Kesineni Chinni: విజయవాడ ఎంపీ మాస్టర్ ప్లాన్: అమృత్ భారత్ నిధులు, కొత్త కనెక్టివిటీయే లక్ష్యంగా కేశినేని చిన్ని స్పీడ్!

• విజయవాడతో పాటు చుట్టుపక్కల ప్రాంతాల్లో పెండింగ్‌లో ఉన్న ప్రాజెక్టులపై చర్చ..
  
  
• Politics: 8 కొత్త రైల్వే ఓవర్ బ్రిడ్జిల నిర్మాణం చేపట్టాలని కోరామని వెల్లడి..

Kesineni Chinni: విజయవాడ పార్లమెంట్ నియోజకవర్గ పరిధిలోని రైల్వే మౌలిక సదుపాయాల సమగ్ర అభివృద్ధి, సుదీర్ఘకాలంగా పెండింగ్‌లో ఉన్న రవాణా సమస్యల పరిష్కారమే లక్ష్యంగా విజయవాడ ఎంపీ కేశినేని చిన్ని ప్రత్యేక కార్యాచరణతో ముందుకు సాగుతున్నారు. దక్షిణ కోస్తా రైల్వే జనరల్ మేనేజర్ (GM) మాథుర్‌ను శనివారం ప్రత్యేకంగా కలిసిన ఎంపీ, నగరం మరియు పరిసర ప్రాంతాల్లో నిలిచిపోయిన పలు ప్రాధాన్యత కలిగిన రైల్వే ప్రాజెక్టులపై విస్తృతంగా చర్చించారు.

భేటీ అనంతరం ఎంపీ కేశినేని చిన్ని మీడియాతో మాట్లాడుతూ.. విజయవాడ ప్రజలు నిత్యం ఎదుర్కొంటున్న తీవ్ర ట్రాఫిక్ సమస్యలను తొలగించేందుకు, కనెక్టివిటీని పెంచే కొత్త రైల్వే లైన్లను అందుబాటులోకి తెచ్చేందుకు అధికారులకు పలు ప్రతిపాదనలు సమర్పించినట్లు వెల్లడించారు. 

కొండపల్లికి 'అమృత్ భారత్' వైభవం.. 8 కొత్త ఆర్‌ఓబీల ప్రతిపాదన..
చారిత్రక మరియు పారిశ్రామికంగా ఎంతో ప్రాధాన్యత కలిగిన కొండపల్లి ప్రాంతాన్ని అంతర్జాతీయ స్థాయి సదుపాయాలతో తీర్చిదిద్దాలని ఎంపీ కోరారు.

అమృత్ భారత్ పథకం: కొండపల్లి రైల్వే స్టేషన్‌ను కేంద్ర ప్రభుత్వ 'అమృత్ భారత్ స్టేషన్' పథకం కింద ఎంపిక చేసి, పూర్తిస్థాయిలో ఆధునికీకరించాలని జీఎంను కోరినట్లు తెలిపారు.

8 కొత్త ROBల నిర్మాణం: విజయవాడ నగరంలో రోజురోజుకూ పెరుగుతున్న వాహనాల రద్దీకి శాశ్వత పరిష్కారంగా వేర్వేరు కీలక ప్రాంతాల్లో 8 కొత్త రైల్వే ఓవర్ బ్రిడ్జిల (ROB) నిర్మాణం అత్యవసరమని ప్రతిపాదించారు.

ఎర్రకట్ట, గుణదల సమస్యలు: విజయవాడ వెస్ట్, సెంట్రల్ నియోజకవర్గాల ప్రజలకు అత్యంత కీలకమైన ఎర్రకట్ట వంతెన నిర్మాణంతో పాటు, గుణదల వద్ద నిత్యం వాహనదారులను ఇబ్బంది పెడుతున్న LC-8 లెవల్ క్రాసింగ్ సమస్యను త్వరితగతిన పరిష్కరించాల్సిన అవసరాన్ని అధికారులకు వివరించారు.

విజయవాడ-బెంగళూరు నేరుగా కొత్త రైల్వే లైన్
విజయవాడ జంక్షన్ రైల్వే స్టేషన్ ఆధునికీకరణ పనుల కోసం గతంలో టెండర్లు పిలిచినా సాంకేతిక కారణాల వల్ల కాంట్రాక్టర్లు ముందుకు రాలేదని ఎంపీ కేశినేని చిన్ని గుర్తుచేశారు.

ఎంపీ కేశినేని చిన్ని కీలక ప్రకటన:
"విజయవాడ స్టేషన్ రీ-డెవలప్‌మెంట్ నిధుల మంజూరుపై త్వరలోనే ఆంధ్రప్రదేశ్ ఎంపీలమంతా కలిసి కేంద్ర రైల్వే మంత్రిని వ్యక్తిగతంగా కలుస్తాం. అమృత్ భారత్ కింద నిధులు వేగంగా విడుదలయ్యేలా చర్యలు తీసుకుంటాం. దీనికితోడు విజయవాడ నుంచి గుత్తి మీదుగా బెంగళూరుకు నేరుగా కొత్త రైల్వే లైన్‌ను ఏర్పాటు చేయాలని కేంద్ర రైల్వే శాఖను కోరనున్నాం."

ఈ ప్రతిపాదిత విజయవాడ-బెంగళూరు రైల్వే లైన్ అందుబాటులోకి వస్తే ఐటీ, వ్యాపార రంగాలకు చెందిన ప్యాసింజర్లకు ప్రయాణ సమయం గణనీయంగా తగ్గడమే కాకుండా దక్షిన కోస్తా సరుకు రవాణాలోనూ విప్లవాత్మక మార్పులు వస్తాయని భావిస్తున్నారు.