కువైత్‌లో కల్తీ సారా ఘటన తీవ్ర కలకలం రేపుతోంది. వేర్వేరు ప్రదేశాల్లో కల్తీ సారాను సేవించిన ఘటనల్లో ఇప్పటి వరకు 10 మంది ప్రాణాలు కోల్పోయారని ప్రాథమిక సమాచారం. ఆదివారం నుంచి ప్రారంభమైన ఈ సంఘటనలో, వేర్వేరు కేసులలో ఆసుపత్రుల్లో చేరిన వారిలో పది మంది మృతి చెందినట్లు తెలిసింది. మరణించిన వారిలో ఆంధ్రుల సంఖ్యపై స్పష్టత రాలేదు కానీ, ఇప్పటివరకు ఒకరిని గుర్తించగా, మిగిలిన ముగ్గురి వివరాలు ఇంకా తెలియాల్సి ఉంది.
ఈ ఘటనలో నాటు సారా తాగిన కారణంగా, గత రెండు రోజుల్లో మొత్తం 15 మంది విదేశీయులు రెండు వేర్వేరు ఆసుపత్రుల్లో చికిత్స కోసం చేరారు. బుధవారం నాటికి వీరిలో 10 మందికి పైగా మరణించగా, మరికొందరు కంటి చూపు కోల్పోయారని సమాచారం. ఎంతమంది ఆంధ్రులు ఈ ఘటనలో ఉన్నారో ఇంకా నిర్ధారణ కాలేదు. అధికారుల నుండి పూర్తి వివరాలు వెలువడాల్సి ఉంది.
ఇస్లామిక్ దేశమైన కువైత్‌లో మద్య నిషేధం ఉంది. అక్కడ ఏ రకమైన మద్యం కొనుగోలు, విక్రయం లేదా వినియోగం చట్టపరంగా నిషేధం. అయినప్పటికీ, పెద్ద సంఖ్యలో పని చేస్తున్న భారతీయులు మరియు ఇతర విదేశీ కార్మికులు రహస్యంగా నాటు సారాను తయారు చేసి విక్రయించడం కొనసాగిస్తున్నారు. ఈ అక్రమ చర్యలు కార్మికుల ప్రాణాలకు ముప్పుగా మారుతున్నాయి.
ఈ ఘటనతో కువైత్‌లో ఉన్న భారతీయుల కుటుంబాల్లో ఆందోళన నెలకొంది. మరణించిన వారిలో ఎవరెవరు భారతీయులు, ముఖ్యంగా ఆంధ్రులు అనే విషయంలో స్పష్టత రాకపోవడంతో పరిస్థితి మరింత ఆందోళన కలిగిస్తోంది. అధికారులు విచారణ కొనసాగిస్తూ, కల్తీ సారా తయారీపై కఠిన చర్యలు తీసుకునే అవకాశాలు ఉన్నాయి.
