2 నెలల ఇంటరన్షిప్! ₹9.6 లక్షలు జీతం! చేయవలసిన పని కేవలం తిని నిద్రపోవటం!

నిద్రపోతే రూ.9.6 లక్షల బహుమతి.. రెండు నెలలు నిద్రపోయి విదేశీ విహారయాత్ర గెలుచుకున్న ముంబై యువతి..

రెండు లక్షల దరఖాస్తులు.. 10 మందికి మాత్రమే ఛాన్స్.. చివరకు రూ.9.6 లక్షలు గెలిచిందెవరో తెలుసా?..

ముంబై: సాధారణంగా మంచి నిద్ర ఆరోగ్యానికి ఎంతో అవసరమని వైద్యులు చెబుతుంటారు. రోజుకు తగినన్ని గంటలు నిద్రపోవడం వల్ల శారీరక, మానసిక ఆరోగ్యం మెరుగుపడుతుందని నిపుణులు సూచిస్తుంటారు. అయితే అదే నిద్రతో లక్షల రూపాయల బహుమతి గెలుచుకోవచ్చంటే నమ్మగలరా? ముంబైకి చెందిన జినియా ఛటర్జీ (Jiniya Chatterjee) మాత్రం దీనిని నిజం చేసి చూపించారు. రెండు నెలల పాటు నిర్వహించిన ప్రత్యేక స్లీప్ ఇంటర్న్‌షిప్‌లో విజేతగా నిలిచి ఏకంగా రూ.9.6 లక్షల నగదు బహుమతితో పాటు స్పాన్సర్ చేసిన విహారయాత్రను సొంతం చేసుకున్నారు. వేక్‌ఫిట్ (Wakefit) సంస్థ నిర్వహించిన ఐదో సీజన్ స్లీప్ ఇంటర్న్‌షిప్‌లో ఆమె ఈ ఘనత సాధించారు.

రెండు లక్షల దరఖాస్తుల నుంచి 10 మంది ఎంపిక

సాధారణ ఉద్యోగాల మాదిరిగా కాకుండా, నిద్రకు ప్రాధాన్యతనిస్తూ రూపొందించిన ఈ పోటీ అందరి దృష్టిని ఆకర్షించింది. దేశవ్యాప్తంగా వచ్చిన రెండు లక్షలకు పైగా దరఖాస్తుల నుంచి కేవలం 10 మందిని మాత్రమే నిర్వాహకులు ఎంపిక చేశారు. వీరికి రెండు నెలల పాటు అంటే మొత్తం 60 రోజులపాటు పోటీ నిర్వహించారు. ఇందులో పాల్గొన్నవారు ప్రతిరోజూ తగినంత నిద్రపోవడం, క్రమబద్ధమైన నిద్ర సమయాలను పాటించడం, తమ నిద్ర అలవాట్లను మెరుగుపరుచుకోవడం వంటి అంశాలపై దృష్టి పెట్టాలి. ప్రతి ఒక్కరి నిద్ర సమయాలు, నిద్ర నాణ్యతను ట్రాక్ చేస్తూ రోజువారీ స్కోర్లు నమోదు చేశారు. వారానికి ఒకసారి నిర్వహించే ప్రత్యేక ఛాలెంజ్‌లలోనూ పాల్గొనాల్సి వచ్చింది. ఈ విధంగా వచ్చిన పాయింట్ల ఆధారంగా లీడర్‌బోర్డులో పోటీదారుల స్థానాలను నిర్ణయించారు.

