Tenali: తెనాలిలో ఆన్‌లైన్ అశ్లీల దందా బట్టబయలు.. పోలీసుల అదుపులో నిర్వాహకుడు!

తెనాలి పోలీసుల అదుపులో న్యూడ్ కాల్స్, చాటింగ్ నిర్వాహకుడు..

ఆన్ లైన్ పోర్టల్ నిర్వహణపై లోతుగా దర్యాప్తు చేస్తున్న పోలీసులు..

తెనాలి: గుంటూరు జిల్లా తెనాలిలో ఆన్‌లైన్ ద్వారా నడుస్తున్న అశ్లీల దందాను పోలీసులు బట్టబయలు చేశారు. “స్ట్రిప్ టాక్” అనే పేరుతో నడుస్తున్న ఒక ఆన్‌లైన్ పోర్టల్ ద్వారా న్యూడ్ కాల్స్, చాటింగ్ నిర్వహిస్తున్న యువకుడిని పోలీసులు అదుపులోకి తీసుకున్నారు.

పోలీసుల వివరాల ప్రకారం, ఈ పోర్టల్ ద్వారా డబ్బులు చెల్లించిన వ్యక్తులతో మహిళలు న్యూడ్ చాటింగ్ చేస్తుండేవారు. ఒక్కో చాట్‌కు రూ.500 నుంచి రూ.1000 వరకు మహిళలకు చెల్లిస్తున్నట్లు విచారణలో బయటపడింది. ఈ వ్యవహారం పూర్తిగా ఆన్‌లైన్ ఆధారంగా నడుస్తుండటం గమనార్హం.

అయితే, ఈ కేసులో అదుపులోకి తీసుకున్న యువకుడు తన వాదనలో “ఈ పోర్టల్‌లో బంధువులైన ఇద్దరు మహిళలు తప్ప మరెవరూ లేరు” అని చెప్పాడు. అతని ఈ వాదనలో నిజానిజాలు ఏమిటన్న దానిపై పోలీసులు సాంకేతికంగా పరిశీలిస్తున్నారు.

స్థానికుల నుంచి వచ్చిన సమాచారంతో తెనాలి పోలీసులు సుమోటోగా కేసు నమోదు చేసి దర్యాప్తు ప్రారంభించారు. ఈ అశ్లీల వ్యవహారానికి సంబంధించి సాంకేతిక సహకారం అందించింది కూడా అదే యువకుడు అయినట్లు పోలీసులు అనుమానిస్తున్నారు.

ఈ ఘటనపై లోతుగా విచారణ కొనసాగిస్తున్న పోలీసులు, ఈ నెట్‌వర్క్ వెనుక మరెవరైనా ఉన్నారా అన్న దానిపై దృష్టి సారించారు. ప్రజలు ఇలాంటి ఆన్‌లైన్ మోసాలకు, అక్రమ కార్యకలాపాలకు దూరంగా ఉండాలని పోలీసులు హెచ్చరిస్తున్నారు.