స్పేస్ సెక్టార్ హబ్‌గా ఏపీ.. రూ.1.41 లక్షల కోట్ల పెట్టుబడి!

• మొత్తం 11 ఎంఓయూలు, ఒక జీవో జారీ ద్వారా రాష్ట్రానికి 10,919 కొత్త ఉద్యోగావకాశాలు!

• 1400 మెగావాట్ల డేటా సెంటర్, టెలికాం సెంటర్ల కోసం రూ. 1,03,018 కోట్లతో ఎయిర్ ట్రంక్ ఇండియా–జేసీకే ఇన్ఫ్రా భారీ ఒప్పందం!

• తిరుపతిలో ఆర్బిటల్ డేటా సెంటర్, రాకెట్ ఫ్యాక్టరీ ఏర్పాటుకు రూ. 510 కోట్లతో అగ్నికుల్ కాస్మోస్ ముందడుగు!

Visakhapatnam: విశాఖపట్నంలో నిర్వహిస్తున్న సీఐఐ భాగస్వామ్య సదస్సు రెండో రోజున ఆంధ్రప్రదేశ్ ప్రభుత్వం సరికొత్త రికార్డును నెలకొల్పింది. ముఖ్యమంత్రి నారా చంద్రబాబు నాయుడు సమక్షంలో ఏపీసీఆర్డీఏ (APCRDA), ఏపీ మారిటైమ్ బోర్డు, ఐటీ ఎలక్ట్రానిక్స్ మరియు ప్రతిష్ఠాత్మక పీ4 (P4) రంగాలకు సంబంధించి మొత్తం రూ. 1,41,585 కోట్ల విలువైన పెట్టుబడి ఒప్పందాలు కుదిరాయి. 11 అవగాహనా ఒప్పందాలు (MoUs) మరియు ఒక జీవో జారీ ద్వారా రాష్ట్రానికి ఈ భారీ నిధులు తరలిరానుండగా, వీటి ద్వారా ప్రత్యక్షంగా 10,919 మందికి ఉపాధి లభించనుంది.

డేటా సెంటర్, మైనింగ్ & ఇంధన రంగాల్లో దిగ్గజ కంపెనీలు

రెండో రోజు ఒప్పందాల్లో అతిపెద్ద పెట్టుబడిగా 1400 మెగావాట్ల డేటా సెంటర్, టెలికాం సెంటర్ల ఏర్పాటుకు ఎయిర్ ట్రంక్ ఇండియా–జేసీకే ఇన్ఫ్రా సంస్థలు ఏకంగా రూ. 1,03,018 కోట్ల ఒప్పందం చేసుకున్నాయి (3,120 ఉద్యోగాలు). అలాగే ప్రకాశం జిల్లా కందుకూరులో మైనింగ్ కార్యకలాపాల కోసం హిందాల్కో గ్రూప్ రూ. 15,000 కోట్లు (2,500 ఉద్యోగాలు), పునరుత్పాదక ఇంధన రంగంలో గ్రీన్ జెన్ రెన్యూబుల్ ఎనర్జీ రూ. 8,000 కోట్లు, ఇండియన్ ఆయిల్ కార్పొరేషన్ రూ. 6,600 కోట్లు పెట్టుబడి పెట్టనున్నాయి. వీటితో పాటు కాకినాడ సీపోర్ట్ రూ. 6,452 కోట్లు (852 ఉద్యోగాలు), డిక్సన్ టెక్నాలజీస్ రూ. 700 కోట్లు (2,300 ఉద్యోగాలు), అమరావతి పరిధిలో ఒబెరాయ్ హోటల్స్ గ్రూప్ రూ. 175 కోట్ల (150 ఉద్యోగాలు) ప్రాజెక్టులకు సంతకాలు చేశాయి. 

అంతరిక్ష & రక్షణ పరిశ్రమల కేంద్రంగా తిరుపతి

తిరుపతిని దేశంలోనే కీలకమైన స్పేస్, డిఫెన్స్ సెక్టార్‌గా మార్చే దిశగా ప్రభుత్వం కీలక అడుగులు వేసింది. తిరుపతి జిల్లాలో ఆర్బిటల్ డేటా సెంటర్ మరియు రాకెట్ ఫ్యాక్టరీ ఏర్పాటుకు అగ్నికుల్ కాస్మోస్ లిమిటెడ్ రూ. 510 కోట్ల పెట్టుబడితో ఒప్పందం చేసుకోగా (350 ఉద్యోగాలు), ఏరోస్పేస్-డిఫెన్స్ రంగంలో హాథోర్ రాకెట్ ప్రైవేట్ లిమిటెడ్ రూ. 250 కోట్లతో (200 ఉద్యోగాలు) ముందుకొచ్చింది. తిరుపతి వద్ద అంతరిక్ష, రక్షణ పరిశ్రమల ఏర్పాటు కోసం 5,000 ఎకరాల భూమిని సిద్ధంగా ఉంచామని సీఎం చంద్రబాబు వెల్లడించారు.

పేదరిక నిర్మూలనకు 'పీ4' (P4) ఒప్పందాలు – ఐటీసీ, హీరో మోటార్స్ చేయూత

రాష్ట్రంలో అత్యంత పేద కుటుంబాల జీవన ప్రమాణాలను పెంచేందుకు సీఎం ప్రారంభించిన పీ4 (పీపుల్, ప్రైవేట్, పబ్లిక్ పార్ట్‌నర్‌షిప్) కార్యక్రమానికి కార్పొరేట్ దిగ్గజాలు అండగా నిలిచాయి. రాష్ట్రవ్యాప్తంగా 100 గ్రామాల్లోని 25,000 'బంగారు కుటుంబాలను' దత్తత తీసుకుని, వారి జీవనోపాధిని మెరుగుపరిచే బాధ్యతను ఐటీసీ లిమిటెడ్ చేపట్టింది. మరోవైపు 28 జిల్లాల్లోని 1,120 మంది ట్రిపుల్ ఐటీ (IIIT) విద్యార్థులకు 'బ్రిజ్ మోహన్ లాల్ ముంజాల్ స్కాలర్‌షిప్' ద్వారా రూ. 32.48 కోట్ల ఆర్థిక సహాయం అందించేందుకు హీరో మోటార్స్ కార్పొరేషన్, స్వర్ణాంధ్ర ఫౌండేషన్‌తో ఒప్పందం చేసుకుంది.

ఒప్పందాలు కాగితాలకే పరిమితం కావొద్దు: సీఎం చంద్రబాబు దిశానిర్దేశం

ఈ సందర్భంగా సీఎం చంద్రబాబు మాట్లాడుతూ, కుదిరిన ఒప్పందాలన్నీ వేగంగా గ్రౌండింగ్ అయ్యేలా పారిశ్రామికవేత్తలు కృషి చేయాలని, ప్రభుత్వాన్నించి పూర్తి సహకారం ఉంటుందని భరోసా ఇచ్చారు. సెమీకండక్టర్లు, ఏఐ, క్వాంటం, ఏరోస్పేస్ రంగాల్లో నూతన ఆవిష్కరణలకు ఏపీని ప్రయోగశాలగా మలుచుకోవాలని ఐఐటీల వంటి విద్యాసంస్థలను ఆహ్వానించారు. సంపద సృష్టి ఫలాలు పేదలకు అందినప్పుడే సార్థకత చేకూరుతుందని, రాష్ట్రంలోని ప్రతి కుటుంబం హ్యాపీగా, హెల్దీగా, వెల్దీగా ఉండాలన్నదే తన లక్ష్యమని ఆయన పునరుద్ఘాటించారు.