బంగారం, వెండి ధరల్లో ఒక్కసారిగా ఊహించని భారీ మార్పు కనిపించింది. కొద్ది రోజులుగా ధరలు స్థిరంగా ట్రేడవుతున్నప్పటికీ, ఒక్కరోజులోనే పరిస్థితి పూర్తిగా మారిపోయింది. దేశీయంగా, అంతర్జాతీయంగా బంగారం–వెండి రేట్లు ఒక్కసారిగా పెరిగి సరికొత్త ఆల్టైమ్ గరిష్ఠ స్థాయిలను తాకాయి. దీంతో పెట్టుబడిదారులు, కొనుగోలుదారుల మధ్య ఆసక్తి మరింత పెరిగింది.
భారతీయుల జీవితంలో బంగారానికి ప్రత్యేకమైన స్థానం ఉంది. ముఖ్యంగా మహిళలు పండుగలు, పెళ్లిళ్లు, శుభకార్యాల సమయంలో బంగారు ఆభరణాలు ధరించడాన్ని ఎంతో ప్రాధాన్యతగా భావిస్తారు. బంగారం కేవలం ఆభరణం మాత్రమే కాకుండా, కుటుంబ గౌరవం, సామాజిక హోదాకు ప్రతీకగా కూడా పరిగణిస్తారు. ఆడపిల్ల పెళ్లి సమయంలో తల్లిదండ్రులు బంగారం ఇచ్చే సంప్రదాయం భారతదేశంలో తరతరాలుగా కొనసాగుతోంది.
ఇటీవల కాలంలో బంగారం ఒక సురక్షిత పెట్టుబడి సాధనంగా మారింది. అంతర్జాతీయ రాజకీయ, ఆర్థిక అనిశ్చితుల కారణంగా పెట్టుబడిదారులు బంగారంపై ఎక్కువగా దృష్టి పెట్టారు. దీనికితోడు అమెరికా ఫెడరల్ రిజర్వ్ భవిష్యత్తులో వడ్డీ రేట్లు తగ్గించే అవకాశాలు ఉన్నాయన్న సంకేతాలు ఇవ్వడంతో, బంగారం ధర ఒక్కసారిగా ఎగబాకింది. ఈ ఏడాది ఇప్పటివరకు బంగారం ధర దాదాపు 70 శాతం వరకు పెరగడం ఆందోళన కలిగిస్తోంది.
దేశీయ మార్కెట్లో చూస్తే హైదరాబాద్లో 22 క్యారెట్ల బంగారం ధర తులానికి రూ.1,800 పెరిగి రూ.1,24,800కు చేరింది. ఇదే ఇప్పటివరకు ఉన్న అత్యధిక ధర. అలాగే 24 క్యారెట్ల పసిడి ధర 10 గ్రాములకు రూ.1,970 పెరిగి రూ.1,36,150గా నమోదైంది. రెండు రోజుల పాటు స్థిరంగా ఉన్న ధరలు ఒక్కసారిగా ఇలా పెరగడం గమనార్హం.
బంగారంతో పాటు వెండి ధరలు కూడా మరింత వేగంగా పెరుగుతున్నాయి. ఈ ఏడాది ఇప్పటివరకు వెండి ధరలు 130 శాతం కంటే ఎక్కువగా పెరిగాయి. హైదరాబాద్లో కిలో వెండి ధర ఒక్కరోజులో రూ.5,000 పెరిగి రూ.2.31 లక్షలకు చేరింది. అంతర్జాతీయ మార్కెట్లో స్పాట్ గోల్డ్ ఔన్సుకు దాదాపు 4,500 డాలర్లకు, వెండి 70 డాలర్లకు చేరువైంది. అంతర్జాతీయ మార్కెట్ల ప్రభావంతోనే దేశీయంగా కూడా బంగారం, వెండి ధరల్లో ఇలాంటి భారీ మార్పులు కనిపిస్తున్నాయి.
