడ్డి “శ్రీ తాళ్ళపాక అన్నమాచార్యులు” అనే అంశంపై ప్రసంగించారు. సరిపల్లి వర్ణిక “చైనా- నా జీవితాన్ని మార్చిన ఎనిమిదేళ్లు” అనే అంశంతో తన అనుభవాలను పంచుకున్నారు. పద్మలత నూకల “భాష యొక్క ప్రాముఖ్యత”, హరి బాబు రాయి “20 ఏళ్ల చైనా అనుభవాలు”, గరిమ కొండా “ముందు తరానికి తెలుగు భాష, సంప్రదాయం” అంశాలపై మాట్లాడారు.

మోనిక సుంకర “వలస పాలన నాటి షాంఘైలో భారతీయ సిక్కు పోలీసుల నివాసాలు (1920-1940)” అనే చారిత్రక అంశాన్ని సభ ముందుంచారు. బీజింగ్‌కు చెందిన కీర్తి ఆజాద్ మండవ, సుమ కోదండరాం “విక్రమార్కుని కథలు- మంగోలు భాష, భారతీయ భాషల సమన్వయం” అంశంపై చేసిన ప్రసంగం కూడా సభికులను ఆకట్టుకుంది.

డాక్టర్ తనికెళ్ల భరణితో నిర్వహించిన ముఖాముఖి కార్యక్రమం ఆసక్తికరంగా సాగింది. డాక్టర్ మాధవ రెడ్డి కోలన్ నిర్వహణలో జరిగిన “చైనాలో తెలుగు” చర్చా వేదికలో చైనాలో తెలుగు భాష పరిస్థితులు, అక్కడి తెలుగు సమాజం, భాషా పరిరక్షణకు తీసుకోవాల్సిన చర్యలపై చర్చించారు.

ఆన్‌లైన్ వేదికపైనా సాహిత్య సందడి

ప్రత్యక్ష సదస్సుకు అనుబంధంగా అంతర్జాలంలో జూమ్ సమావేశాన్ని కూడా నిర్వహించారు. వంశీ ఇంటర్నేషనల్ అధినేత డాక్టర్ వంశీ రామరాజు, రాధిక మంగిపూడి, కవుటూరు రత్నకుమార్ సంధానకర్తలుగా వ్యవహరించారు. ఈ వేదిక ద్వారా పలువురు సాహితీవేత్తలు తమ అభిప్రాయాలను, రచనా అనుభవాలను పంచుకున్నారు. కార్యక్రమానికి విక్రమ్ సుఖవాసి సాంకేతిక సహకారం అందించారు.

ప్రత్యక్షంగా షాంఘైకి చేరుకోలేని సాహితీవేత్తలకు ఆన్‌లైన్ వేదిక ద్వారా భాగస్వాములయ్యే అవకాశం కల్పించడం ఈ సదస్సులో మరో ముఖ్యమైన అంశంగా నిలిచింది. భౌగోళిక దూరాలు ఉన్నప్పటికీ తెలుగు భాషపై ఉన్న అభిమానం అందరినీ ఒకే వేదికపైకి తీసుకువచ్చింది.

నృత్యనాటికలు, సాంస్కృతిక కార్యక్రమాలు

సాహిత్య చర్చలతో పాటు కళా ప్రదర్శనలు కూడా ప్రేక్షకులను అలరించాయి. మలేషియా తెలుగు అకాడమీ బృందం ప్రదర్శించిన “ప్రహ్లాద చరిత్ర” నృత్యనాటిక విశేషంగా ఆకట్టుకుంది. హాంకాంగ్‌కు చెందిన నాట్యాచార్యుడు సంజయ్ వడపల్లి నృత్య ప్రదర్శనలు, షాంఘై స్థానిక కళాకారుల సాంస్కృతిక కార్యక్రమాలు సదస్సుకు కళాత్మక శోభను తీసుకొచ్చాయి.

