- డాలర్ ఇండెక్స్ జోరు.. రూపాయి బేజారు: అంతర్జాతీయ మార్కెట్లో బలపడుతున్న అమెరికన్ కరెన్సీ..
- Business: "లాభాలతో మొదలై.. నష్టాలతో ముగిసి": 130 పైసల రికవరీని నిలబెట్టుకోలేకపోయిన రూపాయి..
Rupee vs Dollar: అంతర్జాతీయ మార్కెట్లలో నెలకొన్న అనిశ్చితి భారత కరెన్సీపై తీవ్ర ప్రభావాన్ని చూపుతోంది. సోమవారం నాటి ట్రేడింగ్లో అమెరికన్ డాలర్తో రూపాయి మారకం విలువ మునుపెన్నడూ లేని విధంగా ఆల్టైమ్ కనిష్ఠ స్థాయికి పడిపోయి సరికొత్త రికార్డును నమోదు చేసింది. ఒక దశలో డాలర్తో రూపాయి విలువ 95.14 వద్దకు చేరుకోవడం ఇన్వెస్టర్లను ఆందోళనకు గురిచేసింది. రూపాయి చరిత్రలో 95 స్థాయికి పడిపోవడం ఇదే మొదటిసారి కావడం గమనార్హం. వాస్తవానికి గత వారం కనిష్ఠాల నుంచి కోలుకున్న రూపాయి, ఈరోజు ఉదయం సెషన్ ప్రారంభంలో 130 పైసలు లాభపడి 93.59 వద్ద ట్రేడింగ్ను ఆశాజనకంగానే ప్రారంభించింది. అయితే, రోజు ముగిసే సమయానికి అమ్మకాల ఒత్తిడి పెరగడంతో తిరిగి భారీ నష్టాల్లోకి జారుకుని చారిత్రాత్మక కనిష్ఠానికి పరిమితమైంది.
రూపాయి ఇంతటి బలహీనతను మూటగట్టుకోవడానికి అంతర్జాతీయంగా నెలకొన్న భౌగోళిక రాజకీయ పరిణామాలు ప్రధాన కారణమని విశ్లేషకులు భావిస్తున్నారు. ముఖ్యంగా పశ్చిమాసియాలో కొనసాగుతున్న యుద్ధం కారణంగా ముడి చమురు ధరలు ఆకాశాన్ని తాకుతున్నాయి. అంతర్జాతీయ మార్కెట్లో బ్రెంట్ క్రూడాయిల్ ధర బ్యారెల్కు 109 డాలర్ల మార్కును దాటడం భారత ఆర్థిక వ్యవస్థపై భారంగా మారింది. చమురు దిగుమతుల కోసం డాలర్లకు గిరాకీ పెరగడం, అదే సమయంలో విదేశీ పోర్ట్ఫోలియో ఇన్వెస్టర్లు (FPIs) భారత మార్కెట్ల నుంచి పెద్ద ఎత్తున పెట్టుబడులను ఉపసంహరించుకోవడం రూపాయి పతనానికి దారితీసింది. ప్రపంచవ్యాప్తంగా డాలర్ ఇండెక్స్ బలోపేతం కావడం కూడా రూపాయిని ఒత్తిడిలోకి నెట్టింది.
గణాంకాల ప్రకారం, ఈ ఒక్క నెలలోనే విదేశీ పెట్టుబడిదారులు భారత మార్కెట్ల నుంచి సుమారు 11.5 బిలియన్ డాలర్ల నిధులను వెనక్కి తీసుకున్నట్లు తెలుస్తోంది. గత శుక్రవారం ఒక్కరోజే విదేశీ ఇన్వెస్టర్లు సుమారు రూ.850 కోట్ల విలువైన ప్రభుత్వ సెక్యూరిటీలను విక్రయించడం మార్కెట్ సెంటిమెంట్ను దెబ్బతీసింది. దేశీయ ఈక్విటీ మార్కెట్లలో కొనసాగుతున్న అమ్మకాలు, అంతర్జాతీయంగా డాలర్కు పెరుగుతున్న డిమాండ్ వెరసి రూపాయిని కోలుకోలేని స్థితికి తీసుకెళ్లాయి. భవిష్యత్తులో రూపాయి మరింత పతనం కాకుండా ఉండేందుకు భారత రిజర్వ్ బ్యాంక్ (RBI) జోక్యం చేసుకునే అవకాశం ఉందని మార్కెట్ వర్గాలు అంచనా వేస్తున్నాయి.
