Bhogapuram Airport: ఆగస్టు 17 నుండి అందుబాటులోకి ఏఎస్‌ఆర్ అంతర్జాతీయ విమానాశ్రయం!

ఆగస్టు 17 నుంచి భోగాపురం అంతర్జాతీయ విమానాశ్రయానికి విశాఖ వాణిజ్య విమాన సర్వీసుల మార్పు.. 

30 ఏళ్ల పాటు విశాఖ విమానాశ్రయంలో షెడ్యూల్డ్ కమర్షియల్ సర్వీసులకు విరామం.. భోగాపురానికి 'VTZ' ఎయిర్‌పోర్టు కోడ్ బదిలీ..

విశాఖపట్నం: ఆంధ్రప్రదేశ్ విమానయాన రంగంలో కీలక మార్పుకు రంగం సిద్ధమైంది. విశాఖపట్నం విమానాశ్రయంలో గత మూడు దశాబ్దాలుగా కొనసాగుతున్న షెడ్యూల్డ్ వాణిజ్య విమాన సర్వీసులు ఆగస్టు 17 నుంచి భోగాపురంలోని గ్రీన్‌ఫీల్డ్ అల్లూరి సీతారామరాజు అంతర్జాతీయ విమానాశ్రయానికి పూర్తిగా మారనున్నాయి. ఈ మేరకు కేంద్ర పౌర విమానయాన మంత్రిత్వ శాఖ అధికారిక నోటిఫికేషన్ జారీ చేసింది.

భోగాపురం విమానాశ్రయాన్ని ఆగస్టు 1న ప్రధాని నరేంద్ర మోదీ ప్రారంభించనున్నారు. అనంతరం అవసరమైన సాంకేతిక, నిర్వహణ ఏర్పాట్లు పూర్తయ్యాక ఆగస్టు 17 అర్ధరాత్రి 12:01 గంటల నుంచి అన్ని షెడ్యూల్డ్ కమర్షియల్ విమాన సర్వీసులు కొత్త విమానాశ్రయం నుంచే ప్రారంభం కానున్నాయి.

కేంద్ర ప్రభుత్వం జారీ చేసిన నోటిఫికేషన్ ప్రకారం, విశాఖపట్నం విమానాశ్రయంలోని సివిల్ ఎన్‌క్లేవ్‌లో షెడ్యూల్డ్ కమర్షియల్ విమాన కార్యకలాపాలు 30 సంవత్సరాల పాటు నిలిపివేయబడతాయి. ఈ నిర్ణయం భోగాపురం గ్రీన్‌ఫీల్డ్ విమానాశ్రయానికి ఇప్పటికే ఇచ్చిన సైట్ క్లియరెన్స్‌కు అనుగుణంగా తీసుకున్నట్లు పేర్కొంది.

అలాగే ప్రస్తుతం విశాఖ విమానాశ్రయానికి ఉన్న అంతర్జాతీయ ఎయిర్ ట్రాన్స్‌పోర్ట్ కోడ్ (IATA Code) "VTZ"ను ఆగస్టు 17 నుంచి భోగాపురం అల్లూరి సీతారామరాజు అంతర్జాతీయ విమానాశ్రయానికి బదిలీ చేయనున్నారు. దీంతో భవిష్యత్తులో అన్ని షెడ్యూల్డ్ విమానాల బుకింగ్‌లు, ప్రయాణ వివరాలు 'VTZ' కోడ్‌తోనే భోగాపురం విమానాశ్రయానికి అనుసంధానమవుతాయి.

అయితే విశాఖ విమానాశ్రయం పూర్తిగా మూతపడడం లేదని నోటిఫికేషన్ స్పష్టం చేసింది. జాతీయ అత్యవసర పరిస్థితులు, భారత వైమానిక దళం, ఇతర సాయుధ దళాలు, పోలీసు విభాగం లేదా ప్రభుత్వం అనుమతించిన ప్రత్యేక సంస్థల విమానాలకు ఈ నిబంధనలు వర్తించవు.

అదేవిధంగా ప్రభుత్వానికి చెందిన లేదా ప్రభుత్వం అద్దెకు తీసుకున్న ప్రత్యేక విమానాల్లో ప్రయాణించే వీఐపీల విమానాలు కూడా విశాఖ విమానాశ్రయాన్ని వినియోగించుకోవచ్చు. అలాగే నాన్-షెడ్యూల్డ్ కమర్షియల్ విమాన సర్వీసులు అవసరాన్ని బట్టి విశాఖ విమానాశ్రయంలో కొనసాగేందుకు అనుమతి ఉంటుంది.

దేశంలో గ్రీన్‌ఫీల్డ్ విమానాశ్రయాల ప్రారంభంతో పాత విమానాశ్రయాల నుంచి కమర్షియల్ కార్యకలాపాలు కొత్త విమానాశ్రయాలకు మారడం ఇదే తొలిసారి కాదు.

2008లో బెంగళూరు మరియు హైదరాబాద్ నగరాల్లో కొత్త గ్రీన్‌ఫీల్డ్ విమానాశ్రయాలు ప్రారంభమైన తర్వాత వాణిజ్య విమాన సర్వీసులు అక్కడికి మారాయి.
2022లో గోవాలోని మోపా అంతర్జాతీయ విమానాశ్రయం కార్యకలాపాలు ప్రారంభమయ్యాయి.
2025 డిసెంబర్‌లో నవీ ముంబై అంతర్జాతీయ విమానాశ్రయం ప్రారంభమై ముంబై మహానగర ప్రాంతానికి రెండో ప్రధాన విమానాశ్రయంగా నిలిచింది.
2026 జూన్‌లో ఉత్తరప్రదేశ్‌లోని జేవర్ (నోయిడా అంతర్జాతీయ విమానాశ్రయం) నుంచి వాణిజ్య విమాన సర్వీసులు ప్రారంభమయ్యాయి.
ఉత్తరాంధ్ర అభివృద్ధికి కొత్త దిశ

భోగాపురంలోని అల్లూరి సీతారామరాజు అంతర్జాతీయ విమానాశ్రయం ప్రారంభంతో ఉత్తరాంధ్ర ప్రాంతానికి అంతర్జాతీయ స్థాయి కనెక్టివిటీ మరింత బలోపేతం కానుంది. పర్యాటకం, ఐటీ, పారిశ్రామిక పెట్టుబడులు, ఎగుమతులు, ఉపాధి అవకాశాలు పెరిగే అవకాశం ఉందని నిపుణులు భావిస్తున్నారు.

విశాఖ నగరానికి సుమారు 50 కిలోమీటర్ల దూరంలో నిర్మితమైన ఈ గ్రీన్‌ఫీల్డ్ విమానాశ్రయం రాష్ట్రంలో విమానయాన రంగానికి కొత్త అధ్యాయాన్ని ప్రారంభించనుంది. ఆగస్టు 17 నుంచి ప్రయాణికులందరూ తమ విమాన ప్రయాణాలను భోగాపురం విమానాశ్రయం నుంచే కొనసాగించాల్సి ఉంటుంది.