IPL 2026: ఐపీఎల్‌లో 15 ఏళ్ల వైభవ్ సూర్యవంశీ సంచలనం.. 15 బంతుల్లోనే హాఫ్ సెంచరీతో చెన్నై చిత్తు!

IPL 2026: ఐపీఎల్ 2026 సీజన్ ఆరంభంలోనే ఒక కొత్త నక్షత్రం ఉదయించింది. రాజస్థాన్ రాయల్స్ (RR) తరపున బరిలోకి దిగిన 15 ఏళ్ల సంచలనం వైభవ్ సూర్యవంశీ, చెన్నై సూపర్ కింగ్స్‌తో జరిగిన మ్యాచ్‌లో ఆకాశమే హద్దుగా చెలరేగిపోయాడు. కేవలం 15 బంతుల్లోనే హాఫ్ సెంచరీ బాది అందరినీ ఆశ్చర్యపరిచాడు. అయితే ఈ అద్భుత ప్రదర్శన వెనుక ఒక నవ్వు తెప్పించే కథ కూడా ఉంది.

మార్చి 27న వైభవ్ తన 15వ పుట్టినరోజు జరుపుకున్నాడు. సాధారణంగా ఆటగాళ్ల బర్త్‌డే అంటే డ్రెస్సింగ్ రూమ్‌లో కేక్ కటింగ్, ఆ తర్వాత మొహమంతా కేక్ పూయడం  ఆనవాయితీగా వస్తోంది. కానీ వైభవ్ దీనికి భయపడి ఆ రాత్రి త్వరగానే నిద్రపోయాడట. "కేక్ మొహానికి పూస్తారని భయపడి నేను ముందే పడుకున్నాను, అందుకే ఆ సెలబ్రేషన్స్ మిస్ అయ్యాను" అని మ్యాచ్ తర్వాత నవ్వుతూ చెప్పుకొచ్చాడు. బహుశా ఆ నిద్ర తెచ్చిన ఉత్సాహమే గ్రౌండ్‌లో పరుగుల వరద పారించడానికి కారణమేమో.

టాస్ గెలిచి రాజస్థాన్ కెప్టెన్ రియాన్ పరాగ్ బౌలింగ్ ఎంచుకోగా, చెన్నై జట్టు నిర్ణీత ఓవర్లలో కేవలం 127 పరుగులకే కుప్పకూలింది. జోఫ్రా ఆర్చర్ బౌలింగ్‌ను ఎదుర్కోవడం చెన్నై బ్యాటర్లకు కష్టంగా మారింది. అనంతరం స్వల్ప లక్ష్యంతో బరిలోకి దిగిన రాజస్థాన్‌కు వైభవ్ అదిరిపోయే ఆరంభాన్ని ఇచ్చాడు. పవర్ ప్లేలో బంతిని నలుమూలలకూ బాదుతూ స్కోర్ బోర్డును ఉరికించాడు. మరో ఓపెనర్ యశస్వి జైస్వాల్ సహకారంతో కేవలం 12.1 ఓవర్లలోనే రాజస్థాన్ లక్ష్యాన్ని ఛేదించి, 8 వికెట్ల తేడాతో ఘన విజయం సాధించింది.

మ్యాచ్ ముగిసిన తర్వాత వైభవ్ మాట్లాడుతూ.. తన దూకుడు వెనుక కోచ్ కుమార్ సంగక్కర  సీనియర్ ప్లేయర్ల ప్రోత్సాహం ఉందని తెలిపాడు. "బౌలర్లు నన్ను టార్గెట్ చేస్తారని అందరూ చెప్పారు, కానీ కోచ్‌లు మాత్రం నీ సహజ సిద్ధమైన ఆటనే ఆడు అని ధైర్యం చెప్పారు. క్రీజులో ఉన్నప్పుడు జైస్వాల్ భయ్యా ప్రతి బంతికి నాతో మాట్లాడుతూ నన్ను గైడ్ చేశాడు" అని వైభవ్ వివరించాడు. చిన్న లక్ష్యం కాబట్టి పవర్ ప్లేలోనే మ్యాచ్‌ను కంట్రోల్‌లోకి తీసుకోవాలన్నదే తమ ప్లాన్ అని ఈ కుర్రాడు స్పష్టం చేశాడు.

రాజస్థాన్ కొత్త కెప్టెన్ రియాన్ పరాగ్, వైభవ్ ఆటపై ప్రశంసలు కురిపించాడు. "వైభవ్ నెట్స్‌లో ఆడుతుంటేనే మేమంతా ఆశ్చర్యపోయేవాళ్లం. మీడియాలో వచ్చే వార్తలను పట్టించుకోకుండా, 14 మ్యాచ్‌లు స్వేచ్ఛగా ఆడమని అతనికి చెప్పాను" అని పరాగ్ అన్నాడు. మరోవైపు, పిచ్ మొదట్లో బౌలింగ్‌కు అనుకూలించిందని, తాము సరైన స్కోరు చేయలేకపోయామని చెన్నై కెప్టెన్ రుతురాజ్ గైక్వాడ్ అంగీకరించాడు. మొత్తానికి, పుట్టినరోజు వేడుకలు గ్రౌండ్ వెలుపల మిస్ అయినా, గ్రౌండ్ లోపల మాత్రం వైభవ్ అసలైన పండుగ చేసుకున్నాడు.