Nara Lokesh: రాజకీయాలకు అతీతంగా యువత భవిష్యత్తు: పరీక్షల అక్రమాల నిరోధక బిల్లుపై మంత్రి లోకేష్ వ్యాఖ్యలు!
Nara Lokesh: ప్రభుత్వ పరీక్షల్లో ప్రశ్నపత్రాల లీకేజీలు, మాల్ప్రాక్టీస్కు అడ్డుకట్ట వేసే లక్ష్యంతో తీసుకొచ్చిన పబ్లిక్ ఎగ్జామినేషన్స్ (ప్రివెన్షన్ ఆఫ్ అన్ఫెయిర్ మీన్స్) సవరణ బిల్లు–2026 లోక్సభలో ఆమోదం పొందడంపై ఏపీ విద్యాశాఖ మంత్రి నారా లోకేశ్ విద్యార్థులకు శుభాకాంక్షలు తెలిపారు.
- విద్యార్థుల భవిష్యత్తుతో ఆటలాడే వారికి గట్టి హెచ్చరిక అని వ్యాఖ్య..
- Politics: పరీక్షల అక్రమాల నిరోధక బిల్లుకు లోక్సభ ఆమోదం..
Nara Lokesh: దేశవ్యాప్తంగా పోటీ పరీక్షలు, ప్రభుత్వ ఉద్యోగ నియామకాల్లో ప్రశ్నపత్రాల లీకేజీలు మరియు మాల్ప్రాక్టీస్ను శాశ్వతంగా నిరోధించే లక్ష్యంతో కేంద్ర ప్రభుత్వం తీసుకొచ్చిన 'పబ్లిక్ ఎగ్జామినేషన్స్ (ప్రివెన్షన్ ఆఫ్ అన్ఫెయిర్ మీన్స్) సవరణ బిల్లు–2026' లోక్సభలో ఆమోదం పొందింది. ఈ చారిత్రాత్మక బిల్లు ఆమోదం పొందడంపై ఆంధ్రప్రదేశ్ విద్యా, ఐటీ శాఖల మంత్రి నారా లోకేష్ మరియు ఉప ముఖ్యమంత్రి పవన్ కళ్యాణ్ వేర్వేరు ప్రకటనల్లో విద్యార్థులకు, అభ్యర్థులకు శుభాకాంక్షలు తెలిపారు.
లీకేజీ రాయుళ్లకు గట్టి హెచ్చరిక: మంత్రి నారా లోకేష్..
సోషల్ మీడియా వేదికగా స్పందించిన మంత్రి నారా లోకేష్, ఈ నూతన చట్టం విద్యార్థుల భవిష్యత్తుతో ఆడుకునే అక్రమార్కులకు గట్టి హెచ్చరికగా నిలుస్తుందని వ్యాఖ్యానించారు. పరీక్షల నిర్వహణలో పారదర్శకత, విశ్వసనీయతను కాపాడే దిశగా కేంద్ర ప్రభుత్వం తీసుకున్న ఇది అత్యంత కీలకమైన అడుగు అని అభిప్రాయపడ్డారు.
కఠిన శిక్షలు: ప్రశ్నపత్రాల లీకేజీలు, పరీక్షల మోసాలకు పాల్పడే సూత్రధారులు, పాత్రధారులపై ఇకపై ఊహించని రీతిలో చట్టపరమైన కఠిన చర్యలు తప్పవని స్పష్టం చేశారు.
వ్యవస్థాగత సంస్కరణలు: కేవలం చట్టాలే కాకుండా పరీక్షల నిర్వహణ వ్యవస్థను సంస్కరించేందుకు కేంద్రం నిర్మాణాత్మక చర్యలు చేపట్టిందన్నారు.
ప్రతిభకే ప్రాధాన్యం: యువత భవిష్యత్తు రాజకీయాలకు అతీతమని, విద్యార్థుల కష్టానికి తగిన ఫలితం దక్కాలని, ప్రతిభ మరియు సమాన అవకాశాలే ఎప్పుడూ గెలవాలని ఆకాంక్షించారు.
నీట్ (NEET) ప్రశ్నపత్రం లీకేజీ ఘటన వెలుగులోకి వచ్చిన వెంటనే ప్రధాని నరేంద్ర మోదీ నాయకత్వంలోని ప్రభుత్వం అత్యంత వేగంగా స్పందించిందని లోకేష్ గుర్తుచేశారు. బాధ్యులపై కఠిన చర్యలు తీసుకోవడమే కాకుండా, సకాలంలో మళ్లీ పరీక్షలను నిర్వహించి లక్షలాది మంది విద్యార్థుల విద్యా సంవత్సరం వృథా కాకుండా కాపాడటంలో ప్రభుత్వం బాధ్యతాయుతంగా వ్యవహరించిందని కొనియాడారు.
విద్యార్థుల ఆశయాలకు శ్రీరామరక్ష: డిప్యూటీ సీఎం పవన్ కళ్యాణ్..
ఈ చట్ట సవరణపై ఆంధ్రప్రదేశ్ ఉప ముఖ్యమంత్రి పవన్ కళ్యాణ్ కూడా స్పందించారు. ఈ బిల్లు దేశంలోని కోట్లాది మంది విద్యార్థుల కలలు, ఆశయాలను కాపాడేందుకు శ్రీరామరక్షగా నిలుస్తుందని చెప్పారు. జాతీయ స్థాయిలో నిర్వహించే పరీక్షలపై ప్రజల్లో, అభ్యర్థుల్లో విశ్వాసాన్ని మరింత బలోపేతం చేసే విధంగా ఈ నిర్ణయం ఉందని అభిప్రాయపడ్డారు.
జాతీయ పరీక్షల సంస్థ (NTA) ప్రక్రియల్లో సమగ్ర మార్పులు, సంస్కరణల కోసం ఐటీ దిగ్గజం నందన్ నీలేకని నేతృత్వంలో ఉన్నతస్థాయి టాస్క్ఫోర్స్ను కేంద్ర ప్రభుత్వం ఏర్పాటు చేయడం కూడా స్వాగతించదగిన పరిణామమని పవన్ కళ్యాణ్ పేర్కొన్నారు.
Be the first to react
