గుండెకు సంబంధించిన ఆపరేషన్లలో సర్జరీ చేసే సమయం కూడా చాలా ముఖ్యమని ఓ తాజా పరిశోధన వెల్లడించింది. ఉదయం తొందరగా జరిగే సర్జరీలతో (Surgery) పోలిస్తే, ఉదయం ఆలస్యంగా లేదా మధ్యాహ్నం ప్రారంభమయ్యే ఆపరేషన్లలో గుండె సంబంధిత మరణాల ముప్పు ఎక్కువగా ఉంటుందని ఈ అధ్యయనం తెలిపింది. ఈ పరిశోధనను యూకేలోని మాంచెస్టర్ యూనివర్సిటీ శాస్త్రవేత్తలు నిర్వహించారు.
ఈ అధ్యయనంలో ఇంగ్లండ్, వేల్స్, నార్తర్న్ ఐర్లాండ్ ప్రాంతాలకు చెందిన 24 వేల మందికి పైగా గుండె రోగుల డేటాను (patients’ data) పరిశీలించారు. ఉదయం 7 నుంచి 9:59 గంటల మధ్య జరిగే సర్జరీలతో పోలిస్తే, ఆ తర్వాత ప్రారంభమైన ఆపరేషన్లలో గుండె సంబంధిత మరణ ప్రమాదం సుమారు 18 శాతం ఎక్కువగా ఉన్నట్లు గుర్తించారు. అయితే, ఆపరేషన్ తర్వాత వచ్చే సమస్యలు లేదా మళ్లీ ఆసుపత్రిలో చేరాల్సిన పరిస్థితులపై మాత్రం సర్జరీ సమయం పెద్దగా ప్రభావం చూపలేదని తెలిపారు.
మన శరీరంలో ప్రతి అవయవానికి సంబంధించిన 24 గంటల జీవ గడియారం (బాడీ క్లాక్) పనిచేస్తుందని పరిశోధకులు చెప్పారు. ఈ శరీర గడియారం ప్రభావమే సర్జరీ ఫలితాలపై పడుతోందని వారు భావిస్తున్నారు. అధ్యయనానికి నాయకత్వం వహించిన డాక్టర్ గారెత్ కిచెన్ మాట్లాడుతూ, ప్రమాదం గణాంకాల పరంగా ముఖ్యమైనదైనా, ఎక్కువ మంది రోగులకు ముప్పు తక్కువేనని అన్నారు. అయినప్పటికీ, సర్జరీ సమయాలను సరిగ్గా ప్లాన్ చేయడం తక్కువ ఖర్చుతో మెరుగైన ఫలితాలు ఇవ్వగల మార్గం అని ఆయన వివరించారు.
గుండె ఆపరేషన్కు ఏ సమయం మంచిది?
ఈ అధ్యయనం ప్రకారం, ఉదయం 7 నుంచి 9:59 గంటల మధ్య జరిగే గుండె ఆపరేషన్లలో మరణ ప్రమాదం తక్కువగా ఉంది.
మధ్యాహ్నం జరిగే సర్జరీలు ప్రమాదకరమా?
పూర్తిగా ప్రమాదకరమని కాదు. కానీ ఉదయం ఆలస్యంగా జరిగే సర్జరీలతో పోలిస్తే, గుండె సంబంధిత మరణ ముప్పు కొద్దిగా ఎక్కువగా ఉండొచ్చని పరిశోధన చెబుతోంది.
