Saudi Arabia: ఎంతో మందిని కాపాడిన నర్సు జీవితం తలకిందులు! ₹40 లక్షల ఖర్చు, జీవితాంతం మంచం పైనే! సొంత దేశానికి తిరిగి రాలేని దుస్థితి! ప్రభుత్వ సాయం??

సౌదీ రోడ్డు ప్రమాదంతో జీవితం తలకిందులు... స్వదేశానికి రప్పించాలని ప్రభుత్వాన్ని ఆశ్రయించిన కుటుంబం..

సౌదీ ట్రావెల్ బ్యాన్‌తో స్వదేశానికి రాలేని తెలంగాణ యువ నర్సు.. కన్నీరుమున్నీరైన తల్లి..

సౌదీ అరేబియాలో సేవలందిస్తూ ఎన్నో ప్రాణాలను కాపాడిన ఓ తెలంగాణ నర్సు నేడు తన ప్రాణాల కోసం, స్వదేశానికి చేరుకోవడానికి పోరాడుతున్న హృదయవిదారక పరిస్థితి వెలుగులోకి వచ్చింది. రోడ్డు ప్రమాదంలో తీవ్రంగా గాయపడి 87 శాతం శాశ్వత వైకల్యానికి గురైన ఆమె ప్రస్తుతం మంచానికే పరిమితమయ్యారు. బ్యాంకు రుణం కారణంగా విధించిన ట్రావెల్ బ్యాన్ వల్ల భారత్‌కు తిరిగి రాలేక తీవ్ర ఇబ్బందులు ఎదుర్కొంటున్నారు.

సూర్యాపేటకు చెందిన నర్సు సునీతకు విషాదం
సూర్యాపేట జిల్లా చివ్వెంల మండలం ఊర్తి కమ్మపాడు గ్రామానికి చెందిన గుగులోతు సునీత బీఎస్సీ నర్సింగ్ పూర్తి చేసి కుటుంబాన్ని ఆర్థికంగా ఆదుకోవాలనే లక్ష్యంతో 2024 సెప్టెంబర్ 7న సౌదీ అరేబియాకు వెళ్లారు. అక్కడ కింగ్ అబ్దుల్లా హాస్పిటల్, అసీర్ క్లస్టర్‌లో ఇంటెన్సివ్ కేర్ నర్స్ స్పెషలిస్టుగా విధులు నిర్వర్తిస్తూ కుటుంబానికి అండగా నిలిచారు.

రోడ్డు ప్రమాదంతో జీవితమే మారిపోయింది
2025 ఏప్రిల్ 23న జరిగిన రోడ్డు ప్రమాదంలో సునీత రెండు చేతులు, వెన్నెముక, తలకు తీవ్ర గాయాలపాలయ్యారు. ఆమెకు పలు శస్త్రచికిత్సలు నిర్వహించగా, శరీరంలో మెటల్ ప్లేట్లు అమర్చాల్సి వచ్చింది. అనంతరం వైద్య కమిటీ ఆమెకు 87 శాతం శాశ్వత వైకల్యం ఉన్నట్లు నిర్ధారించి, విధులకు అనర్హురాలిగా ప్రకటించింది. దీంతో ఆమె ఉద్యోగాన్ని కూడా కోల్పోయారు.

రూ.38 లక్షల రుణంతో ట్రావెల్ బ్యాన్
ప్రమాదానికి ముందు కుటుంబ అవసరాల కోసం సౌదీలోని అల్ రాజ్హీ బ్యాంక్ నుంచి 1,48,000 సౌదీ రియాల్స్ (సుమారు రూ.38 లక్షలు) రుణం తీసుకున్నారు. ప్రమాదానికి సంబంధించిన వైద్య పత్రాలు బ్యాంకుకు సమర్పించినప్పటికీ రుణ వ్యవహారం పరిష్కారం కాకపోవడంతో ఆమెపై ట్రావెల్ బ్యాన్ విధించారు. దీంతో అత్యవసర వైద్యం కోసం స్వదేశానికి రావాల్సిన పరిస్థితి ఉన్నప్పటికీ భారత్‌కు తిరిగి వచ్చే అవకాశం లేకుండా పోయింది.

జీతం నిలిచిపోవడంతో తీవ్ర ఆర్థిక ఇబ్బందులు
2025 నవంబర్ నుంచి జీతం కూడా నిలిచిపోవడంతో సునీత జీవనోపాధి పూర్తిగా దెబ్బతింది. వైద్య చికిత్స, న్యాయపరమైన ఖర్చులు, నివాస వ్యయాలను భరించే స్థోమత లేక తీవ్ర ఆర్థిక సంక్షోభాన్ని ఎదుర్కొంటున్నారు.

