ఆంధ్రప్రదేశ్ కేబినెట్ టెక్కలి నియోజకవర్గ విద్యార్థులకు శుభవార్త చెప్పింది. శ్రీకాకుళం జిల్లా కోటబొమ్మాళిలో కొత్తగా ప్రభుత్వ డిగ్రీ కళాశాల ఏర్పాటు చేయడానికి కేబినెట్ ఆమోదం తెలిపింది. ఈ కళాశాల వచ్చే విద్యా సంవత్సరం 2026–27 నుంచే ప్రారంభం కానుంది. శాశ్వత భవనాలు సిద్ధమయ్యే వరకు ప్రస్తుతం ఉన్న ప్రభుత్వ జూనియర్ కళాశాల భవనాన్ని తాత్కాలికంగా వినియోగించనున్నారు. ఈ నిర్ణయంతో స్థానిక విద్యార్థులు ఇకపై ఉన్నత విద్య కోసం దూర ప్రాంతాలకు వెళ్లాల్సిన అవసరం ఉండదు.
కళాశాల నిర్వహణ కోసం అవసరమైన బోధనా, బోధనేతర సిబ్బందిపై కూడా ప్రభుత్వం స్పష్టత ఇచ్చింది. జోన్–1లోని ఇతర డిగ్రీ కళాశాలల నుంచి 16 సర్ప్లస్ టీచింగ్ పోస్టులను బదిలీ చేయనున్నారు. అలాగే రెండు నాన్-టీచింగ్ పోస్టులను కూడా బదిలీ చేస్తారు. అదనంగా రోజువారీ పరిపాలన కోసం 9 మంది నాన్-టీచింగ్ సిబ్బందిని ఔట్సోర్సింగ్ పద్ధతిలో నియమించనున్నారు. ప్రిన్సిపాల్ బాధ్యతలను ఎఫ్ఏసీ పద్ధతిలో అప్పగిస్తారు. దీంతో కొత్త నియామకాలు తగ్గి, వేగంగా కళాశాల ప్రారంభానికి మార్గం సుగమమైంది.
ఇంతవరకు కోటబొమ్మాళి పరిసర ప్రాంతాల విద్యార్థులు డిగ్రీ చదువుల కోసం టెక్కలి, పలాస, శ్రీకాకుళం వంటి పట్టణాలకు వెళ్లాల్సి వచ్చేది. ఈ సమస్యను దృష్టిలో పెట్టుకుని ప్రభుత్వం ఈ కీలక నిర్ణయం తీసుకుంది. డిగ్రీ కళాశాల మంజూరుపై స్థానిక ప్రజలు ఆనందం వ్యక్తం చేస్తూ టపాసులు కాల్చారు. గతంలో వైఎస్సార్సీపీ ప్రభుత్వం ఈ కళాశాల మంజూరును రద్దు చేసిందని, 2024 ఎన్నికల హామీ మేరకు ఇప్పుడు దాన్ని అమలు చేశామని మంత్రి అచ్చెన్నాయుడు తెలిపారు. ముఖ్యమంత్రి చంద్రబాబు నాయుడు సహకారంతో ఈ ప్రతిపాదనకు ఆమోదం లభించిందని ఆయన కృతజ్ఞతలు తెలిపారు.
కోటబొమ్మాళిలో ప్రభుత్వ డిగ్రీ కళాశాల ఎప్పటి నుంచి ప్రారంభమవుతుంది?
వచ్చే విద్యా సంవత్సరం 2026–27 నుంచే తరగతులు ప్రారంభమవుతాయి.
శాశ్వత భవనం పూర్తయ్యే వరకు కళాశాల ఎక్కడ నడుస్తుంది?
ప్రస్తుతం ఉన్న కోటబొమ్మాళి ప్రభుత్వ జూనియర్ కళాశాల భవనాన్ని తాత్కాలికంగా ఉపయోగిస్తారు.
