ఆంధ్రప్రదేశ్‌లో రియల్ ఎస్టేట్ రంగం మళ్లీ చైతన్యం సంతరించుకుంటోంది. గత కొన్నేళ్లుగా స్తబ్దుగా ఉన్న ఈ రంగం ఇప్పుడు క్రమంగా పుంజుకుంటోందని నిపుణులు అంటున్నారు. రాష్ట్రవ్యాప్తంగా భూసంవహనాలు పెరిగినట్లు గణాంకాలు చెబుతున్నాయి. కొనుగోలుదారులు మళ్లీ పెట్టుబడులు పెట్టేందుకు ఆసక్తి చూపుతుండటం, స్టాంపులు & రిజిస్ట్రేషన్ల ఆదాయం గణనీయంగా పెరగడం ఈ రంగం పునరుద్ధరణకు సంకేతమని విశ్లేషకులు చెప్తున్నారు.
2025–26 ఆర్థిక సంవత్సరం తొలి త్రైమాసికంలో, గతేడాది అదే కాలంతో పోల్చితే, స్టాంపులు, రిజిస్ట్రేషన్ల ద్వారా వచ్చిన ఆదాయం 46% పెరిగింది. వృద్ధి రేటు కూడా 39% గా నమోదైంది. ఇది రియల్ ఎస్టేట్ రంగం తిరిగి బలపడుతోందనడానికి స్పష్టమైన సూచికగా భావిస్తున్నారు.
రాజధాని అమరావతిలో సుమారు రూ.50 వేల కోట్ల విలువైన పనులు ప్రారంభమవడంతో ఇన్వెస్టర్లలో విశ్వాసం పెరిగింది. ఇంతకాలం ఎదురుచూస్తున్న పెట్టుబడిదారులు మళ్లీ అమరావతిపై దృష్టి పెట్టారు. ముఖ్యంగా కృష్ణా, గుంటూరు, పల్నాడు జిల్లాలలో లావాదేవీలు అధికంగా జరుగుతున్నాయి. దీంతో "అమరావతి రియల్ ఎస్టేట్ రంగానికి ఇంధనం అందిస్తోంది" అనే అభిప్రాయాలు వ్యక్తమవుతున్నాయి.
అదే సమయంలో, 2024 ఎన్నికల ఫలితాల తర్వాత అమరావతి భూముల ధరలు ఎగిసిపోవడంతో కొంత కాలం లావాదేవీలు మందగించాయి. అయితే ప్రస్తుతం పెట్టుబడిదారులు, డెవలపర్లు అందుబాటులో ఉన్న ధరలు కలిగిన ప్రాంతాలను ఎక్కువగా పరిశీలిస్తున్నారు. గుంటూరు, నెల్లూరు, తిరుపతి, విశాఖపట్నం, కర్నూలు వంటి పట్టణాలతో పాటు గ్రామీణ ప్రాంతాల్లో కూడా డిమాండ్ పెరుగుతోందని రియల్టర్లు చెప్తున్నారు.
ప్రభుత్వం ప్రకటించిన కొత్త ప్రాజెక్టులు, అనుమతుల విషయంలో సడలింపులు, భూముల కన్వర్షన్ ఫీజులను రద్దు చేసే నిర్ణయం తీసుకుంటే లావాదేవీలు మరింత ఉత్సాహంగా సాగుతాయని నిపుణుల అంచనా.
