బుక్‌మైషోలో రామాయణం రికార్డు.. ధురంధర్ 2, పుష్ప 2ను మించిన టికెట్ బుకింగ్స్!

• బుక్‌మైషోలో రణ్‌బీర్ కపూర్ నటించిన 'రామాయణం' గంటలో 1.37 లక్షల టికెట్లు విక్రయించి సరికొత్త రికార్డు సృష్టించింది.
• ఈ ఘనతతో ధురంధర్ 2, పుష్ప 2 సినిమాల టికెట్ బుకింగ్ రికార్డులను రామాయణం అధిగమించింది.

Ramayana Movie: భారతీయ సినీ పరిశ్రమలో మరో భారీ చిత్రం సరికొత్త రికార్డు సృష్టించింది. బాలీవుడ్ స్టార్ రణ్‌బీర్ కపూర్, కన్నడ నటుడు యశ్ ప్రధాన పాత్రల్లో నటించిన ‘రామాయణం: పార్ట్ 1’ సినిమా బాక్సాఫీస్ వద్దనే కాకుండా ఆన్‌లైన్ టికెట్ బుకింగ్స్‌లోనూ దూసుకుపోతోంది. ప్రముఖ టికెట్ బుకింగ్ ప్లాట్‌ఫామ్ బుక్‌మైషోలో ఇప్పటివరకు ఉన్న రికార్డులను బద్దలుకొట్టింది.

గంటలోనే లక్షకు పైగా టికెట్ల విక్రయం

నితేశ్ తివారీ దర్శకత్వంలో తెరకెక్కిన ఈ పౌరాణిక చిత్రం నవంబర్ 5న ప్రేక్షకుల ముందుకు వచ్చింది. దీపావళి పండుగ సెలవులు సినిమాకు మరింత కలిసొచ్చాయి. ముఖ్యంగా విడుదలైన ఐదో రోజు (నవంబర్ 9) టికెట్ బుకింగ్స్ ఒక్కసారిగా పెరిగాయి. బుక్‌మైషోలో ఒక గంట వ్యవధిలో సుమారు 1.37 లక్షల టికెట్లు అమ్ముడయ్యాయి. దీంతో గంటలో అత్యధిక టికెట్లు విక్రయించిన భారతీయ చిత్రంగా రామాయణం నిలిచింది.

ధురంధర్ 2, పుష్ప 2 రికార్డులు బద్దలు

ఇప్పటివరకు ఈ విభాగంలో రణ్‌వీర్ సింగ్ నటించిన ‘ధురంధర్ 2’ అగ్రస్థానంలో ఉండేది. ఆ సినిమా గంటలో 1,09,170 టికెట్లు విక్రయించింది. అల్లు అర్జున్ నటించిన ‘పుష్ప 2’ గంటలో 1,07,650 టికెట్లతో తర్వాతి స్థానంలో నిలిచింది. ఇప్పుడు ఈ రెండు చిత్రాలను అధిగమించి రామాయణం సరికొత్త రికార్డు సృష్టించింది.

దీపావళి సెలవులతో పెరిగిన డిమాండ్

నవంబర్ 9న ఉదయం 9 నుంచి 10 గంటల మధ్యనే 'రామాయణం 'సినిమా సుమారు 91,500 టికెట్లు విక్రయించింది. అంతకుముందు రోజు ఇదే సమయంలో 54,760 టికెట్లు మాత్రమే అమ్ముడయ్యాయి. అంటే గంటవారీ బుకింగ్స్‌లో దాదాపు 67 శాతం పెరుగుదల నమోదైంది. పండుగ సెలవులు, కుటుంబ ప్రేక్షకుల ఆసక్తి ఈ భారీ బుకింగ్స్‌కు ప్రధాన కారణాలుగా నిలిచాయి.

భారీ తారాగణంతో తెరకెక్కిన చిత్రం

ఈ సినిమాలో రణ్‌బీర్ కపూర్ శ్రీరాముడిగా, సాయిపల్లవి సీతగా, యశ్ రావణుడిగా కనిపిస్తున్నారు. లక్ష్మణుడి పాత్రలో రవి దూబే నటిస్తున్నారు. సన్నీ డియోల్‌తో పాటు పలువురు ప్రముఖ నటులు కూడా ఇందులో భాగమయ్యారు. రెండు భాగాలుగా ఈ చిత్రాన్ని రూపొందిస్తున్నారు.

మొత్తానికి భారతీయ ఇతిహాసం ఆధారంగా తెరకెక్కిన రామాయణం.. బుక్‌మైషోలో గంటవారీ టికెట్ విక్రయాల్లో సరికొత్త చరిత్ర సృష్టించడం విశేషం.