అమెరికా అధ్యక్షుడు డొనాల్డ్ ట్రంప్ వలస విధానాన్ని మరింత కఠినతరం చేస్తూ కీలక నిర్ణయాలు తీసుకున్నారు. దేశ భద్రతను బలోపేతం చేయడం, అనధికార వలసలను అరికట్టడం, విదేశీయుల ప్రవేశంపై కఠిన నిఘానం పెట్టడం లక్ష్యంగా ఈ చర్యలు చేపట్టారు. ముఖ్యంగా అభివృద్ధి చెందని మరియు భద్రతా ప్రమాదాలు ఉన్న దేశాల నుంచి వలసలను నియంత్రించడంపై ట్రంప్ ప్రభుత్వం దృష్టి సారించింది.
వాషింగ్టన్ డీసీలోని వైట్ హౌస్ సమీపంలో ఇద్దరు నేషనల్ గార్డులపై ఆఫ్ఘన్ జాతీయుడు కాల్పులు జరిపిన ఘటన తర్వాత ఈ నిర్ణయాలు తీసుకున్నట్లు అధికారులు తెలిపారు. ఈ సంఘటన దేశీయ భద్రతపై ఆందోళనలను పెంచడంతో, ట్రంప్ ప్రభుత్వం మరింత కఠిన చర్యలకు సిద్ధమైంది. ఈ నేపథ్యంలో 30 కొత్త దేశాలపై ట్రావెల్ బ్యాన్ విధించనున్నట్లు అధ్యక్షుడు ప్రకటించారు.
హోమ్ల్యాండ్ సెక్యూరిటీ డిపార్ట్మెంట్ ప్రకారం, ఇప్పటికే 19 దేశాలపై ప్రయాణ నిషేధం అమల్లో ఉంది. తాజాగా ఈ జాబితాలో ఆఫ్ఘనిస్తాన్, బర్మా, చాద్, రిపబ్లిక్ ఆఫ్ కాంగో, ఈక్వటోరియల్ గినియా, ఎరిట్రియా, హైతీ, ఇరాన్, లిబియా, సోమాలియా, సుడాన్, యెమెన్ వంటి దేశాలు చేరనున్నాయి. ఈ దేశాల పౌరులు ఇకపై అమెరికాలో ప్రవేశించలేరు.
అదే సమయంలో కొన్ని దేశాలపై పాక్షిక ఆంక్షలు విధించారు. బురుండి, క్యూబా, లావోస్, సియెర్రా లియోన్, టోగో, తుర్క్మెనిస్తాన్, వెనిజులా వంటి దేశాల పౌరులకు పరిమిత స్థాయిలోనే వీసాలు జారీ చేయనున్నారు. అలాగే కొత్తగా బుర్కినా ఫాసో, మాలి, నైగర్, దక్షిణ సూడాన్, సిరియా దేశాలను కూడా పూర్తి నిషేధ జాబితాలో చేర్చారు. ఈ దేశాలకు సంబంధించిన వీసా మరియు ఇమ్మిగ్రేషన్ ప్రక్రియలు తక్షణమే నిలిపివేశారు.
ఇంకా 15 ఇతర దేశాలను పాక్షిక ఆంక్షల జాబితాలో చేర్చారు. నైజీరియా, టాంజానియా, సెనెగల్ వంటి దేశాల నుంచి వచ్చే ప్రయాణికులు కఠినమైన భద్రతా తనిఖీలను ఎదుర్కోవాల్సి ఉంటుంది. కొన్ని ప్రత్యేక వీసా కేటగిరీలపై కూడా పరిమితులు విధించారు. ఈ నిర్ణయాలు అమెరికా వలస మరియు భద్రతా విధానాల్లో గణనీయమైన మార్పులకు సంకేతంగా విశ్లేషకులు భావిస్తున్నారు.
