Pawan Kalyan: పరిశ్రమల్లో 33 శాతం పచ్చదనం తప్పనిసరి.. పర్యావరణ పరిరక్షణకు పవన్ కళ్యాణ్ పిలుపు!

పరిశ్రమలు 33% గ్రీన్ కవర్ పాటించాలి.. ఉప ముఖ్యమంత్రి పవన్ కళ్యాణ్..

పచ్చదనం లేకుంటే పారిశ్రామిక ప్రగతికి అర్థం లేదు.. పవన్ కళ్యాణ్..

అమరావతి: రాష్ట్రంలో పారిశ్రామిక అభివృద్ధితో పాటు పర్యావరణ పరిరక్షణకు సమాన ప్రాధాన్యం ఇవ్వాలని ఉప ముఖ్యమంత్రి, అటవీ, పర్యావరణ శాఖల మంత్రి పవన్ కళ్యాణ్ అన్నారు. రాష్ట్రంలోని అన్ని పరిశ్రమలు పర్యావరణ నిబంధనలను కచ్చితంగా పాటించాలని సూచించారు. ప్రతి పరిశ్రమ తన ప్రాంగణంలో కనీసం 33 శాతం పచ్చదనాన్ని అభివృద్ధి చేసి, నిరంతరం సంరక్షించాల్సిన బాధ్యత తీసుకోవాలని పిలుపునిచ్చారు.

పరిశ్రమల యాజమాన్యాలు 33 శాతం పచ్చదనం నిబంధనను కేవలం ప్రభుత్వ ఆదేశంగా కాకుండా సామాజిక బాధ్యతగా భావించాలని పవన్ కళ్యాణ్ సూచించారు. ఆర్థిక ప్రగతికి పరిశ్రమలు ఎంత అవసరమో.. స్వచ్ఛమైన గాలి, ఆరోగ్యకరమైన వాతావరణం కూడా అంతే ముఖ్యమని ఆయన పేర్కొన్నారు.

కాలుష్య నియంత్రణకు పచ్చదనం కీలకం
పరిశ్రమల పరిసరాల్లో విస్తృతంగా మొక్కలు నాటడం ద్వారా వాయు కాలుష్యాన్ని తగ్గించవచ్చని పవన్ కళ్యాణ్ తెలిపారు. పచ్చదనం పెంపుతో వాతావరణ మార్పుల ప్రభావాన్ని కూడా కొంతమేర తగ్గించేందుకు అవకాశం ఉంటుందని చెప్పారు.

భావితరాలకు ఆరోగ్యకరమైన, స్వచ్ఛమైన, పచ్చని భవిష్యత్తును అందించడం ప్రస్తుత తరంపై ఉన్న బాధ్యత అని అన్నారు. పరిశ్రమలు తమ కార్పొరేట్ సామాజిక బాధ్యతలో భాగంగా పచ్చదనం పెంపు కార్యక్రమాలను మరింత విస్తృతంగా చేపట్టాలని కోరారు.

అభివృద్ధి, ప్రకృతి పరిరక్షణ రెండూ సమాంతరంగా సాగినప్పుడే స్థిరమైన ప్రగతి సాధ్యమవుతుందని ఉప ముఖ్యమంత్రి స్పష్టం చేశారు. పరిశ్రమల అభివృద్ధి వల్ల ఆర్థిక వ్యవస్థ బలోపేతం కావడంతో పాటు పర్యావరణ సమతుల్యత కూడా కాపాడాల్సిన అవసరం ఉందన్నారు.

3,400 పరిశ్రమలకు వర్తించే నిబంధన
2026 గణాంకాల ప్రకారం రాష్ట్రవ్యాప్తంగా పోర్టులు, సిమెంట్, మైనింగ్, ఎనర్జీ, ఆహార శుద్ధి, ప్లాస్టిక్, పేపర్, వస్త్రాలు తదితర రంగాలకు చెందిన సుమారు 3,400 పరిశ్రమలు, కంపెనీలు వేలాది ఎకరాల్లో కార్యకలాపాలు నిర్వహిస్తున్నాయి.

