Yoga: సంజీవనితో యోగాను అనుసంధానం చేసి ప్రజారోగ్యాన్ని మెరుగుపరచాలి.. సీఎం చంద్రబాబు!

రాష్ట్రవ్యాప్తంగా 1.33 లక్షల కేంద్రాల్లో అంతర్జాతీయ యోగా దినోత్సవ కార్యక్రమాలు..

రాష్ట్రవ్యాప్తంగా 1.33 లక్షల కేంద్రాల్లో అంతర్జాతీయ యోగా దినోత్సవ వేడుకలు..

ప్రజల ఆరోగ్య పరిరక్షణకు యోగాను మరింత చేరువ చేయాలని ముఖ్యమంత్రి నారా చంద్రబాబు నాయుడు అధికారులను ఆదేశించారు. సంజీవని ప్రజారోగ్య కార్యక్రమంతో యోగాను అనుసంధానం చేసి ప్రతి ఇంటికీ యోగాను తీసుకెళ్లాలని సూచించారు.

అంతర్జాతీయ యోగా దినోత్సవం సందర్భంగా రాష్ట్రంలో చేపట్టాల్సిన కార్యక్రమాలపై సచివాలయంలో ముఖ్యమంత్రి సమీక్ష నిర్వహించారు. ఈ సందర్భంగా జూన్ 21న రాష్ట్రవ్యాప్తంగా నిర్వహించనున్న యోగా కార్యక్రమాల ఏర్పాట్లపై అధికారులను అడిగి వివరాలు తెలుసుకున్నారు.

యోగాంధ్రను ప్రజా ఉద్యమంగా తీర్చిదిద్దాలని సీఎం పేర్కొన్నారు. ముందస్తు ఆరోగ్య సంరక్షణ, జీవనశైలి మార్పుల్లో యోగాకు కీలక పాత్ర ఉందని అన్నారు. కార్యక్రమాల్లో పాల్గొనే ప్రజలకు అవసరమైన అన్ని సౌకర్యాలు కల్పించి, ఎలాంటి ఇబ్బందులు లేకుండా నిర్వహించాలని అధికారులను ఆదేశించారు.

అంతర్జాతీయ యోగా దినోత్సవం సందర్భంగా ఉత్తమ ప్రతిభ కనబరిచే యోగా శిక్షకులను వచ్చే ఏడాది ప్రత్యేక అవార్డులతో సత్కరించాలని సీఎం సూచించారు. “ప్రతి ఇంటికి యోగా” అనే లక్ష్యంతో ఏడాది పాటు అమలు చేసే కార్యాచరణ ప్రణాళికను సిద్ధం చేయాలని ఆదేశించారు.

దీర్ఘకాలిక వ్యాధులు, ఆరోగ్య సమస్యలతో బాధపడుతున్న వారికి ప్రత్యేకంగా ఉపయోగపడేలా “థెరప్యూటిక్ యోగా” కార్యక్రమాన్ని రూపొందించాలని అధికారులకు సూచించారు. ఆరోగ్య సమస్యలను తగ్గించడంలో యోగా ఒక సహాయక మార్గంగా ఉపయోగపడుతుందని తెలిపారు.

యోగా దినోత్సవ వేడుకల్లో భాగంగా ప్రముఖ యోగా గురువు బాబా రాందేవ్ ముఖ్యమంత్రితో కలిసి పాల్గొననున్నారు. జూన్ 20న విజయవాడలోని ఉండవల్లి గుహల సమీపంలో నిర్వహించే యోగా కార్యక్రమంలో ఇద్దరూ పాల్గొంటారు.

జూన్ 21న విజయవాడలోని ఇందిరా గాంధీ మున్సిపల్ స్టేడియంలో రాష్ట్ర స్థాయి యోగా దినోత్సవ కార్యక్రమం జరగనుంది. ఈ కార్యక్రమానికి 5 వేల నుంచి 6 వేల మంది వరకు పాల్గొనేలా ఏర్పాట్లు చేస్తున్నట్లు అధికారులు సీఎంకు వివరించారు. వాతావరణ పరిస్థితులు అనుకూలించకపోతే ప్రత్యామ్నాయంగా అంబేద్కర్ కళావేదికలో సుమారు వెయ్యి మందితో కార్యక్రమం నిర్వహించేలా ఏర్పాట్లు చేసినట్లు తెలిపారు.

బాబా రాందేవ్ జూన్ 19న రాష్ట్రానికి చేరుకుని ముఖ్యమంత్రి చంద్రబాబు నాయుడును కలవనున్నారు. ఇప్పటికే యోగాంధ్ర కార్యక్రమంలో భాగంగా 2.6 లక్షల మంది శిక్షకులకు శిక్షణ ఇచ్చినట్లు అధికారులు తెలిపారు.

జూన్ 21న జరిగే యోగా కార్యక్రమాలకు ఇప్పటికే కోటి మందికి పైగా రిజిస్ట్రేషన్లు నమోదయ్యాయని వెల్లడించారు. జూన్ 18 నుంచి 20 వరకు విజయవాడలో రాష్ట్ర స్థాయి యోగా పోటీలు నిర్వహించనున్నట్లు తెలిపారు.

అంతర్జాతీయ యోగా దినోత్సవం రోజున రాష్ట్రవ్యాప్తంగా 1.33 లక్షల కేంద్రాల్లో యోగా కార్యక్రమాలు నిర్వహించనున్నారు. అలాగే వచ్చే ఏడాది యోగా దినోత్సవం వరకు నిర్వహించాల్సిన కార్యక్రమాలు, యోగా ప్రదేశాలను సూచించే “యోగా @ డెస్టినేషన్” క్యాలెండర్‌ను సీఎం విడుదల చేయనున్నారు.

ఈ సమీక్ష సమావేశంలో ప్రభుత్వ సలహాదారు మంతెన సత్యనారాయణ రాజు, ఆరోగ్య, వైద్య మరియు కుటుంబ సంక్షేమ శాఖ కమిషనర్ చక్రధర్ బాబు, ఎన్టీఆర్ జిల్లా కలెక్టర్ లక్ష్మీ షా, ఆయుష్ డైరెక్టర్ రొణంకి గోపాలకృష్ణ తదితర అధికారులు పాల్గొన్నారు.