48 ఏళ్లుగా ఒక్క చుక్క నీరు త్రాగని 96 ఏళ్ల బిలియనీర్ వారెన్ బఫెట్! ఆ ఒక్క డ్రింక్ తోనే..

• గత 48 ఏళ్లుగా నీళ్లు తాగడం లేదని, రోజుకు ఐదు క్యాన్ల వరకు చెర్రీ కోక్ తాగుతానని వారెన్ బఫెట్ చెప్పినట్లు బిల్ అక్మాన్ వెల్లడించారు.
• 96 ఏళ్ల బఫెట్‌కు ఫాస్ట్ ఫుడ్, ఐస్‌క్రీమ్, హాంబర్గర్లు అంటే ఎంతో ఇష్టం. అయితే కోక్‌ను నీటికి ప్రత్యామ్నాయంగా తీసుకోవడం ఆరోగ్యకరం కాదు.

Warren Buffett Lifestyle: ప్రతిరోజూ తగినంత నీరు తాగడం ఆరోగ్యానికి ఎంతో అవసరమని వైద్యులు సూచిస్తుంటారు. ముఖ్యంగా వయసు పెరుగుతున్న కొద్దీ ఆహారం, పానీయాల విషయంలో మరింత జాగ్రత్తగా ఉండాలని చెబుతారు. అయితే ప్రపంచ ప్రఖ్యాత పెట్టుబడిదారుడు, బిలియనీర్ వారెన్ బఫెట్ జీవనశైలి మాత్రం ఇందుకు భిన్నంగా కనిపిస్తోంది. గత 48 ఏళ్లుగా కనీసం ఒక్క గ్లాసు నీరు కూడా తాగడం లేదని ఆయన చెప్పినట్లు తాజాగా ఓ ఆసక్తికర విషయం వెలుగులోకి వచ్చింది. నీటికి బదులుగా తనకు ఇష్టమైన చెర్రీ కోక్‌ను ఆస్వాదిస్తున్నారట. రోజుకు ఐదు క్యాన్ల వరకు కోక్ తాగే ఆయన ఆహారపు అలవాట్లు ఇప్పుడు మరోసారి చర్చనీయాంశంగా మారాయి.

48 ఏళ్లుగా నీటికి దూరం.. కోక్‌కే ప్రాధాన్యం!

వారెన్ బఫెట్‌కు నీళ్లు తాగే అలవాటు లేదనే విషయాన్ని ప్రముఖ బిలియనీర్, హెడ్జ్ ఫండ్ మేనేజర్ బిల్ అక్మాన్ వెల్లడించారు. ఇటీవల ‘ఈక్విటీ మేట్స్ ఇన్వెస్టింగ్’ పాడ్‌కాస్ట్‌లో పాల్గొన్న ఆయన.. బఫెట్‌తో కలిసి విందులో పాల్గొన్నప్పటి అనుభవాన్ని పంచుకున్నారు.

ఆ విందు సందర్భంగా బఫెట్‌ను సాధారణ నీళ్లు కావాలా? లేక సోడా కలిపిన నీళ్లు కావాలా? అని అడిగారట. అయితే ఆయన ఆ రెండింటినీ వద్దని, తనకు సోడా కావాలని కోరారట. ఈ క్రమంలో అసలు మీరు నీళ్లు తాగరా? అని అక్మాన్ ప్రశ్నించగా.. గత 48 ఏళ్లుగా నీళ్లు తాగడం లేదని బఫెట్ సమాధానమిచ్చినట్లు ఆయన వివరించారు. అంతేకాదు, బఫెట్ తన ఇంటికి విందుకు వచ్చినప్పుడు ఆయన కోసం ప్రత్యేకంగా చెర్రీ కోక్ బాటిళ్లను సిద్ధం చేసినట్లు గుర్తుచేసుకున్నారు.

ఐదు దశాబ్దాల పెప్సీ ప్రయాణం.. ఇప్పుడు చెర్రీ కోక్!

