Nara Lokesh: బళ్లారికి చేరుకున్న మంత్రి నారా లోకేష్.. సుజ్లాన్ పవన విద్యుత్ ప్రాజెక్టులకు నేడు శంకుస్థాపన!

అనంతపురంలో రూ.10 వేల కోట్ల సుజ్లాన్ ప్రాజెక్టులు.. 4 వేల మందికి ఉద్యోగాలు..

సుజ్లాన్ S144 బ్లేడ్ ప్రొడక్షన్ లైన్లను ప్రారంభించనున్న నారా లోకేష్..

బళ్లారి: ఆంధ్రప్రదేశ్ విద్య, ఐటీ శాఖల మంత్రి నారా లోకేష్ బళ్లారిలోని జిందాల్ విజయ్‌నగర్ ఎయిర్‌పోర్టుకు చేరుకున్నారు. ఈ సందర్భంగా ఆయనకు కర్ణాటక మంత్రి నాగేంద్ర, ఏపీ ఆర్థిక మంత్రి పయ్యావుల కేశవ్, ఎంపీలు బీకే పార్థసారథి, అంబికా లక్ష్మీనారాయణ, ఎమ్మెల్యేలు దగ్గుపాటి ప్రసాద్, అమిలినేని సురేంద్రబాబు, పల్లె సింధూర రెడ్డి తదితరులు ఘన స్వాగతం పలికారు.

ఏపీఐఐసీ డైరెక్టర్ చల్లా లక్ష్మీ ప్రసాద్, టీడీపీ ఆర్గనైజింగ్ సెక్రటరీ ఉమర్‌తో పాటు టీడీపీ నాయకులు, కార్యకర్తలు కూడా మంత్రి లోకేష్‌కు స్వాగతం పలికిన వారిలో ఉన్నారు.

సుజ్లాన్ బ్లేడ్ స్టాక్ యార్డుకు మంత్రి సందర్శన
బళ్లారి మండలం హలకుందిలోని సుజ్లాన్ బ్లేడ్ స్టాక్ యార్డును మంత్రి నారా లోకేష్ సందర్శించనున్నారు. అక్కడ పవన విద్యుత్‌ పరికరాల తయారీ, నిల్వకు సంబంధించిన అంశాలను పరిశీలించనున్నారు. అనంతరం అనంతపురం జిల్లా రాయదుర్గం నియోజకవర్గం కణేకల్లు మండలం హులికెర గ్రామంలో ఏర్పాటు చేయనున్న సుజ్లాన్ విండ్ పవర్ ప్రాజెక్టులకు మంత్రి శంకుస్థాపన చేయనున్నారు.

S144 కొత్త బ్లేడ్ ప్రొడక్షన్ లైన్లు ప్రారంభం
పవన విద్యుత్ ప్రాజెక్టులకు శంకుస్థాపన చేయడంతో పాటు సుజ్లాన్ S144 న్యూ బ్లేడ్ ప్రొడక్షన్ లైన్స్‌ను మంత్రి నారా లోకేష్ ప్రారంభించనున్నారు. ఈ కార్యక్రమంతో అనంతపురం జిల్లాలో పవన విద్యుత్ రంగానికి మరింత ఊపు వస్తుందని అధికారులు, పారిశ్రామిక వర్గాలు భావిస్తున్నాయి.

సుజ్లాన్ సంస్థ అనంతపురం జిల్లాలో భారీ పెట్టుబడులతో పవన విద్యుత్ ప్రాజెక్టులను ఏర్పాటు చేయడానికి ముందుకు వచ్చింది. మొత్తం రూ.10 వేల కోట్ల పెట్టుబడితో 1,325 మెగావాట్ల సామర్థ్యంతో విండ్ పవర్ ప్రాజెక్టులను ఏర్పాటు చేయనున్నట్లు వెల్లడించింది.

4 వేల మందికి ఉద్యోగ, ఉపాధి అవకాశాలు
ఈ ప్రాజెక్టుల ద్వారా ప్రత్యక్షంగా, పరోక్షంగా సుమారు 4 వేల మందికి ఉద్యోగ, ఉపాధి అవకాశాలు లభించనున్నాయి. భారీ పెట్టుబడులతో పాటు స్థానికంగా ఉపాధి అవకాశాలు పెరగడం ఈ ప్రాజెక్టుల ప్రధాన ప్రయోజనాల్లో ఒకటిగా నిలవనుంది. పవన విద్యుత్ ఉత్పత్తి, పరికరాల తయారీ, అనుబంధ పరిశ్రమల అభివృద్ధితో అనంతపురం ప్రాంతంలో పునరుత్పాదక ఇంధన రంగానికి మరింత ప్రాధాన్యం లభించే అవకాశం ఉంది.

లోకేష్‌కు ఘన స్వాగతం 
మరోవైపు బళ్లారి మండలం కుడితినిలో మంత్రి నారా లోకేష్‌కు స్థానిక తెలుగు ప్రజలు, యువత, టీడీపీ అభిమానులు ఘన స్వాగతం పలికారు. స్థానిక తెలుగు సంఘాల ఆధ్వర్యంలో భారీ గజమాలతో మంత్రిని సత్కరించారు. మంత్రి లోకేష్ రాక సందర్భంగా యువత పెద్దఎత్తున బాణసంచా కాల్చి సంబరాలు చేసుకున్నారు. దీంతో కుడితినిలో సందడి వాతావరణం నెలకొంది. సుజ్లాన్ ప్రాజెక్టులకు శంకుస్థాపన, కొత్త బ్లేడ్ ఉత్పత్తి లైన్ల ప్రారంభంతో అనంతపురం జిల్లాలో పునరుత్పాదక ఇంధన రంగంలో కొత్త పెట్టుబడులకు మార్గం సుగమం కానుంది.