అమెరికాలో కొనసాగుతున్న వలసదారులపై కఠిన చర్యలు ఇప్పుడు అనేక కుటుంబాల జీవితాలను తీవ్రంగా ప్రభావితం చేస్తున్నాయి. ముఖ్యంగా తల్లిదండ్రులు అరెస్టు కావడంతో, చిన్న వయసులోనే బాధ్యతలు భుజాలపై వేసుకోవాల్సిన పరిస్థితి అనేక మంది టీనేజర్లకు ఎదురవుతోంది. నేను ఇంకా సిద్ధంగా లేను అని చెబుతున్న పిల్లల మాటలు, అక్కడ నెలకొన్న పరిస్థితుల తీవ్రతను అద్దం పడుతున్నాయి.
లూసియానా రాష్ట్రంలోని న్యూ ఆర్లియన్స్ సమీపంలోని కెన్నర్ ప్రాంతంలో ఈ పరిస్థితి మరింత స్పష్టంగా కనిపిస్తోంది. ఇటీవల ఫెడరల్ ఇమ్మిగ్రేషన్ అధికారులు చేపట్టిన ప్రత్యేక ఆపరేషన్లో వందలాది మందిని అరెస్టు చేశారు. అధికారిక లెక్కల ప్రకారం, ఈ నెలలోనే దక్షిణ లూసియానా ప్రాంతంలో 250 మందికిపైగా వలసదారులు అదుపులోకి తీసుకోబడ్డారు. ఈ చర్యలు కేవలం నేరస్తులపైనే అని ప్రభుత్వం చెబుతున్నా, అరెస్టైన వారిలో చాలా మందికి ఎలాంటి క్రిమినల్ రికార్డు లేదని మానవ హక్కుల సంఘాలు వాదిస్తున్నాయి.
ఈ చర్యల వల్ల కుటుంబాల్లో తీవ్ర కలకలం ఏర్పడింది. 38 ఏళ్ల విల్మా క్రూజ్ అనే హోండురాస్కు చెందిన మహిళ ఉదాహరణగా నిలుస్తుంది. కొత్తగా అద్దెకు తీసుకున్న ఇంటికి చేరుకున్న సమయంలోనే ఆమెను అధికారులు అరెస్టు చేశారు. కేవలం ఒక ఫోన్ కాల్ చేయడానికి మాత్రమే అవకాశం ఇచ్చిన అధికారులు, అనంతరం కారు అద్దాన్ని పగలగొట్టి ఆమెను అదుపులోకి తీసుకున్నారు. ఆ ఘటనతో ఆమె కుటుంబ జీవితం ఒక్కసారిగా తలకిందులైంది.
విల్మా క్రూజ్ అరెస్టుతో ఆమె 18 ఏళ్ల కుమారుడు జోనాథన్ ఎస్కలాంటే ఒక్కసారిగా ఇంటి పెద్దగా మారాడు. అమెరికా పౌరుడైన అతడు, ఇటీవలే స్కూల్ పూర్తి చేశాడు. కానీ ఇప్పుడు అతడి ముందు చదువుకన్నా పెద్ద సమస్యలు నిలిచాయి. తొమ్మిది ఏళ్ల వయసున్న వికలాంగ చెల్లిని చూసుకోవడం, తల్లి బ్యాంక్ ఖాతాలు, వైద్య పత్రాలు, ఇంటి ఖర్చులు అన్నీ అతడే చూసుకోవాల్సి వస్తోంది. “నేను ఇంకా ఈ బాధ్యతలకు సిద్ధంగా లేను. కానీ తప్పనిసరిగా తీసుకోవాల్సి వస్తుంది” అని అతడు చెప్పిన మాటలు, ఆ యువకుడి మనస్థితిని స్పష్టంగా చూపుతున్నాయి.
ఇలాంటి కథలు ఒక్కటే కాదు మరోవైపు హోసే రేయెస్ అనే నిర్మాణ కార్మికుడిని కూడా అధికారులు అరెస్టు చేశారు. ఇంటి అద్దె చెల్లించేందుకు బయటకు వెళ్లిన సమయంలోనే అతడిని అదుపులోకి తీసుకున్నారు. ఆ సమయంలో అతడి పిల్లలు ఏడుస్తూ వేడుకున్న దృశ్యాలు అందరినీ కదిలించాయి. కుటుంబానికి ప్రధాన ఆదాయ వనరైన తండ్రి దూరమవడంతో, ఇప్పుడు అతడి పెద్ద కూతురు చిన్నచిన్న పనులు చేస్తూ కుటుంబాన్ని నెట్టుకొస్తుంది.
ఈ అరెస్టుల నేపథ్యంలో వలసదారుల పిల్లలు ప్రతిరోజూ భయంతో స్కూల్కు వెళ్తున్నారని స్థానిక వ్యాపార సంఘాల ప్రతినిధులు చెబుతున్నారు. “ఈ రోజు స్కూల్కి వెళ్లి తిరిగి వచ్చేసరికి తల్లిదండ్రులు ఇంట్లో ఉంటారా లేదా అనే అనిశ్చితి పిల్లలను మానసికంగా దెబ్బతీస్తోంది” అని వారు ఆవేదన వ్యక్తం చేస్తున్నారు.
ఇమ్మిగ్రేషన్ చర్యలపై రాజకీయంగా కూడా భిన్నాభిప్రాయాలు వ్యక్తమవుతున్నాయి. కొంతమంది నేతలు ఇవి ప్రాంతీయ ఆర్థిక వ్యవస్థపై ప్రతికూల ప్రభావం చూపుతున్నాయని అంటున్నారు. వలస కార్మికులు పనులకు రాకపోవడంతో కార్మిక లోటు ఏర్పడుతోందని వారు హెచ్చరిస్తున్నారు. మరోవైపు పోలీసు అధికారులు మాత్రం ఈ చర్యలతో భద్రత పెరుగుతుందని వాదిస్తున్నారు.
ఏది ఏమైనా ఈ కఠిన చర్యల మధ్యలో నలిగిపోతున్నది మాత్రం పిల్లలే. చిన్న వయసులోనే పెద్దల బాధ్యతలు మోస్తూ, కుటుంబాన్ని నిలబెట్టే ప్రయత్నం చేస్తున్న ఈ టీనేజర్ల కథలు, అమెరికాలోని వలస విధానాల మానవ కోణాన్ని మరోసారి గుర్తు చేస్తున్నాయి.