నిద్రతో పాటు ఆసక్తికరమైన ఛాలెంజ్‌లు

ఈ ఇంటర్న్‌షిప్ కేవలం నిద్రపోవడంతోనే ముగియలేదు. పోటీలో పాల్గొన్నవారి సృజనాత్మకత, సమయస్ఫూర్తి, ప్రత్యేకంగా ఆలోచించే సామర్థ్యాన్ని పరీక్షించేందుకు నిర్వాహకులు వినూత్నమైన టాస్క్‌లు రూపొందించారు. అందులో భాగంగా 'స్లీప్ సినిమా' (Sleep Cinema) అనే ఛాలెంజ్‌లో ప్రముఖ సినిమాల్లోని సన్నివేశాలను నిద్రకు సంబంధించిన అంశాలతో ముడిపెట్టి మళ్లీ చిత్రీకరించాలి. మరో పోటీ 'స్లీప్ బింగో' (Sleep Bingo). ఇందులో పాల్గొనేవారు వారం రోజుల పాటు తమ నిద్ర అలవాట్లను సమీక్షించుకుని ఇచ్చిన టాస్క్‌లను పూర్తి చేయాలి.

ఇక 'అండర్‌కవర్ స్లీప్ మిషన్' (Undercover Sleep Mission) మరింత ఆసక్తికరంగా సాగింది. సాధారణ సంభాషణలో ఎదుటివారికి అనుమానం రాకుండా 'బ్లాంకెట్' లేదా 'పిల్లో' అనే పదాలను కనీసం 10 సార్లు ఉపయోగించాల్సి ఉంటుంది. ఇలా ప్రతి వారం నిర్వహించిన సృజనాత్మక పోటీల్లో అత్యుత్తమ ప్రతిభ కనబరిచిన వారికి 'ప్రో స్లీపర్ ఆఫ్ ది వీక్' (Pro Sleeper of the Week) అనే గుర్తింపును అందించారు.

గ్రాండ్ ఫినాలేలో నలుగురు పోటీదారులు

60 రోజుల పోటీ ముగిసే సమయానికి రత్నగిరి మణికందన్, జినియా ఛటర్జీ, మెహెక్ ఖోట్ మొదటి మూడు స్థానాల్లో నిలిచారు. అయితే హైదరాబాద్‌కు చెందిన కరీమ్ ఖాన్ కూడా వైల్డ్‌కార్డ్ ఎంట్రీ ద్వారా తిరిగి పోటీలోకి వచ్చారు. వారాంతపు సృజనాత్మక ఛాలెంజ్‌లలో అత్యధిక విజయాలు సాధించడం ద్వారా ఆయనకు ఈ అవకాశం లభించింది. దీంతో మొత్తం నలుగురు పోటీదారులు గ్రాండ్ ఫినాలేకు అర్హత సాధించారు.

'బిగ్ బెడ్' (Big Bedd) పేరుతో నిర్వహించిన ఈ ఫైనల్ రౌండ్ అచ్చం రియాలిటీ షోను తలపించింది. ఇందులో వరుసగా పలు ఆసక్తికరమైన టాస్క్‌లు నిర్వహించారు. చివరగా పోటీదారులు ఒక రాత్రి నిద్రపోయి తమ స్లీప్ స్కోర్లను నమోదు చేయాల్సి వచ్చింది. ఆ చివరి రాత్రి నిద్ర ప్రదర్శన కూడా విజేతను నిర్ణయించడంలో కీలక పాత్ర పోషించింది.

మెమరీ ఫోమ్ ఛాలెంజ్.. స్లీప్ ఆక్షన్

గ్రాండ్ ఫినాలేలో మొదట నిర్వహించిన 'మెమరీ ఫోమ్ ఛాలెంజ్' (Memory Foam Challenge)లో పోటీదారులకు కొన్ని బెడ్‌రూమ్ సెటప్‌లకు సంబంధించిన రిఫరెన్స్ చిత్రాలను చూపించారు. వాటిని పరిశీలించిన తర్వాత అదే తరహాలో బెడ్‌రూమ్‌ను తిరిగి ఏర్పాటు చేయాలి. ఈ టాస్క్ ద్వారా వారి జ్ఞాపకశక్తి, పరిశీలన సామర్థ్యం, బృందంగా పనిచేసే నైపుణ్యాన్ని పరీక్షించారు.

