సింహాచలం అప్పన్న స్వామి భక్తులకు ఆలయ అధికారులు కీలక సమాచారం అందించారు. జనవరి 30న ముక్కోటి ఏకాదశి పర్వదినాన్ని పురస్కరించుకుని సింహాచలం శ్రీ వరాహ లక్ష్మీ నరసింహ స్వామి ఆలయంలో ఉత్తర ద్వార దర్శనాలను నిర్వహించనున్నట్లు ఈవో ఎన్.సుజాత వెల్లడించారు. ఈ ప్రత్యేక దర్శనానికి భక్తుల నుంచి భారీ స్పందన ఉండనున్న నేపథ్యంలో, ఆలయ యాజమాన్యం ముందస్తు ఏర్పాట్లు చేపట్టింది. భక్తులు క్రమబద్ధంగా దర్శనం చేసుకునేలా ఆన్లైన్ టికెట్ విధానాన్ని అమలు చేస్తున్నట్లు తెలిపారు.
ముక్కోటి ఏకాదశి రోజున ఉత్తర ద్వార దర్శనానికి భక్తులకు రూ.100, రూ.300, రూ.500 ధరలలో ప్రత్యేక దర్శన టికెట్లు అందుబాటులో ఉంచనున్నట్లు అధికారులు స్పష్టం చేశారు. ఈ టికెట్లను జనవరి 26 నుంచి 29వ తేదీ వరకు ప్రతిరోజూ సాయంత్రం 5 గంటల వరకూ కొనుగోలు చేసుకునే అవకాశం కల్పించారు. దర్శన టికెట్ల కోసం భక్తులు తప్పనిసరిగా ఆన్లైన్ విధానాన్నే అనుసరించాలని సూచించారు. నేరుగా ఆలయ కౌంటర్ల వద్ద టికెట్లు జారీ చేయబోమని, భక్తులు దళారులను ఆశ్రయించి మోసపోకూడదని ఆలయ అధికారులు హెచ్చరించారు.
ఉత్తర ద్వార దర్శన టికెట్లను www.aptemples.ap.gov.in అనే అధికారిక వెబ్సైట్ ద్వారా లేదా ‘మనమిత్ర’ వాట్సాప్ నంబర్ 9552300009 ద్వారా మాత్రమే పొందాలని తెలిపారు. ఉత్తర ద్వార దర్శనాలు పూర్తయిన అనంతరం, అదే రోజు ఉదయం 11 గంటల నుంచి సాధారణ రోజువారీ దర్శన టికెట్లు అందుబాటులోకి వస్తాయని పేర్కొన్నారు. ఆ టికెట్లను భక్తులు కౌంటర్ల వద్ద గానీ, ఆన్లైన్లో గానీ కొనుగోలు చేయవచ్చని వెల్లడించారు. ఈ విధానం వల్ల దర్శనాల్లో రద్దీ తగ్గి, భక్తులకు మరింత సౌకర్యవంతంగా ఉంటుందని అధికారులు అభిప్రాయపడ్డారు.
ఇక మరోవైపు, సింహాచలం అప్పన్న స్వామి ఆలయంలో జరుగుతున్న అధ్యయనోత్సవాలు భక్తిశ్రద్ధలతో వైభవంగా కొనసాగుతున్నాయి. ఈ ఉత్సవాల్లో భాగంగా అయ్యవారి సేవ, అమ్మవారి సేవలు అత్యంత ఘనంగా నిర్వహించారు. శ్రీదేవి, భూదేవి సమేత గోవిందరాజ స్వామిని అర్చకులు పట్టు వస్త్రాలు, విలువైన ఆభరణాలతో సుందరంగా అలంకరించారు. అనంతరం స్వామివారిని బంగారు తొళక్కియాన్ పల్లకిలో ఊరేగింపుగా ఆలయ బేడామండపం వరకు తీసుకెళ్లారు. వేద మంత్రోచ్చారణలు, నాదస్వరాల మధ్య జరిగిన ఈ ఊరేగింపు భక్తులను విశేషంగా ఆకట్టుకుంది. ఆండాళ్ సన్నిధి వద్ద స్వామి, అమ్మవార్లు పూలదండలు మార్చుకుని తాంబూల స్వీకారం చేశారు. ధనుర్మాసోత్సవాల్లో భాగంగా తిరుప్పావై పాశురాల పారాయణం కూడా నిర్వహించారు. ఉత్తరాది రాష్ట్రాల నుంచి వచ్చిన భక్తులు కూడా ఈ ఉత్సవాల్లో పాల్గొని, స్వామివారిని నృత్యాలతో ఆరాధించడం విశేషంగా కనిపించింది.
