Perugu Garelu Recipe: వేడివేడిగా సాయంత్రం వేళ బయట బండ్ల మీద వేడివేడి పునుగులు, బజ్జీలు, సమోసాలు, చూడగానే ఎవరికైనా నోరూరాల్సిందే. అయితే ఎప్పుడూ తినే సాదాసీదాగా కాకుండా, కాస్త కొత్తగా ‘పెరుగు గారెలు ’ ట్రై చేస్తే ఆ మజాయే వేరు. ముఖ్యంగా పిల్లలు వీటిని ఎంతో ఇష్టంగా తింటారు. హోటల్ స్టైల్లో సాఫ్ట్గా ఉండే పెరుగు గారెలు ఇంట్లోనే ఎలా తయారు చేసుకోవాలో ఇప్పుడు చూద్దాం.
కావాల్సిన పదార్థాలు
ముందుగా దీనికి అవసరమైన పదార్థాలను సిద్ధం చేసుకోవాలి. రెండు కప్పుల మినపప్పు, తగినంత అల్లం ముక్కలు, ఆరు పచ్చిమిర్చి, ఒక కప్పు పెరుగు, తాలింపు కోసం ఆవాలు, జీలకర్ర, ఎండుమిర్చి కరివేపాకు కొత్తిమీర సిద్ధం చేసుకోవాలి.
తయారీ విధానం ఇలా..
మొదటగా మినపప్పును శుభ్రంగా కడిగి కనీసం నాలుగు గంటల నుంచి ఆరు గంటలు పాటు నానబెట్టాలి. పప్పు బాగా నానిన తర్వాత అందులో అల్లం, పచ్చిమిర్చి ముక్కలు వేసి మెత్తగా గ్రైండర్ చేసుకోవాలి. ఇప్పుడు స్టవ్ మీద కడాయి పెట్టి ఆయిల్ పోయాలి. నూనె వేడెక్కాక పిండిని చిన్న చిన్న గారెలు వేసి రెండు వైపులా ఎర్రగా కాలే వరకు వేయించాలి. ఇలా వేయించిన పునుగులను నేరుగా ప్లేట్లోకి తీసుకోకుండా పెరుగు తాలింపులో వేయడం వల్ల గారెలు మెత్తగా మారి పెరుగును బాగా పీల్చుకుంటాయి.
అసలైన రుచి తాలింపులోనే..
మరోపక్క ఒక గిన్నెలో పెరుగు తీసుకుని ఉండలు లేకుండా బాగా చిలకాలి. అందులో కొద్దిగా నీళ్లు, ఉప్పు కలిపి పక్కన పెట్టుకోవాలి. ఇప్పుడు ఒక చిన్న పాన్లో నూనె వేసి ఆవాలు, జీలకర్ర, ఎండుమిర్చి, అల్లం, కరివేపాకుతో తాలింపు వేయాలి. ఈ తాలింపును పెరుగులో కలిపి, దాంతో పాటు కొత్తిమీర తురుములను కూడా చేర్చాలి. గారెలను ఈ పెరుగు మిశ్రమంలో వేయాలి. ఒక 15 నిమిషాలు పాటు వీటిని అలాగే వదిలేస్తే గారెలకు పెరుగు ఫ్లేవర్ బాగా పడుతుంది. అంతే.. ఎంతో రుచికరమైన పెరుగు గారెలు రెడీ! వీటిని సర్వ్ చేసే ముందు మరికాస్త క్యారెట్ తురుము వేసుకుంటే చూడటానికి బాగుండటమే కాకుండా టేస్ట్ కూడా అద్భుతంగా ఉంటుంది.
