New Tires: టైర్లపై వెంట్రుకల్లాంటి రబ్బర్ ముళ్ళు... అసలు కథ ఏంటో తెలిస్తే ఆశ్చర్యపోతారు!

టైర్లపై ఉండే రబ్బర్ స్పైక్స్ వల్ల ప్రయోజనాలు ఏంటి...

టైర్లపై వెంట్రుకల్లాంటి రబ్బర్ ముళ్ళు...

ఆటోమొబైల్ ఇంజనీరింగ్ అద్భుతం గురించి పూర్తిగా...

New Tires: మనం కొత్త కారు లేదా బైక్ కొన్నప్పుడు, లేదా పాత వాహనానికి కొత్త టైర్లు వేయించినప్పుడు వాటి ఉపరితలంపై చిన్న చిన్న రబ్బర్ ఈనెలు లేదా వెంట్రుకల్లాంటి ఆకారాలు (Rubber Hairs) కనిపించడం సహజం. చాలామంది వాహనదారులు వీటిని కేవలం ఒక డిజైన్ అని లేదా టైర్ నాణ్యతకు సంకేతమని భావిస్తుంటారు. మరికొందరైతే ఇవి టైర్ రోడ్డుపై బాగా పట్టు సాధించడానికి (Grip) ఉపయోగపడతాయని అనుకుంటారు. అయితే, సాంకేతిక భాషలో వీటిని 'వెంచురా స్ప్యూస్' (Ventura Sprues) లేదా 'స్ప్యూ పిన్స్' అని పిలుస్తారు. అసలు ఇవి ఎందుకు ఏర్పడతాయి, వీటి ప్రయోజనం ఏంటో ఆటోమొబైల్ నిపుణుల మాటల్లో తెలుసుకుందాం.

టైర్ల తయారీ విధానం (Molding Process): రబ్బర్ తయారీ ప్రక్రియలోనే ఈ చిన్న ఈనెలు ఏర్పడతాయి. సాధారణంగా టైర్‌ను తయారు చేసేటప్పుడు ద్రవ రూపంలో ఉన్న వేడి రబ్బరును ఒక ప్రత్యేకమైన డై లేదా మోల్డ్ (Mold) లోకి అధిక పీడనం (Pressure) ద్వారా ఇంజెక్ట్ చేస్తారు. ఈ ప్రక్రియలో రబ్బరు ప్రవహించేటప్పుడు మోల్డ్ లోపల గాలి బుడగలు (Air Bubbles) చిక్కుకుపోయే అవకాశం ఉంది. రబ్బరులో గాలి చిక్కుకుంటే టైర్‌లో రంధ్రాలు ఏర్పడి, దాని బలం తగ్గడమే కాకుండా త్వరగా పగిలిపోయే ప్రమాదం ఉంది.

'స్ప్యూ పిన్స్' నిర్వహించే కీలక పాత్ర: మోల్డ్ లోపల గాలి బయటకు వెళ్లడానికి చిన్న చిన్న రంధ్రాలను ఏర్పాటు చేస్తారు. ద్రవ రబ్బరును పంపినప్పుడు, లోపలి గాలి అంతా ఈ చిన్న రంధ్రాల ద్వారా బయటకు వచ్చేస్తుంది. గాలితో పాటు స్వల్ప పరిమాణంలో రబ్బరు కూడా ఆ రంధ్రాల నుంచి బయటకు వచ్చి వెంటనే గడ్డకడుతుంది. మోల్డ్ నుంచి టైర్‌ను బయటకు తీసినప్పుడు ఈ గడ్డకట్టిన రబ్బరే చిన్న వెంట్రుకల్లా (Rubber Hairs) మనకు కనిపిస్తుంది. ఇది తయారీ ప్రక్రియలో సహజంగా జరిగే పరిణామం మాత్రమే.

వాటి వల్ల ఏదైనా ప్రయోజనం ఉందా?: చాలామంది అనుకుంటున్నట్లు ఈ రబ్బర్ ఈనెల వల్ల టైర్ గ్రిప్ పెరగడం కానీ, రోడ్డుపై వాహనం వేగంగా వెళ్లడం కానీ జరగదు. అలాగే ఇవి మైలేజ్‌పై కూడా ఎటువంటి ప్రభావం చూపవు. టైర్ తయారీ పూర్తయిన తర్వాత ఇవి కేవలం ఆ టైర్ 'కొత్తది' అని చెప్పడానికి ఒక సూచికగా మాత్రమే పనిచేస్తాయి. వాహనం కొంతకాలం రోడ్డుపై తిరిగిన తర్వాత ఇవి రాపిడి వల్ల వాటంతట అవే ఊడిపోతాయి.

వాటిని తెంపేయవచ్చా?: కొత్త టైర్లపై ఉన్న రబ్బర్ వెంట్రుకలను అలాగే వదిలేసినా లేదా తుంచేసినా టైర్ పనితీరులో ఎలాంటి మార్పు ఉండదు. అయితే బ్లేడ్లు లేదా కత్తెర్లు ఉపయోగించి వాటిని కత్తిరించేటప్పుడు జాగ్రత్తగా ఉండాలి. పొరపాటున కత్తెరు టైర్ ప్రధాన రబ్బరు భాగానికి తగిలితే టైర్ దెబ్బతినే ప్రమాదం ఉంది. కాబట్టి వాటిని అలాగే వదిలేయడమే మంచిదని నిపుణులు సూచిస్తున్నారు.