ఢిల్లీలో గ్రీన్ క్రాకర్స్‌కు సుప్రీంకోర్టు గ్రీన్ సిగ్నల్.. రెండు రోజులే అనుమతి

• ఢిల్లీలో నవంబర్ 7, 8 తేదీల్లో గ్రీన్ క్రాకర్స్ కాల్చేందుకు సుప్రీంకోర్టు అనుమతి ఇచ్చింది.
• ఉదయం 6–7 గంటల వరకు, రాత్రి 8–10 గంటల వరకు మాత్రమే టపాసులు కాల్చాలి.

Delhi Diwali 2026: దీపావళి పండుగ వేళ ఢిల్లీ ప్రజలకు సుప్రీంకోర్టు కీలక ఊరటనిచ్చింది. దేశ రాజధానిలో పర్యావరణ హితమైన గ్రీన్ క్రాకర్స్ కాల్చేందుకు అనుమతిస్తూ ఆదేశాలు జారీ చేసింది. అయితే ఈ వెసులుబాటు కేవలం రెండు రోజులు మాత్రమే ఉంటుందని స్పష్టం చేసింది. నిర్ణీత సమయాల్లోనే టపాసులు కాల్చాలని, నిబంధనలను తప్పనిసరిగా పాటించాలని ఆదేశించింది.

నవంబర్ 7, 8 తేదీల్లో మాత్రమే అనుమతి

జస్టిస్ ఎంఎం సుంద్రేశ్ నేతృత్వంలోని ధర్మాసనం సోమవారం ఈ మేరకు ఉత్తర్వులు జారీ చేసింది. నవంబర్ 7, 8 తేదీల్లో గ్రీన్ క్రాకర్స్ కాల్చేందుకు అనుమతించింది. ఉదయం 6 గంటల నుంచి 7 గంటల వరకు, రాత్రి 8 గంటల నుంచి 10 గంటల వరకు మాత్రమే టపాసులు కాల్చాలని స్పష్టం చేసింది. ఈ సమయాలు మినహా ఇతర వేళల్లో క్రాకర్స్ కాల్చడానికి అనుమతి ఉండదని పేర్కొంది.

నిబంధనల అమలు అధికారుల బాధ్యత

టపాసులపై పూర్తిస్థాయి నిషేధం విధించాలన్న అంశంపై గతవారం విచారణ చేపట్టిన సుప్రీంకోర్టు.. అలాంటి నిర్ణయం తీసుకునేందుకు నిరాకరించింది. ప్రజల భావోద్వేగాలను పరిగణనలోకి తీసుకుంటూనే పర్యావరణ పరిరక్షణకు ప్రాధాన్యత ఇవ్వాలని అభిప్రాయపడింది. మరోవైపు, కోర్టు ఎన్ని మార్గదర్శకాలు జారీ చేసినా వాటిని క్షేత్రస్థాయిలో అమలు చేయకపోతే ప్రయోజనం ఉండదని వ్యాఖ్యానించింది. నిబంధనల అమలును పర్యవేక్షించాల్సిన బాధ్యత ప్రభుత్వ యంత్రాంగానిదేనని స్పష్టం చేసింది.

సెలబ్రిటీలతో అవగాహన కల్పించాలి

టపాసుల వినియోగాన్ని నియంత్రించడంలో ప్రజల భాగస్వామ్యం ఎంతో ముఖ్యమని ధర్మాసనం పేర్కొంది. ఈ క్రమంలో ప్రముఖ క్రీడాకారులు, సినీ ప్రముఖులు, సెలబ్రిటీల ద్వారా ప్రజల్లో అవగాహన కల్పించాలని సూచించింది. బాణసంచా కాల్చడం వల్ల వాయు కాలుష్యం పెరగడంతో పాటు ప్రజల ఆరోగ్యంపై ఎలాంటి ప్రతికూల ప్రభావాలు పడతాయో వివరించాలని తెలిపింది.

దీపావళి వేడుకలను జరుపుకుంటూనే పర్యావరణ పరిరక్షణకు ప్రతి ఒక్కరూ బాధ్యతగా వ్యవహరించాలని కోర్టు అభిప్రాయపడింది.