కోకాకోలాపై బఫెట్‌కు ఉన్న ఇష్టం గురించి గతంలోనూ అనేక సందర్భాల్లో చర్చ జరిగింది. 2015లో ఫార్చ్యూన్ మ్యాగజైన్‌కు ఇచ్చిన ఇంటర్వ్యూలో ఆయన తన ఆహారపు అలవాట్ల గురించి ఆసక్తికర విషయాలు వెల్లడించారు. రోజుకు సుమారు 2,700 కేలరీల ఆహారం తీసుకుంటానని, అందులో నాలుగో వంతు కోకాకోలా నుంచే లభిస్తుందని పేర్కొన్నారు. రోజుకు కనీసం ఐదు 12 ఔన్సుల కోక్ సర్వింగ్స్ తీసుకుంటానని తెలిపారు.

అయితే కోక్ కంటే ముందు బఫెట్‌కు పెప్సీ అంటేనే ఎక్కువ ఇష్టం. దాదాపు 50 ఏళ్ల పాటు పెప్సీని ఇష్టంగా తాగేవారట. ఈ అలవాటు కారణంగా చిన్నతనంలో ఆయన స్నేహితులు ముద్దుగా ‘పెప్సీ వారెన్’ అని పిలిచేవారని తెలుస్తోంది. ఆ తర్వాత ఆయన చెర్రీ కోక్‌కు అభిమానిగా మారారు.

ఆరేళ్ల పిల్లాడి ఆహారపు అలవాట్లే తనవంటూ వ్యాఖ్యలు!

వారెన్ బఫెట్ తన ఆహారపు అలవాట్లను తరచూ ఆరేళ్ల పిల్లాడి ఆహారంతో పోలుస్తుంటారు. ఆరోగ్యకరమైన ఆహారం కంటే తనకు నచ్చిన రుచికరమైన పదార్థాలకే ఎక్కువ ప్రాధాన్యత ఇస్తారు. సాసేజ్, ఎగ్ బిస్కెట్లు, హాంబర్గర్లు, హాట్ డాగ్స్, ఫ్రెంచ్ ఫ్రైస్, ఐస్‌క్రీమ్ సండేలు, క్యాండీలు, చాక్లెట్లు ఆయనకు ఇష్టమైన ఆహార పదార్థాల జాబితాలో ఉన్నాయి. మెక్‌డొనాల్డ్స్‌లో అల్పాహారం తీసుకోవడం కూడా ఆయనకు ఇష్టమైన అలవాట్లలో ఒకటి.

ఇలాంటి ఆహారపు అలవాట్లు ఉన్నప్పటికీ దీర్ఘకాలం సంతోషంగా, ఒత్తిడి లేకుండా జీవించడం తన ఆరోగ్యానికి మేలు చేస్తుందని బఫెట్ భావిస్తుంటారు.

బఫెట్ అలవాట్లను అనుసరించవచ్చా?

96 ఏళ్ల వయసులోనూ బఫెట్ తనకు నచ్చిన ఆహారాన్ని ఆస్వాదిస్తుండటం చాలామందికి ఆశ్చర్యం కలిగించవచ్చు. అయితే ఆయన జీవనశైలిని అందరూ అనుసరించడం సరైనది కాదు. అధిక చక్కెర కలిగిన శీతల పానీయాలు, ప్రాసెస్ చేసిన మాంసం, అధిక ఉప్పు, అనారోగ్యకరమైన కొవ్వులు ఎక్కువగా తీసుకోవడం వల్ల ఊబకాయం, టైప్-2 మధుమేహం, గుండె జబ్బులు, అధిక రక్తపోటు వంటి సమస్యలు వచ్చే ప్రమాదం ఉంది.

వారెన్ బఫెట్ ఆహారపు అలవాట్లు ఆయన వ్యక్తిగత జీవనశైలికి సంబంధించినవి మాత్రమే. ఆయనకు ఎలాంటి ఆరోగ్య సమస్యలు లేవని లేదా ఈ అలవాట్లే ఆయన దీర్ఘాయుష్షుకు కారణమని నిర్ధారించలేం. ప్రతి ఒక్కరి శరీర అవసరాలు భిన్నంగా ఉంటాయి. అందుకే కోక్‌ను నీటికి ప్రత్యామ్నాయంగా భావించకుండా, శరీరానికి అవసరమైనంత నీరు తీసుకోవడం, సమతుల ఆహారం పాటించడం, క్రమం తప్పకుండా ఆరోగ్యాన్ని పర్యవేక్షించుకోవడం ఎంతో ముఖ్యం.