Swiggy: రైలు ప్రయాణంలో మారుతున్న ఫుడ్ ట్రెండ్.. స్విగ్గీ ‘ఫుడ్ ఆన్ ట్రైన్’కు భారీ ఆదరణ!

180 నగరాలకు విస్తరించిన స్విగ్గీ రైలు ఫుడ్ సేవలు.. ఏడాదిలో మూడు రెట్లు పెరిగిన ఆర్డర్లు..

రైల్వే ప్రయాణికుల కొత్త ఎంపిక.. ముందుగానే భోజనం బుక్ చేసుకుంటున్న ప్రయాణికులు..

న్యూఢిల్లీ: రైలు ప్రయాణికుల ఆహార అలవాట్లు వేగంగా మారుతున్నాయి. ప్రయాణంలో నాణ్యమైన భోజనం అందించేందుకు ప్రారంభించిన స్విగ్గీ ‘ఫుడ్ ఆన్ ట్రైన్’ సేవకు భారీ స్పందన లభిస్తోంది. 2026 ఆర్థిక సంవత్సరం తొలి త్రైమాసికంలో (ఏప్రిల్-జూన్) ఈ సేవ ద్వారా వచ్చిన ఆర్డర్లు గత ఏడాదితో పోలిస్తే మూడు రెట్లు పెరిగినట్లు స్విగ్గీ వెల్లడించింది.

రైల్వే ప్రయాణం ఇప్పుడు కేవలం మెట్రో నగరాలకే పరిమితం కాకుండా చిన్న పట్టణాల్లోనూ డిజిటల్ సేవల వినియోగం పెరుగుతోందని స్విగ్గీ తెలిపింది. ప్రస్తుతం ఈ ఫుడ్ డెలివరీ సేవ 180కిపైగా నగరాల్లో అందుబాటులో ఉంది.

రైలు ప్రయాణికులు ముందుగానే భోజనం బుక్ చేసుకునే అలవాటు పెరుగుతోందని కంపెనీ తెలిపింది. కొంతమంది ప్రయాణికులు తమ ప్రయాణంలో ఒకటి కంటే ఎక్కువ స్టేషన్ల వద్ద ఆహారం ఆర్డర్ చేస్తున్నారు.

ఒకే పీఎన్ఆర్ నంబర్పై రెండు లేదా అంతకంటే ఎక్కువ స్టేషన్లలో ఆహారం ఆర్డర్ చేసే ప్రయాణాలు ఏడాదితో పోలిస్తే 300 శాతానికి పైగా పెరిగాయి. ఒకే స్టేషన్లో ఆర్డర్ చేసే వారితో పోలిస్తే పలు స్టేషన్లలో ఆర్డర్ చేసే ప్రయాణికులు దాదాపు 2.2 రెట్లు ఎక్కువ ఖర్చు చేస్తున్నారు.

భోపాల్-నాగ్పూర్ మార్గం రెండు స్టేషన్లలో ఆహారం ఆర్డర్ చేసే ప్రయాణికుల్లో అత్యంత ప్రజాదరణ పొందిన మార్గంగా నిలిచింది. ఈ మార్గంలో ఒకే బుకింగ్ ద్వారా రెండు స్టేషన్లలో 1,300 మందికిపైగా ప్రయాణికులు భోజనం ఆర్డర్ చేశారు.

స్విగ్గీ ఫుడ్ ఆన్ ట్రైన్ సేవ కొత్త వినియోగదారులను కూడా ఆకర్షిస్తోంది. మధ్యప్రదేశ్లోని గుణా ప్రాంతంలో వచ్చిన ఆర్డర్లలో 66 శాతం మంది మొదటిసారి స్విగ్గీని ఉపయోగించిన వారేనని కంపెనీ తెలిపింది.

‘ఇండియా రైజ్’ స్టేషన్లుగా గుర్తించిన అభివృద్ధి చెందుతున్న పట్టణాల్లో ఈ సేవ వినియోగం ఏడాదిలో 253 శాతం పెరిగింది. ఇది మెట్రో నగరాల వృద్ధి కంటే దాదాపు రెండింతలు ఎక్కువగా ఉందని స్విగ్గీ పేర్కొంది.

ఈ వేసవిలో గురుగ్రామ్, ఉదయ్పూర్, బికనీర్, దావణగెరె, కాయంకుళం, నాందేడ్, అమరావతి, షోరనూర్, అర్రా, తాడిపత్రి, నిజామాబాద్ తదితర 17 కొత్త రైల్వే స్టేషన్లకు సేవలను విస్తరించింది.

