Parking Rules: ఇంటి ముందు కారు పార్క్ చేస్తే ఏటా ₹25,000 పన్ను... బెంగళూరులో కొత్త పార్కింగ్ రూల్స్!

ట్రాఫిక్ నివారణకు కర్నాటక ప్రభుత్వం కఠిన నిర్ణయం...

బిల్డింగ్ బై-లాస్ పాటిస్తేనే పార్కింగ్ పర్మిషన్...

వాహనదారులకు మైండ్ బ్లాక్ అయ్యే షాక్...

Parking Rules: మెట్రో నగరం బెంగళూరులో సొంత కారు కలిగి ఉండటమే కాకుండా, దానిని ఇంటి ముందు వీధిలో పార్క్ చేయడం కూడా ఇకపై తీవ్రమైన ఆర్థిక భారంగా మారనుంది. నగరంలో రోజురోజుకూ పెరిగిపోతున్న ట్రాఫిక్ రద్దీ, అస్తవ్యస్తమైన పార్కింగ్ వ్యవస్థను అదుపు చేసేందుకు కర్నాటక ప్రభుత్వం సంచలన నిర్ణయం తీసుకుంది. 'గ్రేటర్ బెంగళూరు అథారిటీ (పార్కింగ్) నిబంధనలు-2026' పేరుతో డ్రాఫ్ట్ నోటిఫికేషన్‌ను విడుదల చేసింది. ఈ కొత్త ముసాయిదా ప్రకారం, నివాస ప్రాంతాల్లోని రోడ్లపై వాహనాలు నిలిపేందుకు ఏడాదికి ₹25,000 వరకు 'రెసిడెన్షియల్ పార్కింగ్ పర్మిట్' ఫీజు వసూలు చేయాలని ప్రతిపాదించింది.

కారు రకాన్ని బట్టి వార్షిక ఫీజు:

ప్రతిపాదిత కొత్త రూల్స్ ప్రకారం, రోడ్డుపై పార్క్ చేసే ప్రైవేట్ వాహనాల సైజును బట్టి వార్షిక ఫీజుల శ్లాబులను నిర్ణయించారు:

• చిన్న కార్లు (హ్యాచ్‌బ్యాక్): ఏడాదికి ₹15,000

• మధ్యస్థ కార్లు (సెడాన్): ఏడాదికి ₹20,000

• పెద్ద కార్లు (SUVలు / లగ్జరీ వాహనాలు): ఏడాదికి ₹25,000

అయితే ఈ పార్కింగ్ పర్మిట్‌ను ప్రతి సంవత్సరం నవీకరించుకోవాల్సి ఉంటుంది. తమ భవనంలో కనీస సొంత పార్కింగ్ సదుపాయాలు ఉన్న యజమానులకు మాత్రమే ఈ పర్మిట్ జారీ చేస్తారు. భవన నిర్మాణ నిబంధనలు (Building Bye-laws) ఉల్లంఘించి, అసలు పార్కింగ్ ప్లేస్ లేకుండా నిర్మించిన ఇళ్లకు లేదా అపార్ట్‌మెంట్లకు ఈ పర్మిట్ ఇవ్వరు. పర్మిట్ లేకుండా రోడ్డుపై వాహనాలు నిలిపితే అక్రమ పార్కింగ్‌గా పరిగణించి భారీ జరిమానాలు విధిస్తారు.

వాణిజ్య ప్రాంతాల్లో గంటల ప్రాతిపదికన చార్జీలు:

కేవలం నివాస ప్రాంతాలే కాకుండా, కమర్షియల్ రోడ్లపై కూడా పార్కింగ్ చార్జీలను భారీగా సవరించారు. రోడ్ల వర్గీకరణ (Category A, B, C) ఆధారంగా గంటకు వసూలు చేసే రుసుములు ఇలా ఉన్నాయి:

• కార్లు: 'సి' కేటగిరీ రోడ్లలో గంటకు ₹40, 'బి' కేటగిరీ రోడ్లలో ₹60, అలాగే ప్రసిద్ధ 'ఎ' కేటగిరీ రోడ్లలో గంటకు ₹80 వసూలు చేస్తారు.

• ద్విచక్ర వాహనాలు (2-Wheelers): కేటగిరీని బట్టి గంటకు ₹20 నుంచి ₹40 వరకు వసూలు చేస్తారు.

రోడ్డు పక్కన గంటల తరబడి ఉచితంగా వాహనాలు ఆపి ఉంచే ధోరణికి అడ్డుకట్ట వేయడానికే ఈ కఠిన నిర్ణయం తీసుకున్నట్లు ప్రభుత్వం స్పష్టం చేసింది. వాహనాన్ని రెండు గంటల కంటే ఎక్కువ సమయం పార్క్ చేసి ఉంచితే చార్జీలు మరింత పెరుగుతాయి.

ఆర్గనైజ్డ్ పార్కింగ్‌కు తక్కువ రుసుము:

రోడ్లపై ట్రాఫిక్‌ను తగ్గించేందుకు మల్టీ లెవల్ పార్కింగ్ (Off-Street Parking) కాంప్లెక్స్‌లను ఉపయోగించే వారికి ఊరట కల్పించారు. అక్కడ కార్లకు గంటకు ₹20 నుంచి ₹40, ద్విచక్ర వాహనాలకు ₹10 నుంచి ₹20 మాత్రమే ఉంటుంది. నెలవారీ పాస్‌లు తీసుకోవాలనుకునే వారికి ₹1,000 నుంచి ₹4,000 వరకు చార్జీలు ప్రతిపాదించారు. అంతేకాకుండా, రాత్రి 8 గంటల నుంచి ఉదయం 8 గంటల వరకు నిలిపే వాహనాలకు నెలవారీ రుసుములో 50 శాతం రాయితీ ఇస్తారు.

30 రోజుల్లో అభిప్రాయ సేకరణ:

ఈ కొత్త డ్రాఫ్ట్ నిబంధనలపై నగరవాసులు, వాహనదారులు, సంఘాల నుంచి అభ్యంతరాలు మరియు సూచనలను ఆహ్వానిస్తూ అర్బన్ డెవలప్‌మెంట్ డిపార్ట్‌మెంట్ 30 రోజుల గడువు విధించింది. ప్రజాభిప్రాయాన్ని పరిశీలించిన అనంతరం ఈ డ్రాఫ్ట్‌పై తుది నిర్ణయం తీసుకోనున్నారు. ఇది అమల్లోకి వస్తే బెంగళూరులోని మధ్యతరగతి మరియు ఉన్నత వర్గాల కారు యజమానులపై ఏటా వేల రూపాయల అదనపు భారం పడటం ఖాయంగా కనిపిస్తోంది.