రాష్ట్రంలో మరో రెండు రోజులు వర్షాలు.. ప్రజలు అప్రమత్తంగా ఉండాలని విపత్తుల నిర్వహణ సంస్థ సూచన!

పలు జిల్లాల్లో పిడుగులతో కూడిన వర్షాలకు అవకాశం.. ఈదురుగాలులపై హెచ్చరికలు..

ఏపీలో వర్షాలపై అలర్ట్.. ఈదురుగాలుల నేపథ్యంలో జాగ్రత్తలు పాటించాలి..

అమరావతి: ఆంధ్రప్రదేశ్లో మరో రెండు రోజుల పాటు వర్షాలు కొనసాగనున్నాయని రాష్ట్ర విపత్తుల నిర్వహణ సంస్థ వెల్లడించింది. ఉత్తరాంధ్ర తీర ప్రాంతం నుంచి ఛత్తీస్గఢ్ మీదుగా మహారాష్ట్ర వరకు ఒక ద్రోణి విస్తరించి ఉందని, మరో ద్రోణి అంతర్గత కర్ణాటక నుంచి రాయలసీమ, తమిళనాడు మీదుగా కొమోరిన్ ప్రాంతం వరకు కొనసాగుతోందని సంస్థ మేనేజింగ్ డైరెక్టర్ ప్రఖర్ జైన్ తెలిపారు.

ఈ వాతావరణ పరిస్థితుల ప్రభావంతో రాష్ట్రంలో మేఘావృతమైన వాతావరణం కొనసాగుతుందని, అక్కడక్కడ చెదురుమదురు వర్షాలు కురిసే అవకాశం ఉందని పేర్కొన్నారు. కొన్ని ప్రాంతాల్లో మోస్తరు నుంచి భారీ వర్షాలు పడే అవకాశం ఉందని, ఈదురుగాలులు కూడా వీచే అవకాశం ఉన్నందున ప్రజలు అప్రమత్తంగా ఉండాలని సూచించారు.

జూన్ 29 సోమవారం కోస్తాంధ్ర జిల్లాల్లో అక్కడక్కడ పిడుగులతో కూడిన తేలికపాటి నుంచి మోస్తరు వర్షాలు కురిసే అవకాశం ఉందని అధికారులు తెలిపారు. రాయలసీమ జిల్లాల్లో కొన్ని ప్రాంతాల్లో తేలికపాటి వర్షాలు పడే అవకాశం ఉందన్నారు.

జూన్ 30 మంగళవారం శ్రీకాకుళం, విజయనగరం, మన్యం, పోలవరం, కాకినాడ, కోనసీమ, తూర్పుగోదావరి, పశ్చిమగోదావరి, ఏలూరు, ఎన్టీఆర్ జిల్లాల్లో అక్కడక్కడ పిడుగులతో కూడిన తేలికపాటి నుంచి మోస్తరు వర్షాలు కురిసే అవకాశం ఉందని తెలిపారు. మిగతా జిల్లాల్లో కొన్ని ప్రాంతాల్లో తేలికపాటి వర్షాలు పడే అవకాశం ఉందని విపత్తుల నిర్వహణ సంస్థ వెల్లడించింది.

ఆదివారం సాయంత్రం 4 గంటల వరకు రాష్ట్రంలోని పలు ప్రాంతాల్లో వర్షపాతం నమోదైంది. గుంటూరు జిల్లా మంగళగిరిలో 68.2 మిల్లీమీటర్లు, విజయనగరం జిల్లా రాజాంలో 52.5 మిల్లీమీటర్లు, గుంటూరు జిల్లా కాకుమానులో 51.5 మిల్లీమీటర్లు, తాడేపల్లిలో 45.2 మిల్లీమీటర్లు, ఎన్టీఆర్ జిల్లా కవులూరులో 41.5 మిల్లీమీటర్లు, బాపట్ల జిల్లా భట్టిప్రోలులో 39.9 మిల్లీమీటర్ల వర్షం నమోదైనట్లు అధికారులు తెలిపారు.

ఈదురుగాలులు, ఉరుములతో కూడిన వర్షం సమయంలో ప్రజలు చెట్ల కింద, భారీ హోర్డింగ్స్ సమీపంలో నిలబడవద్దని అధికారులు సూచించారు. వర్షపు గాలుల కారణంగా విద్యుత్ వైర్లు తెగిపడే అవకాశం ఉన్నందున ప్రజలు వాటికి దూరంగా ఉండాలని హెచ్చరించారు.

ఆకాశం మేఘావృతమై ఉరుములు వినిపించిన వెంటనే పొలాల్లో పనిచేసే రైతులు, కూలీలు, పశువుల కాపరులు అప్రమత్తమై సురక్షిత ప్రాంతాలకు వెళ్లాలని సూచించారు. ప్రజలు వాతావరణ పరిస్థితులను గమనిస్తూ జాగ్రత్తలు పాటించాలని విపత్తుల నిర్వహణ సంస్థ కోరింది.