ప్రయాణికుల సౌకర్యం కోసం స్విగ్గీ ‘స్కాన్ యువర్ టికెట్’ ఫీచర్ను కూడా ప్రారంభించింది. దీని ద్వారా ప్రయాణికులు తమ రైలు టికెట్ను అప్లోడ్ చేస్తే పీఎన్ఆర్ వివరాలు ఆటోమేటిక్గా గుర్తించి భోజనం ఆర్డర్ చేసుకునే అవకాశం ఉంటుంది.

స్విగ్గీ ఫుడ్ స్ట్రాటజీ, కస్టమర్ ఎక్స్పీరియన్స్ విభాగం వైస్ ప్రెసిడెంట్ దీపక్ మలూ మాట్లాడుతూ.. గత ఏడాది నుంచి ఫుడ్ ఆన్ ట్రైన్ సేవకు అద్భుతమైన స్పందన లభిస్తోందన్నారు. చిన్న పట్టణాల్లోని ప్రయాణికులు కూడా రైలు ఆగే కొద్దిసేపట్లో డిజిటల్ ఫుడ్ సేవలను ఉపయోగించుకోవడం కొత్త అనుభూతిగా మారిందని తెలిపారు.

విశ్వవిద్యాలయాలు ఉన్న ప్రాంతాల్లో విద్యార్థుల ఆర్డర్లు కూడా గణనీయంగా పెరిగాయని చెప్పారు. మే చివరి వారంలో విద్యార్థుల ఆర్డర్లు 70 శాతం పెరిగాయని, ఖరగ్పూర్, కాన్పూర్, అలీగఢ్ స్టేషన్లలో అధికంగా ఆర్డర్లు నమోదయ్యాయని వివరించారు.

వేసవి కాలంలో స్విగ్గీ ఫుడ్ ఆన్ ట్రైన్ ద్వారా ప్రయాణికులు నాలుగు లక్షలకు పైగా రోటీలను ఆర్డర్ చేశారు. ఇది అత్యధికంగా ఆర్డర్ చేసిన ఆహార పదార్థంగా నిలిచింది. మసాలా దోస, ఆలూ పరాఠా, మెక్ఆలూ టిక్కీ బర్గర్ కూడా ఎక్కువగా ఆర్డర్ చేసిన ఆహారాల్లో ఉన్నాయి. నాన్వెజ్ విభాగంలో చికెన్ బిర్యానీ అత్యంత ప్రజాదరణ పొందింది.

ఎండల ప్రభావంతో పానీయాల ఆర్డర్లు కూడా భారీగా పెరిగాయి. శీతాకాలంతో పోలిస్తే మామిడి షేక్ ఆర్డర్లు దాదాపు 10 రెట్లు పెరిగాయి. శీతల పానీయాల ఆర్డర్లు 354 శాతం, లస్సీ ఆర్డర్లు రెండింతలు, ఐస్క్రీమ్ ఆర్డర్లు 140 శాతం పెరిగాయి. దేశంలోని వివిధ ప్రాంతాల్లో ప్రయాణికుల ఆహార అభిరుచులు భిన్నంగా ఉన్నాయని స్విగ్గీ తెలిపింది.

ఉత్తర భారత ప్రయాణికులు రోటీ-కర్రీ, ఆలూ పరాఠా, బర్గర్లను ఎక్కువగా ఇష్టపడగా, నెల్లూరు ప్రాంతంలో ఆర్డర్ చేసిన ఆహారాల్లో 14 శాతానికి పైగా దోసే ఉంది. విజయవాడలో ప్రతి ఐదు ఆర్డర్లలో ఒకటి బిర్యానీగా నమోదైంది. కొంకణ్ మార్గంలోని మడ్గావ్ జంక్షన్లో మాత్రం బిర్యానీని అధిగమించి బర్గర్ అత్యధికంగా ఆర్డర్ చేసిన వంటకంగా నిలిచింది.

స్విగ్గీ ఫుడ్ ఆన్ ట్రైన్ సేవలో ప్రయాణికులు ఎక్కువగా ఆర్డర్ చేసిన రెస్టారెంట్ బ్రాండ్లలో హల్దీరామ్స్, ప్యారడైస్ బిర్యాని, A2B – అడయార్ ఆనంద భావన , మెక్ డొనాల్డ్స్, KFC ఉన్నాయి.

చాలా మంది ప్రయాణికులు తమ ప్రయాణానికి నాలుగు రోజుల ముందే భోజనం బుక్ చేసుకుంటున్నారని స్విగ్గీ వెల్లడించింది. రైలు ప్రయాణాల్లో డిజిటల్ ఫుడ్ సేవల వినియోగం భవిష్యత్తులో మరింత పెరిగే అవకాశాలు కనిపిస్తున్నాయి.