హెరిటేజ్ ఫుడ్స్ ఎగ్జిక్యూటివ్ డైరెక్టర్ నారా బ్రాహ్మణి మరోసారి తన ప్రతిభను నిరూపించుకున్నారు. ప్రముఖ బిజినెస్ మ్యాగజైన్ ‘బిజినెస్ టుడే’ నుంచి ప్రతిష్టాత్మక అవార్డు దక్కించుకోవడంతో ఆమెపై ప్రశంసల వర్షం కురుస్తోంది. ఈ నేపథ్యంలో మంత్రి నారా లోకేశ్ తన భార్య బ్రాహ్మణిపై భావోద్వేగపూరితంగా స్పందించారు. “భర్తగా ఈ క్షణం నాకు ఎంతో గర్వంగా ఉంది” అంటూ సోషల్ మీడియాలో పోస్ట్ చేశారు. ఆమె సాధించిన ఈ గౌరవం కేవలం వ్యక్తిగత విజయం మాత్రమే కాదని, మహిళా నాయకత్వానికి దక్కిన గుర్తింపుగా అభివర్ణించారు.
లోకేశ్ తన పోస్టులో బ్రాహ్మణి నాయకత్వ శైలిని ప్రత్యేకంగా ప్రస్తావించారు. ఆమె ఎప్పుడూ హడావుడి చేయకుండా, నిశ్శబ్దంగా పని చేస్తూ ఫలితాలు సాధిస్తారని కొనియాడారు. మాటల కంటే పనితోనే తన సామర్థ్యాన్ని చూపించే వ్యక్తిత్వం ఆమెదని చెప్పారు. వ్యాపార రంగంలో అనేక సవాళ్లు ఎదురైనా, దృఢ సంకల్పంతో ముందుకు సాగుతూ హెరిటేజ్ ఫుడ్స్ సంస్థను మరింత బలోపేతం చేయడంలో బ్రాహ్మణి కీలక పాత్ర పోషిస్తున్నారని తెలిపారు.
హెరిటేజ్ ఫుడ్స్లో ఆమె చేపట్టిన పలు సంస్కరణలు, వ్యూహాత్మక నిర్ణయాలు కంపెనీ వృద్ధికి దోహదపడుతున్నాయని వ్యాపార వర్గాలు చెబుతున్నాయి. ఉత్పత్తుల నాణ్యత, రైతులతో నేరుగా అనుసంధానం, ఆధునిక సాంకేతికత వినియోగం వంటి అంశాల్లో ఆమె ప్రత్యేక దృష్టి సారించారని సమాచారం. ముఖ్యంగా మహిళలకు ఉపాధి అవకాశాలు కల్పించడంలోనూ ఆమె చురుకైన పాత్ర పోషించారని ప్రశంసలు అందుతున్నాయి.
ఈ అవార్డు గురించి లోకేశ్ స్పందిస్తూ, “బ్రాహ్మణి ఎప్పుడూ ప్రశంసల కోసం పని చేయలేదు. బాధ్యతను ఒక ధర్మంగా భావించి తన పని తాను చేసుకుంటూ పోతుంది. అందుకే ఈ అవార్డు ఆమెకు దక్కిన సరైన గుర్తింపు” అని పేర్కొన్నారు. కుటుంబానికి, సంస్థకు, సమాజానికి సమాన ప్రాధాన్యం ఇస్తూ ముందుకు సాగుతున్న ఆమె ప్రయాణం ఎంతో మందికి స్ఫూర్తిదాయకమని అన్నారు.
నారా బ్రాహ్మణికి వచ్చిన ఈ అవార్డు నేపథ్యంలో రాజకీయ, వ్యాపార, సామాజిక వర్గాల నుంచి శుభాకాంక్షలు వెల్లువెత్తుతున్నాయి. మహిళలు కార్పొరేట్ రంగంలో ఉన్నత స్థానాలు అధిరోహించగలరనే విషయానికి ఆమె ఉదాహరణగా నిలుస్తున్నారని పలువురు వ్యాఖ్యానిస్తున్నారు.