తెలుగు సాహిత్యంతో పాటు సంప్రదాయ కళలను కూడా అంతర్జాతీయ వేదికపై పరిచయం చేయడం ద్వారా తెలుగు సంస్కృతిలోని వైవిధ్యాన్ని నిర్వాహకులు ప్రదర్శించారు. సాహిత్యం, నృత్యం, నాటకం వంటి విభిన్న కళారూపాలు ఒకే వేదికపై కలవడం కార్యక్రమానికి ప్రత్యేక ఆకర్షణగా నిలిచింది.

షాంఘై తెలుగు సంఘం కృషి

సదస్సు విజయవంతంగా ముగిసిన సందర్భంగా షాంఘై తెలుగు సంఘం అధ్యక్షుడు డాక్టర్ మాధవ రెడ్డి కోలన్ మాట్లాడుతూ, తెలుగు భాషను ప్రపంచ వేదికలపై మరింత విశిష్ట స్థానానికి తీసుకెళ్లాలనే సంకల్పంతో ఈ కార్యక్రమాన్ని నిర్వహించినట్లు తెలిపారు. ఈ లక్ష్య సాధనలో వివిధ దేశాల నుంచి వచ్చిన సాహితీవేత్తలు, భాషాభిమానుల భాగస్వామ్యం కీలకమైందని పేర్కొన్నారు.

సదస్సు నిర్వహణలో షాంఘై తెలుగు సంఘానికి చెందిన నాగ మల్లికార్జునరావు తోట, భవాని వాసిరెడ్డి, మోనికా సుంకర, ఉదయ్ భాస్కర్ పెయ్యేటి, వర్ణిక సరిపల్లి, రాహుల్ కోరాడ, సంగీత థామస్, పల్లవితో పాటు సంఘ కార్యవర్గ సభ్యులు, కార్యకర్తలు విశేషంగా కృషి చేశారు. అతిథుల ఆహ్వానం నుంచి కార్యక్రమాల నిర్వహణ వరకు పలువురు సమన్వయంతో పనిచేయడం సదస్సు విజయానికి దోహదపడింది.

కార్యక్రమానికి ఆర్థికంగా సహకరించిన స్పాన్సర్లకు నిర్వాహకులు కృతజ్ఞతలు తెలిపారు. అలాగే సదస్సుకు హాజరైన అతిథులకు రుచికరమైన విందు భోజనం అందించిన షాంఘైలోని స్థానిక బాలీవుడ్ రెస్టారెంట్ యాజమాన్యానికి ప్రత్యేక ధన్యవాదాలు తెలియజేశారు.

అంతర్జాతీయ రికార్డుగా నమోదు

చైనాలో తొలిసారిగా నిర్వహించిన తెలుగు సాహితీ సదస్సుగా ఈ కార్యక్రమాన్ని “తెలుగు బుక్ ఆఫ్ ఇంటర్నేషనల్ రికార్డ్స్” అంతర్జాతీయ రికార్డుగా ప్రకటించి నమోదు చేసినట్లు నిర్వాహకులు తెలిపారు. ఈ మేరకు ప్రశంసాపత్రాన్ని కూడా అందజేశారు.

ప్రపంచవ్యాప్తంగా విస్తరించి ఉన్న తెలుగు సమాజాన్ని భాష, సాహిత్యం, సంస్కృతి ద్వారా అనుసంధానించాలనే లక్ష్యంతో జరిగిన ఈ సదస్సు, ప్రవాస తెలుగు సాహిత్యానికి కొత్త ఉత్సాహాన్ని అందించింది. కొత్త పుస్తకాల ఆవిష్కరణలు, సాహిత్య ప్రసంగాలు, పరిశోధనల ప్రదర్శన, సాంస్కృతిక కార్యక్రమాలు కలిసి తెలుగు భాషా వైభవాన్ని మరోసారి చాటిచెప్పాయి. చైనాలో నివసిస్తున్న తెలుగు కుటుంబాల్లో, ముఖ్యంగా యువతలో మాతృభాషపై ఆసక్తిని పెంపొందించేందుకు ఇలాంటి కార్యక్రమాలు ఉపయోగపడతాయనే ఆశాభావాన్ని నిర్వాహకులు వ్యక్తం చేశారు.