అమెరికాలో స్థిరపడాలనే కలలు కనే వేలాది మంది భారతీయ టెక్ ఉద్యోగులకు గూగుల్ (Google) సంస్థ ఒక అద్భుతమైన వార్త చెప్పింది. గత కొంతకాలంగా నిలిచిపోయిన 'గ్రీన్ కార్డ్ స్పాన్సర్షిప్' ప్రక్రియను వచ్చే ఏడాది (2026) నుండి వేగవంతం చేయనున్నట్లు గూగుల్ తన అంతర్గత మెమోలో వెల్లడించింది.
ముఖ్యంగా హెచ్-1బీ (H-1B) వీసాలపై ఉండి, శాశ్వత నివాసం (Permanent Residency) కోసం ఏళ్ల తరబడి ఎదురుచూస్తున్న వారికి ఇది పెద్ద ఊరట. అమెరికా ఉపాధి ఆధారిత గ్రీన్ కార్డుల జారీ ప్రక్రియలో 'ప్రోగ్రామ్ ఎలక్ట్రానిక్ రివ్యూ మేనేజ్మెంట్ (PERM)'ది కీలక పాత్ర.
దీన్ని టెక్ కంపెనీలు ఎక్కువగా వినియోగిస్తాయి. తమ సంస్థల్లో పనిచేసే ఉద్యోగులకు శాశ్వత నివాసం దక్కేలా సాయం చేస్తుంటాయి. PERM ఆమోదం లభించిన తర్వాతే సదరు ఉద్యోగి తన గ్రీన్ కార్డు ప్రక్రియలో ముందుకెళ్లేందుకు అవకాశం లభిస్తుంది.
అయితే, ఇందుకు చాలా షరతులు ఉంటాయి. సంబంధిత విదేశీ ఉద్యోగిని నియమించుకోవడం వల్ల అమెరికా వర్కర్లపై ఎలాంటి ప్రతికూల ప్రభావం ఉండదని కంపెనీలు నిరూపించాల్సి ఉంటుంది.
అంతేకాదు.. ఆ ఉద్యోగానికి అర్హత కలిగిన అమెరికన్లు అందుబాటులో లేరని రుజువు చేయాలి. దీనివల్లే చాలా కంపెనీలు లేఆఫ్లు లేదా నియామకాలు నెమ్మదించిన సమయంలో PERM దరఖాస్తులకు సంబంధించి జాగ్రత్తగా వ్యవహరిస్తుంటాయి.
లేఆఫ్ లు ఎక్కువగా ఉన్న సమయంలో విదేశీ ఉద్యోగులకు PERM నిబంధనల ప్రకారం స్పాన్సర్షిప్ ఇవ్వడాన్ని సమర్థించుకోవడం కంపెనీలకు కష్టతరంగా మారుతుంది. 2023 జనవరిలో గూగుల్ ప్రపంచవ్యాప్తంగా 12వేల మందికి పైగా ఉద్యోగులను తొలగించింది. ఆ సమయంలో PERM దరఖాస్తు ప్రక్రియను నిలిపివేసింది.
ఆ ఏడాది అమెజాన్, మెటా వంటి సంస్థలు కూడా ఇదేవిధంగా వ్యవహరించాయి. గత ఏడాదిలో గూగుల్ చాలా స్వల్ప సంఖ్యలో PERM దరఖాస్తులను ఫైల్ చేసింది. అయితే, 2026 నుంచి ఈ ప్రోగ్రామ్ను వేగవంతం చేయాలని గూగుల్ భావిస్తోంది. అయితే, గూగుల్లో పనిచేసే ప్రతి విదేశీ ఉద్యోగి ఈ PERMకు అర్హత సాధించలేరు. ఇందుకు కంపెనీ కొన్ని షరతులు విధించింది.
డిగ్రీతో పాటు పని అనుభవాన్ని కూడా పరిగణలోకి తీసుకుంటారు. ఇక, గూగుల్ ఆఫీసులకు వచ్చి పనిచేసే ఉద్యోగులకే ఈ ప్రోగ్రామ్ వర్తిస్తుంది. రిమోట్గా ఉండి పనిచేసే వారిని PERM అర్హతకు పరిగణించాలంటే వారు కచ్చితంగా తమ నివాస ప్రదేశాన్ని మార్చుకోవాల్సి ఉంటుంది. సీనియార్టీ, పనితీరు కూడా ఇక్కడ కీలక పాత్ర పోషిస్తుందని గూగుల్ తమ మెమోలో పేర్కొన్నట్లు సమాచారం.
భారతీయ ఐటీ నిపుణులు అమెరికాలో దశాబ్దాల తరబడి గ్రీన్ కార్డ్ కోసం వేచి చూస్తుంటారు. గూగుల్ వంటి పెద్ద కంపెనీ PERM ప్రక్రియను వేగవంతం చేయడం వల్ల, ఇతర కంపెనీలు కూడా అదే బాటలో నడిచే అవకాశం ఉంది. ఇది గూగుల్ ఉద్యోగులకే కాకుండా, మొత్తం హెచ్-1బీ కమ్యూనిటీకి ఒక సానుకూల సంకేతం.
