ఆ సర్వే లెక్కలకు జగన్ బెంబేలు! త్వరలో తాడేపల్లి ప్యాలెస్ ఖాళీ ఖాయం!
ఏపీలో జరగనున్న స్థానిక సంస్థల ఎన్నికలపై సీఎం చంద్రబాబు వద్ద ఉన్న తాజా సర్వే నివేదిక ప్రకారం అసెంబ్లీ ఎన్నికల కంటే కూటమికి మరింత ఆధిక్యం లభించనున్నట్లు స్పష్టమైంది. ఈ ఫలితాలతో వైసీపీ నాయకులు ఎన్నికల్లో పోటీ చేయడానికి, ఖర్చులు భరించడానికి వెనుకడుగు వేస్తున్నారు. బీసీ రిజర్వేషన్ల అంశంతో ఎన్నికలు వాయిదా వేయించాలని జగన్ ప్రయత్నిస్తున్నప్పటికీ, కేంద్ర నిధుల దృష్ట్యా ఎన్నికలు అనివార్యం కావడంతో విపక్షంలో తీవ్ర ఆందోళన నెలకొంది.
- స్థానిక సంస్థల ఎన్నికల వాయిదాకు జగన్ పాకులాట?: తెరవెనుక కారణాలపై విశ్లేషణ!
- బీసీ రిజర్వేషన్ల అంశంతో ఎన్నికలను అడ్డుకునే వ్యూహం: చివరకు బెడిసికొట్టక తప్పదా?!
- కేంద్ర నిధుల కోసం ఎన్నికలు అనివార్యం: ఎన్నికల సమరానికి సిద్ధమవుతున్న ప్రభుత్వం!
Andhrapradesh: ఆంధ్రప్రదేశ్లో రానున్న స్థానిక సంస్థల ఎన్నికలకు సంబంధించి ముఖ్యమంత్రి చంద్రబాబు నాయుడు నిర్వహించిన ఒక తాజా అంతర్గత సర్వే నివేదిక రాజకీయ వర్గాల్లో పెను ప్రకంపనలు సృష్టిస్తోంది. గత సార్వత్రిక అసెంబ్లీ ఎన్నికల్లో కూటమి సాధించిన అపూర్వ ఫలితాలను మించి, స్థానిక ఎన్నికల్లో మరింత ఎక్కువ శాతం ఓట్లతో కూటమి విజయం సాధించబోతోందని ఈ సర్వే లెక్కలు స్పష్టం చేస్తున్నాయి. ఈ సమాచారం బయటకు రావడంతో అటు ప్రతిపక్ష వైఎస్సార్ కాంగ్రెస్ పార్టీ వర్గాల్లో తీవ్ర కలవరం మొదలైనట్లు సమాచారం.
పోటీకి వెనుకంజ వేస్తున్న వైసీపీ నేతలు
తాజా పరిస్థితుల నేపథ్యంలో స్థానిక సంస్థల ఎన్నికల్లో పోటీ చేయడానికి వైసీపీ నేతలు, ముఖ్య నాయకులు తీవ్ర విముఖత చూపుతున్నారు. అసెంబ్లీ ఎన్నికల్లో ఘోర పరాజయం తర్వాత క్షేత్రస్థాయిలో పార్టీ పూర్తిగా నిస్తేజంలో మునిగిపోయింది. రాష్ట్రంలోని అధిక శాతం నియోజకవర్గాల్లో పార్టీ నాయకులు పూర్తిగా కాడి కిందపడేసి ప్రజల మధ్యకు వెళ్లడానికే జంకుతున్నారు. దీనికి తోడు ఈ ఎన్నికల్లో ఖర్చులకు అయ్యే సొమ్ము ఎవరిస్తారంటూ నియోజకవర్గ నేతలు నేరుగా అధిష్టానాన్నే ప్రశ్నించే పరిస్థితి ఏర్పడింది.
టికెట్ల అల్టిమేటం పనిచేయని వైనం
స్థానిక ఎన్నికల్లో గెలుపు ఓటముల ఆధారంగానే వచ్చే అసెంబ్లీ ఎన్నికల్లో టికెట్లు కేటాయిస్తామని పార్టీ అధినేత జగన్మోహన్ రెడ్డి హెచ్చరికలు జారీ చేసినప్పటికీ, గ్రౌండ్ లెవెల్లో నాయకులు ఏమాత్రం స్పందించడం లేదని తెలుస్తోంది. ఇప్పటికే అధికారం కోల్పోయి ఆర్థికంగా, రాజకీయంగా ఇబ్బందుల్లో ఉన్న ద్వితీయ శ్రేణి నాయకులు, ఫలితం ప్రతికూలంగా ఉంటుందని తెలిసీ తాము జేబుల నుంచి నిధులు ఖర్చు చేసి బలిపశువులు కాలేమని బహిరంగంగానే తేల్చిచెబుతున్నారు.
ఎన్నికలను వాయిదా వేయించేందుకు వ్యూహాలు?
స్థానిక సమరంలో తలపడితే తమ బలం మరింతగా బయటపడుతుందని, అది పార్టీ ఉనికికే ప్రమాదకరంగా మారుతుందని భావిస్తున్న వైసీపీ నాయకత్వం ఎన్నికలను వాయిదా వేయించే ప్రయత్నాలు చేస్తోందన్న వాదనలు వినిపిస్తున్నాయి. బీసీ రిజర్వేషన్ల శాతం తగ్గింపు అంశాన్ని ముందుకు తెచ్చి, న్యాయపరమైన చిక్కులు సృష్టించడం ద్వారా ఎన్నికల ప్రక్రియను వీలైనంత కాలం ముందుకు నెట్టాలని ప్రయత్నిస్తున్నట్లు వార్తలు వస్తున్నాయి. అయితే పార్టీ ఇంటర్నల్గానైనా బీసీలకు ప్రాధాన్యం ఇచ్చే వెసులుబాటు ఉన్నప్పటికీ, ఎన్నికలను ఆపడమే ప్రధాన ధ్యేయంగా అడుగులు వేస్తున్నారని పరిశీలకులు భావిస్తున్నారు.
ఎన్నికల నిర్వహణ అనివార్యం – కూటమి జోరు
ఎన్నికలను వాయిదా వేయించాలని ఎన్ని ఎత్తుగడలు వేసినప్పటికీ, స్థానిక ఎన్నికల నిర్వహణ అనివార్యమని స్పష్టమవుతోంది. స్థానిక సంస్థల ఎన్నికలు జరగకపోతే కేంద్ర ప్రభుత్వం నుంచి రావాల్సిన పంచాయతీ నిధులు ఆగిపోయే ప్రమాదం ఉండటంతో ప్రభుత్వం పక్కా కార్యాచరణతో ముందుకు సాగుతోంది. అక్రమ ఏకగ్రీవాలు, దౌర్జన్యాలు లేకుండా పారదర్శకంగా ఎన్నికలు జరిగితే విపక్షం మరింతగా కొట్టుకుపోవడం ఖాయమనే సర్వే ఫలితాలు తేల్చడంతో, కూటమి పూర్తి ఆత్మవిశ్వాసంతో సమరానికి సిద్ధమవుతోంది.
Be the first to react
