Jyothika: విద్యార్థుల ఆందోళనకు సినీ నటి జ్యోతిక మద్దతు.. ఇన్స్టాగ్రామ్‌లో సంచలన పోస్ట్! మంత్రి రాజీనామా చేయాల్సిందే..

• కేంద్ర విద్యాశాఖ మంత్రి ధర్మేంద్ర ప్రధాన్ రాజీనామా చేయాలని డిమాండ్..
  
  
• ఇటీవలే ఢిల్లీలో జరిగిన ‘సంసద్ చలో’ మార్చ్‌తో ఉద్ధృతమైన నిరసనలు..

దేశవ్యాప్తంగా తీవ్ర దుమారం రేపుతున్న నీట్ (NEET) ప్రశ్నపత్రాల లీకేజీ వివాదంపై ప్రముఖ సీనియర్ నటి జ్యోతిక అత్యంత ఘాటుగా స్పందించారు. వైద్య విద్య ప్రవేశ పరీక్షల పారదర్శకతపై ప్రశ్నలు గుప్పిస్తూ లక్షలాది మంది విద్యార్థులు చేస్తున్న ఆందోళనలకు ఆమె సంపూర్ణ మద్దతు ప్రకటించారు. ఈ సంచలన అక్రమాలకు నైతిక బాధ్యత వహిస్తూ కేంద్ర విద్యాశాఖ మంత్రి ధర్మేంద్ర ప్రధాన్ తక్షణమే తన పదవికి రాజీనామా చేయాలని ఆమె బహిరంగంగా డిమాండ్ చేశారు. దేశ రాజధాని ఢిల్లీతో పాటు పలు ప్రధాన నగరాల్లో విద్యార్థి, యువజన సంఘాలు చేపట్టిన నిరసనలతో దేశవ్యాప్తంగా వాతావరణం వేడెక్కింది.

ఇటీవలే ఢిల్లీ వేదికగా నిర్వహించిన 'సంసద్ చలో' మార్చ్‌తో ఈ ఆందోళనలు మరింత ఉద్ధృతంగా మారాయి. 'కాక్‌రోచ్ జనతా పార్టీ' (CJP) మరియు ఇతర యువజన సంఘాల ఆధ్వర్యంలో వేలాది మంది విద్యార్థులు పార్లమెంట్ వైపు దూసుకెళ్లేందుకు ప్రయత్నించగా, పోలీసులు భద్రతా కారణాల రీత్యా వారిని అడ్డుకుని ప్రతిఘటించిన పలువురిని అదుపులోకి తీసుకున్నారు. ఈ ఘర్షణ వాతావరణం, అరెస్టులపై ప్రతిపక్ష నాయకులు, ప్రముఖ విద్యావేత్తలతో పాటు పలువురు సినీ ప్రముఖుల నుంచి తీవ్ర స్థాయిలో విమర్శలు వ్యక్తమవుతున్నాయి. ఈ పరిణామాలపై నటి జ్యోతిక తన అధికారిక ఇన్‌స్టాగ్రామ్ ఖాతా వేదికగా స్పందిస్తూ నిరసనకారులకు, విద్యార్థులకు బలమైన సంఘీభావం తెలిపారు. "కేంద్ర విద్యాశాఖ మంత్రి ధర్మేంద్ర ప్రధాన్ గారు తక్షణమే తన పదవి నుంచి తప్పుకోవాలి, రాజీనామా చేయాలి.

మన దేశ భవిష్యత్తు అయిన విద్యార్థుల తరఫున నేను దృఢంగా నిలబడతాను. ప్రజాస్వామ్య భారతదేశం మరియు విద్యా వ్యవస్థలో ప్రాథమిక సంస్కరణల పునర్నిర్మాణానికి నేను కట్టుబడి ఉన్నాను" అని ఆమె తన పోస్ట్‌లో రాసుకొచ్చారు. దేశంలోని నేటి తరం యువత (Gen-Z) ఏమాత్రం భయపడకుండా పారదర్శకత కోసం గళమెత్తడం చూస్తుంటే ఎంతో గర్వంగా ఉందని జ్యోతిక కొనియాడారు. ఈ విద్యా ఉద్యమాన్ని ముందుండి నడిపిస్తున్న సీజేపీ (CJP) ప్రతినిధులు అభిజిత్ దీప్కే, సౌరవ్ దాస్‌లతో పాటు సుదీర్ఘకాలంగా విద్యా సంస్కరణల కోసం నిరాహార దీక్ష చేపట్టిన ప్రసిద్ధ సామాజిక ఉద్యమకారుడు సోనమ్ వాంగ్‌చుక్‌ల పోరాట పటిమను ఆమె ప్రత్యేకంగా ప్రశంసించారు.

"తల్లులుగా మా పిల్లలను కూడా మీలాగే సమాజం పట్ల బాధ్యతగా, ధైర్యంగా పెంచాలని భావిస్తున్నాం. యువతలో నిర్భయత్వాన్ని నింపినందుకు సీజేపీ బృందానికి నా కృతజ్ఞతలు" అని ఆమె పేర్కొన్నారు. తమిళనాడు రాష్ట్రంలో తొలినుంచి నీట్ పరీక్షా విధానంపై తీవ్ర వ్యతిరేకత మరియు రాజకీయ ఉద్యమాలు నడుస్తున్న సంగతి విదితమే. ప్రస్తుతం దక్షిణాదిలో మంచి గుర్తింపు ఉన్న సీనియర్ నటి జ్యోతిక నేరుగా కేంద్ర మంత్రి రాజీనామాను డిమాండ్ చేస్తూ చేసిన ఈ వ్యాఖ్యలు డిజిటల్ మీడియాలో, జాతీయ స్థాయిలో తీవ్ర సంచలనంగా మారాయి. పరీక్షల నిర్వహణలో పారదర్శకత, నేషనల్ టెస్టింగ్ ఏజెన్సీ (NTA) జవాబుదారీతనంపై సమగ్ర విచారణ జరగాలని సినీ, రాజకీయ ప్రముఖులు కోరుతున్న వేళ, జ్యోతిక మద్దతు ఈ ఉద్యమానికి మరింత మైలేజ్ ఇచ్చిందని విశ్లేషకులు భావిస్తున్నారు.