'నా కూతురిని కాపాడండి' అంటూ తల్లి విజ్ఞప్తి 
సునీత తల్లి గుగులోతు పరెంగి కన్నీటి పర్యంతమై, "ఎంతో మంది రోగులకు సేవ చేసిన నా కూతురిని ఇప్పుడు మీరు కాపాడాలి" అంటూ 2026 జూలై 31న 'సీఎం ప్రవాసీ ప్రజావాణి' ద్వారా ముఖ్యమంత్రి ఏ. రేవంత్ రెడ్డికి వినతిపత్రం సమర్పించారు.

తెలంగాణ ప్రభుత్వ స్పందన 
తెలంగాణ ప్రభుత్వ ఎన్నారై అడ్వయిజరీ కమిటీ వైస్ చైర్మన్ మంద భీంరెడ్డి కుటుంబ సభ్యులకు ధైర్యం చెప్పి అవసరమైన మార్గదర్శనం చేశారు. 'సీఎం ప్రవాసీ ప్రజావాణి' హెల్ప్ డెస్క్ లైజన్ ఆఫీసర్ భార్గవి నద్దునూరి, వాలంటీర్ గంగుల మురళీధర్ రెడ్డి వినతిపత్రం సిద్ధం చేయడంలో సహకరించారు.

ఈ అంశంపై స్పందించిన 'సీఎం ప్రజావాణి' ఇన్‌చార్జి, తెలంగాణ రాష్ట్ర ప్లానింగ్ బోర్డు వైస్ చైర్మన్ డా. జి. చిన్నారెడ్డి, సునీతను అత్యవసరంగా స్వదేశానికి రప్పించి వైద్య సహాయం అందించే అంశంపై చర్యలు తీసుకోవాలని సూచిస్తూ, ముఖ్యమంత్రి ప్రిన్సిపల్ సెక్రటరీ వి. శేషాద్రికి వినతిపత్రాన్ని పంపించారు.

కుటుంబానికి ప్రధాన ఆధారం సునీతే 
సునీత తన తల్లి గుండె శస్త్రచికిత్స, తండ్రి మెదడు శస్త్రచికిత్స ఖర్చులతో పాటు ముగ్గురు సోదరీమణుల చదువులు, వివాహాలు, ప్రసూతి ఖర్చులను భరించారు. 2011లో అన్న మరణించడంతో అతని ఇద్దరు చిన్నారుల బాధ్యతను కూడా తన భుజాలపై వేసుకున్నారు. బీపీఎల్ కుటుంబానికి చెందిన ఈ కుటుంబం ప్రస్తుతం తీవ్రమైన ఆర్థిక కష్టాల్లో ఉంది.

ఎంబసీలను ఆశ్రయించినా ఫలితం లేదు 
ఈ సమస్య పరిష్కారం కోసం సునీత ఇప్పటికే రియాద్‌లోని భారత రాయబార కార్యాలయం, జెడ్డాలోని భారత కాన్సులేట్‌కు ఈ-మెయిల్లు పంపినప్పటికీ స్పష్టమైన పరిష్కారం లభించలేదని కుటుంబ సభ్యులు తెలిపారు.

ప్రభుత్వాన్ని వేడుకుంటున్న కుటుంబం 
'ఇండియన్ కమ్యూనిటీ వెల్ఫేర్ ఫండ్' ద్వారా అత్యవసర ఆర్థిక, న్యాయ సహాయం అందించి, బ్యాంకు రుణ సమస్యను పరిష్కరించి, ట్రావెల్ బ్యాన్ ఎత్తివేసేలా చర్యలు తీసుకోవాలని కుటుంబ సభ్యులు కోరుతున్నారు. అలాగే సునీతను సురక్షితంగా తెలంగాణకు తీసుకువచ్చి మెరుగైన వైద్యం అందించాలని ముఖ్యమంత్రి ఏ. రేవంత్ రెడ్డి, సూర్యాపేట ఎమ్మెల్యే గుంటకండ్ల జగదీష్ రెడ్డి, నల్గొండ ఎంపీ కుందూరు రఘువీర్ రెడ్డిని విజ్ఞప్తి చేశారు.

ఈ ఘటన విదేశాల్లో పనిచేస్తున్న భారతీయుల భద్రత, అత్యవసర పరిస్థితుల్లో వారికి అందే సహాయ వ్యవస్థపై మరోసారి చర్చకు దారితీస్తోంది. సమయానికి ప్రభుత్వ, దౌత్యపరమైన సహకారం లభిస్తే సునీత త్వరగా స్వదేశానికి చేరుకుని మెరుగైన వైద్యం పొందే అవకాశం ఉందని కుటుంబ సభ్యులు ఆశాభావం వ్యక్తం చేస్తున్నారు.