ఆ తర్వాత 'స్లీప్ ఆక్షన్' (Sleep Auction) నిర్వహించారు. ఇందులో మంచి నిద్రకు అవసరమైన వస్తువులను పోటీదారులు వేలం పద్ధతిలో సొంతం చేసుకోవాలి. దిండ్లు, దుప్పట్లు, ఏసీ నియంత్రణలు, గదిలో లైటింగ్, శబ్దాల సెట్టింగ్‌లు వంటి వాటిని తమకు అనుకూలంగా ఏర్పాటు చేసుకునేందుకు పోటీ పడ్డారు. ఈ వేలం కార్యక్రమంలో హోస్ట్, సోషల్ మీడియా ఇన్‌ఫ్లుయెన్సర్ అనుజ్ గుప్తా ర్యాప్ రూపంలో లాలిపాటను ప్రదర్శించడం ప్రత్యేక ఆకర్షణగా నిలిచింది.

అన్ని ఏర్పాట్లు పూర్తయ్యాక నలుగురు ఫైనలిస్టులు తమ చివరి రాత్రి నిద్ర కోసం సిద్ధమయ్యారు. ఆ రాత్రి వారి నిద్ర సమయం, నాణ్యత ఆధారంగా వచ్చిన స్కోర్లను పరిశీలించారు. గతంలో సాధించిన ప్రదర్శనతో పాటు చివరి రాత్రి స్కోర్లను పోల్చి తుది విజేతను ప్రకటించారు.

జినియా ఛటర్జీకి రూ.9.6 లక్షల బహుమతి

చివరకు ముంబైకి చెందిన జినియా ఛటర్జీ అందరికంటే మెరుగైన ప్రదర్శనతో విజేతగా నిలిచారు. ఆమెకు రూ.9.6 లక్షల నగదు బహుమతితో పాటు స్పాన్సర్ చేసిన విహారయాత్రను అందించారు. దీంతో వేక్‌ఫిట్ నిర్వహించిన ఐదో సీజన్ స్లీప్ ఇంటర్న్‌షిప్ విజయవంతంగా ముగిసింది. నిద్రను కూడా ఒక పోటీగా మార్చి, దాని ప్రాధాన్యతను వినూత్నంగా ప్రచారం చేయవచ్చని ఈ కార్యక్రమం ద్వారా నిర్వాహకులు చాటిచెప్పారు.

2019లో ప్రారంభమైన స్లీప్ ఇంటర్న్‌షిప్

వేక్‌ఫిట్ సంస్థ 2019లో ఈ స్లీప్ ఇంటర్న్‌షిప్ కార్యక్రమాన్ని ప్రారంభించింది. అప్పటి నుంచి మొదటి నాలుగు సీజన్లలోనే 10 లక్షలకు పైగా దరఖాస్తులు వచ్చాయి. ఈ నాలుగు సీజన్లలో మొత్తం 65 మంది ఇంటర్న్‌లకు ఒక్కొక్కరికి రూ.లక్ష చొప్పున స్టైపెండ్ అందించారు. నిద్ర ప్రాధాన్యతను ప్రజలకు తెలియజేయడంతో పాటు, క్రమబద్ధమైన నిద్ర అలవాట్లను ప్రోత్సహించడమే ఈ కార్యక్రమం ప్రధాన ఉద్దేశం.

మొత్తానికి ఉద్యోగం కోసం గంటల తరబడి పనిచేయడం, కష్టపడటం మాత్రమే ఆదాయానికి మార్గం కాదని ఈ వినూత్న పోటీ మరోసారి చర్చకు తెచ్చింది. ఆరోగ్యకరమైన నిద్రకు ప్రాధాన్యత ఇస్తూనే సృజనాత్మకతను ప్రదర్శిస్తే లక్షల రూపాయల బహుమతిని కూడా గెలుచుకోవచ్చని జినియా ఛటర్జీ నిరూపించారు. అయితే ఇది సాధారణంగా నిద్రపోతే డబ్బులు వచ్చే ఉద్యోగం కాదు.. ప్రత్యేక నిబంధనలు, టాస్క్‌లు, పోటీతో కూడిన ఒక వినూత్న ఇంటర్న్‌షిప్ కార్యక్రమం మాత్రమే.