ఈ పరిశ్రమలన్నీ 33 శాతం పచ్చదనం నిబంధనను అమలు చేసేలా చర్యలు తీసుకోవాలని పవన్ కళ్యాణ్ ఆదేశించారు. కాలుష్య నియంత్రణ మండలి, ఏపీ-గ్రీన్ సంస్థలు ఈ విషయంలో ప్రత్యేకంగా పర్యవేక్షించాలని సూచించారు.

26 పరిశ్రమల్లో 129 ఎకరాల్లో పైలట్ ప్రాజెక్టు
పచ్చదనం పెంపునకు సంబంధించి కాలుష్య నియంత్రణ మండలి ఇప్పటికే ప్రత్యేక కార్యక్రమాన్ని చేపట్టింది. 14 రోజుల పాటు నిర్వహించిన ప్రత్యేక డ్రైవ్‌లో భాగంగా తొలి విడత పైలట్ ప్రాజెక్టును 26 పరిశ్రమల్లో అమలు చేశారు.

ఈ కార్యక్రమం ద్వారా మొత్తం 129 ఎకరాల విస్తీర్ణంలో పచ్చదనం పెంపు పనులను విజయవంతంగా పూర్తి చేసినట్లు ప్రభుత్వం తెలిపింది. ఈ కార్యక్రమానికి సహకరించిన పరిశ్రమల యాజమాన్యాలను పవన్ కళ్యాణ్ అభినందించారు. ఇదే స్ఫూర్తితో రాష్ట్రంలోని మిగిలిన పరిశ్రమలు కూడా 33 శాతం పచ్చదనం లక్ష్యాన్ని సాధించేందుకు ముందుకు రావాలని ఆయన కోరారు.

విశాఖ పరిసర పరిశ్రమలపై ప్రత్యేక దృష్టి 
పట్టణాలకు సమీపంలో ఉన్న పరిశ్రమలు పర్యావరణ నిబంధనలను మరింత కఠినంగా అమలు చేయాలని పవన్ కళ్యాణ్ సూచించారు. ముఖ్యంగా విశాఖపట్నం వంటి నగరాల సమీపంలోని పరిశ్రమలు కాలుష్య ప్రభావం పట్టణ ప్రజలపై పడకుండా తగిన చర్యలు తీసుకోవాలని అన్నారు. అలాగే శ్రీ సిటీ, పరవాడ తదితర ప్రాంతాల్లోని ప్రత్యేక ఆర్థిక మండళ్లు (SEZలు) కూడా 33 శాతం పచ్చదనం నిబంధనను తప్పనిసరిగా అమలు చేయాలని స్పష్టం చేశారు.

2047 నాటికి 50 శాతం పచ్చదనం లక్ష్యం 
రాష్ట్రాన్ని ఆర్థికంగా అభివృద్ధి చేయడంతో పాటు పర్యావరణపరంగా కూడా మెరుగైన రాష్ట్రంగా తీర్చిదిద్దాలన్న లక్ష్యంతో ప్రభుత్వం ముందుకు సాగుతోందని పవన్ కళ్యాణ్ తెలిపారు. 2047 నాటికి రాష్ట్ర భూభాగంలో 50 శాతం పచ్చదనాన్ని సాధించాలన్న లక్ష్యంలో పారిశ్రామిక వర్గాలు చురుకైన భాగస్వాములు కావాలని పిలుపునిచ్చారు.

పరిశ్రమలు, ప్రభుత్వం, ప్రజలు కలిసి పనిచేసినప్పుడే ఈ లక్ష్యం సాధ్యమవుతుందని ఆయన పేర్కొన్నారు. నేటి అభివృద్ధి రేపటి తరాల జీవన ప్రమాణాలను దెబ్బతీయకుండా ఉండాలంటే ప్రకృతి పరిరక్షణకు ఇప్పటి నుంచే ప్రాధాన్యం ఇవ్వాలని స్పష్టం చేశారు.