ప్రియమైన ఆంధ్రప్రవాసి పాఠక భక్తులారా,
సాక్షాత్తు వ్యాస భగవానుని కృపా ప్రసాదంతో, గీతామాత ఆరాధనకు మనకు లభించిన ఈ పవిత్ర అవకాశాన్ని మీతో పంచుకోవడం ఆనందకరమైన కర్తవ్యంగా భావిస్తున్నాం..
సాక్షాత్తు భగవంతుని వ్యక్తస్వరూపము, మూర్తి స్వరూపమైన శ్రీమద్భగవద్గీత మానవాళికి అందిన రోజు గీతా జయంతి రోజు. డిసెంబర్ ఒకటవ తేదీకి గీతా జయంతి వస్తుంది. ఈ గీతా జయంతి సందర్భంగా, పూజ్య శ్రీ గురుదేవుల ఆశీస్సులతో శ్రీమద్భగవద్గీత అష్టోత్తర శతనామావళిలోని ఈరోజు 9వ రోజు నామాన్ని మీ ముందుకు తీసుకొస్తున్నాము.
ప్రతి నామం వెనుక ఉన్న అర్థం, ఆధ్యాత్మికత, భక్తి సారాన్ని తెలుసుకొని మనం గీతామాతను మరింతగా ఆరాధించుకుందాం. ఈ పవిత్ర ప్రయత్నంలో భాగంగా, ఆంధ్రప్రవాసి Devotional విభాగంలో ప్రతి రోజు ఒక నామాన్ని మీకు అందజేస్తూ, మన గీతామాత కరుణకు అంజలి ఘటిస్తున్నాము.
ఓం వ్యాసదేవాయ నమః
పూజ్యశ్రీ భవఘ్నీ గురుదేవుల వారి అనుగ్రహం తో
శ్రీమద్భగవద్గీత అష్టోత్తరశత నామావళి
9. ఓం శాంతి స్వరూపిణ్యై నమః
నాస్తి బుద్ధి రయుక్తస్య న చాయుక్తస్య భావనా ।
న చాభావయతః శాంతిః అశాంతస్య కుతః సుఖమ్‌ ॥ 2.66
అర్థం: ఇంద్రియ నిగ్రహం లేని వానికి వివేక బుద్ధి కలగదు. ఆత్మ చింతన కూడా కలగదు. ఆత్మచింతన లేని వానికి శాంతి లభించదు. శాంతి లేని వానికి ఇంక సుఖమెక్కడ?
తమేవ శరణం గచ్ఛ సర్వ భావేన భారత । తత్ప్రసాదాత్‌ పరాం శాంతిం స్థానం ప్రాప్స్యసి శాశ్వతమ్‌ ॥ 18.62
అర్థం: అన్ని విధాలుగా ఈశ్వరునే శరణు వేడమని, అతని ప్రసాదం వల్లనే పరమశాంతిని, పరమపదాన్ని పొందగలవు అని చెపుతున్నారు పరమాత్మ. ఎట్టి మనోవికారాలు లేకుండుటయే శాంతి.
‘శాంతో-యం ఆత్మా’ అన్నది ఉపనిషద్‌ వాక్యం. శాంతి భగవత్ స్వరూపం. గీత సాక్షాత్తు భగవత్ స్వరూపం. భగవంతుడు మన ఇంట్లో కొలువై ఉన్నప్పుడు సుఖశాంతులు నిండుగా ఉంటాయి. ఎట్టి భయాలు, బాధలు ఉండవు. అందుచేతనే భవఘ్ని పీఠంలో శాంతి ప్రార్థన ప్రధానంగా ఉంటుంది.
‘భగవంతుడు శాంతి స్వరూపుడు. శాంతిగా ఉందాం. అందరి శాంతిని కోరుకుందాం. అందరూ శాంతిగా ఉండటానికి సహకరిద్దాం. ఎవరి శాంతికి భంగం కలిగించకుండా ఉందాం. అందరికి శుభమే జరుగు గాక! అందరూ సుఖశాంతులతో ఉందురు గాక! అందరి జీవితము సమృద్ధిగా ఉండు గాక! లోకాస్సమస్తాస్సుఖినో భవంతు. ఓం శాంతి శ్శాంతిః శ్శాంతిః.’
శాంతమే తన స్వరూపంగా కలిగిన గీతామాతకు నిండు మనస్సుతో నమస్కృతి సమర్పిస్తున్నాను.
ఈ జన్మను సార్థకం, సఫలం చేసుకోవటానికి ప్రతి క్షణం గీతామాతను గుర్తు చేసుకొంటూ, ఇంతటి అనుగ్రహాన్ని ప్రసాదించిన సాక్షాత్తు విష్ణు స్వరూపులైన వ్యాసదేవులకు హృదయపూర్వక కృతజ్ఞతలు.
ఈక్రింది telegram channel లింకు ద్వారా మనం పూజ్య శ్రీ భవఘ్ని గురుదేవుల వారి సత్సంగాలు శ్రవణం చేయవచ్చు
లింకు లో జాయిన్ అవండి
ఇంతటి మహత్తరమైన అవకాశాన్ని మనకందించిన గురుదేవుల వారికి అమ్మకు కృతజ్ఞతలు తెలియజేస్తూ
జై గురుదేవ్
నామం 7 : Bhagavad Gita: ధర్మార్థ కామ మోక్షాలను ప్రసాదించే.. కర్మ, భక్తి, జ్ఞాన యోగాల మార్గదర్శిని గీతా-7!
