ఆంధ్రప్రదేశ్ ప్రభుత్వం "దేశ సేవ నుంచి పల్లె సేవకు" అనే కొత్త పథకాన్ని ప్రారంభించింది. ఈ పథకం ద్వారా రిటైర్ అయిన ఆర్మీ జవాన్లకు వ్యవసాయ డ్రోన్లు అందిస్తారు. వీటితో రైతుల పంటలపై పురుగుమందులు పిచికారీ చేస్తారు. ఇలా జవాన్లకు మంచి ఆదాయం వస్తుంది, రైతులకు కూడా ఉపయోగం అవుతుంది. ఈ పథకాన్ని సైనిక్ వెల్ఫేర్ డిపార్ట్‌మెంట్, కొరోమాండల్ ఇంటర్నేషనల్ కలిసి అమలు చేస్తున్నారు.
ఈ పథకంలో ₹11 లక్షల విలువ చేసే డ్రోన్‌ను కేవలం ₹1.50 లక్షలకే ఆర్మీ రిటైర్డ్ వ్యక్తులకు ఇస్తారు. మిగతా మొత్తాన్ని సబ్సిడీగా ప్రభుత్వం భరిస్తుంది. డ్రోన్‌తో పాటు 1 సంవత్సరం వారంటీ, 5 బ్యాటరీ సెట్‌లు ఇస్తారు. ఒక్క డ్రోన్‌తో రోజుకు 30 ఎకరాల వరకు పిచికారీ చేయవచ్చు. ఇలా ఎకరాకు ₹400-₹500 వరకు ఆదాయం వస్తుంది.
జవాన్లకు డ్రోన్ నడిపే ట్రైనింగ్ కూడా ఇస్తారు. ఈ ట్రైనింగ్ హైదరాబాద్ లేదా చెన్నైలో 10 రోజులు ఉంటుంది. ఒక్కో వ్యక్తి ట్రైనింగ్ ఖర్చులో ₹80,000 ప్రభుత్వం భరిస్తుంది. ట్రైనింగ్ పూర్తయిన తర్వాత DGCA సర్టిఫికేట్ ఇస్తారు. దీని ద్వారా వారు వ్యవసాయ డ్రోన్లతో పాటు సర్వైలెన్స్ డ్రోన్లు కూడా నడపగలరు.
ప్రభుత్వం AP ఎక్స్ సర్వీస్‌మెన్ కార్పొరేషన్ను కూడా ₹10 కోట్ల నిధులతో ఏర్పాటు చేసింది. ఈ కార్పొరేషన్ ద్వారా డ్రోన్ ట్రైనింగ్ పూర్తిచేసుకున్నవారికి కొరోమాండల్ కంపెనీ నుంచి రెగ్యులర్ పనులు వస్తాయి. ఇలా ఉద్యోగం కోసం ప్రభుత్వంపై ఆధారపడకుండా వారు స్వయం ఉపాధి పొందగలరు.
అధికారులు చెబుతున్నట్లు, ఈ పథకం జవాన్లకు మరియు రైతులకు రెండువురికి లాభదాయకం. జవాన్లు దేశ సేవ చేసిన తర్వాత, ఇప్పుడు గ్రామీణ వ్యవసాయ అభివృద్ధికి సహాయం చేస్తారు. రైతులు వేగంగా, తక్కువ శ్రమతో పిచికారీ చేయించుకోవచ్చు. పంట దిగుబడి కూడా మెరుగుపడుతుంది. ఈ పథకం టెక్నాలజీ, ఉపాధి, వ్యవసాయాన్ని కలిపిన మంచి ఆవిష్కరణగా నిలుస్తుంది.
