ప్రపంచవ్యాప్తంగా వైరల్ అయిన హనుమాన్ చాలీసా! స్మిత్ కు తాను పాడి అంకితం ఇచ్చిన ఇజ్రాయిల్ టాప్ సింగర్!

• పైలట్ స్మిత్ మచ్ఛర్ ధైర్యానికి ప్రశంసలు.. భక్తి గీతంతో ఇజ్రాయెల్ గాయకుడి ప్రత్యేక గౌరవం.
• ఈ ప్రత్యేక గీతాన్ని ఇన్‌స్టాగ్రామ్‌లో పోస్ట్ చేయడంతో భారత్‌, ఇజ్రాయెల్‌కు చెందిన నెటిజన్ల దృష్టిని ఆకర్షించింది.

Indian Hero:విపత్కర పరిస్థితుల్లో ధైర్యం కోల్పోకుండా వందలాది మంది ప్రాణాలను కాపాడేందుకు ప్రయత్నించిన ఓ భారతీయ పైలట్‌కు విదేశీ గాయకుడు వినూత్న రీతిలో నివాళులర్పించారు. ప్రాణాలను పణంగా పెట్టి విమానాన్ని సురక్షితంగా నడిపేందుకు పోరాడిన పైలట్ స్మిత్ మచ్ఛర్‌ను ‘భారతీయ హీరో’గా అభివర్ణిస్తూ.. ఇజ్రాయెల్‌కు చెందిన గాయకుడు బెన్ రైవిట్జ్ హనుమాన్ చాలీసాను ఆలపించారు. ఆ గీతాన్ని పైలట్‌కు అంకితం చేస్తూ సోషల్ మీడియాలో పోస్ట్ చేయడంతో ప్రస్తుతం ఈ వీడియో వైరల్‌గా మారింది.

దుబాయ్ నుంచి టెల్ అవీవ్‌కు వెళ్తున్న ఫ్లై దుబాయ్ విమానంలో పైలట్ స్మిత్ మచ్ఛర్‌కు తీవ్ర సంక్షోభ పరిస్థితి ఎదురైంది. విమాన ప్రయాణ సమయంలో ఆయన సహ పైలట్ దాడికి పాల్పడినట్లు ఆరోపణలు వచ్చాయి. ఈ క్రమంలో విమానాన్ని అదుపులో ఉంచుతూ, పెను ప్రమాదం జరగకుండా అడ్డుకునేందుకు స్మిత్ మచ్ఛర్ తీవ్రంగా శ్రమించినట్లు కథనాలు వెల్లడించాయి.

ఆ సమయంలో తాను పదేపదే హనుమాన్ చాలీసాను పఠించినట్లు స్మిత్ గతంలో వెల్లడించారు. విమానాన్ని నియంత్రించేందుకు, పరిస్థితులను ఎదుర్కొనేందుకు ఆ ప్రార్థన తనకు ధైర్యాన్ని ఇచ్చిందని ప్రధాని నరేంద్ర మోదీతోనూ ఆయన చెప్పినట్లు సమాచారం.

‘భారతీయ హీరో’ అంటూ ఇజ్రాయెల్ గాయకుడి ప్రశంసలు

స్మిత్ మచ్ఛర్ సాహసాన్ని తెలుసుకున్న ఇజ్రాయెల్ గాయకుడు బెన్ రైవిట్జ్ ప్రత్యేకంగా స్పందించారు. భారతీయ శాస్త్రీయ సంగీతంపై ఆసక్తి కలిగిన ఆయన.. హనుమాన్ చాలీసాను ఆలపించి ఆ ప్రదర్శనను స్మిత్‌కు అంకితం చేశారు.

ఈ వీడియోను ఇన్‌స్టాగ్రామ్‌లో పంచుకుంటూ.. స్మిత్ మచ్ఛర్ ఎంతోమంది ప్రాణాలను కాపాడి, పెను విపత్తును నివారించిన భారతీయ హీరో అని రైవిట్జ్ పేర్కొన్నారు. ఆయన త్వరగా కోలుకోవాలని, సంపూర్ణ ఆరోగ్యంతో తిరిగి రావాలని ఆకాంక్షించారు.

సోషల్ మీడియాలో ప్రశంసల వెల్లువ

రైవిట్జ్ చేసిన ఈ ప్రత్యేక నివాళి భారత్‌తో పాటు ఇజ్రాయెల్‌లోనూ పలువురిని ఆకట్టుకుంది. ఆయన గాత్రాన్ని, హనుమాన్ చాలీసాను ఆలపించిన తీరును నెటిజన్లు ప్రశంసిస్తున్నారు. భిన్న దేశాలు, సంస్కృతులు, విశ్వాసాలకు చెందిన ప్రజలను సంగీతం, మానవత్వం ఎలా అనుసంధానిస్తాయో ఈ ఘటన మరోసారి చాటిందని పలువురు వ్యాఖ్యానిస్తున్నారు.

ఒక నెటిజన్ ఆయన హనుమాన్ చాలీసా ఆలాపన అద్భుతంగా ఉందని ప్రశంసించగా.. మరొకరు గాత్రంలోని మాధుర్యాన్ని, పదాలను పలికించిన విధానాన్ని మెచ్చుకున్నారు.

ఒకవైపు విమానంలో ఎదురైన సంక్షోభాన్ని ధైర్యంగా ఎదుర్కొన్న పైలట్.. మరోవైపు దేశ సరిహద్దులను దాటి ఆయనకు గౌరవం తెలిపిన గాయకుడు.. ఈ ఇద్దరి ఉదంతం ఇప్పుడు సోషల్ మీడియాలో చర్చనీయాంశంగా మారింది.