IRCTC: జపాన్ విహారయాత్రకు ఐఆర్‌సీటీసీ ప్రత్యేక టూర్ ప్యాకేజీ.. 10 రోజుల్లో టోక్యో నుంచి హిరోషిమా వరకు!

జపాన్ వెళ్లాలనుకుంటున్నారా? ఐఆర్‌సీటీసీ సూపర్ టూర్ ప్యాకేజీ..

బుల్లెట్ ట్రైన్ ప్రయాణంతో ఐఆర్‌సీటీసీ జపాన్ టూర్.. ప్యాకేజీలో ఏమేమి ఉన్నాయి?..

విదేశీ పర్యటన చేయాలనుకునే భారతీయ పర్యాటకులకు ఇండియన్ రైల్వే క్యాటరింగ్ అండ్ టూరిజం కార్పొరేషన్ (IRCTC) మరో ఆకర్షణీయమైన టూర్ ప్యాకేజీని ప్రకటించింది. 10 రోజులు, 9 రాత్రుల ఈ ప్రత్యేక జపాన్ టూర్ ద్వారా దేశంలోని ప్రముఖ నగరాలు, చారిత్రక ప్రదేశాలు, ఆధ్యాత్మిక క్షేత్రాలు, ప్రకృతి అందాలను ఒకే ప్రయాణంలో చూసే అవకాశం కల్పిస్తోంది. ఈ టూర్ సెప్టెంబర్ 6న ఢిల్లీ నుంచి ప్రారంభమై సెప్టెంబర్ 15న తిరిగి ముగుస్తుంది.

జపాన్‌లో ఏయే ప్రాంతాలు సందర్శిస్తారు?
ఈ టూర్‌లో పర్యాటకులు జపాన్‌లోని ప్రముఖ నగరాలు టోక్యో, హకోనే, హమమత్సు, క్యోటో, ఒసాకా, నారా, హిరోషిమాలను సందర్శిస్తారు. ఢిల్లీ నుంచి టోక్యోలోని హనెడా విమానాశ్రయానికి విమానంలో చేరుకుని, తిరుగు ప్రయాణం కూడా అక్కడి నుంచే ఉంటుంది.

ఐఆర్‌సీటీసీ ప్రకటించిన ధరలు ఇలా ఉన్నాయి.
ముగ్గురు కలిసి ఒక గదిలో బస (Triple Sharing) – రూ.3,45,999 ప్రతి వ్యక్తికి
ఇద్దరు కలిసి ఒక గదిలో బస (Twin Sharing) – రూ.3,49,999 ప్రతి వ్యక్తికి
ఒంటరిగా గది (Single Occupancy) – రూ.4,73,999
5 నుంచి 11 సంవత్సరాల పిల్లలకు బెడ్‌తో – రూ.2,92,499
అదే వయసు పిల్లలకు బెడ్ లేకుండా – రూ.2,63,999

ప్యాకేజీలో ఏమేమి ఉంటాయి?
ఈ టూర్ ప్యాకేజీలో పర్యాటకులకు అవసరమైన దాదాపు అన్ని ప్రధాన సదుపాయాలను ఐఆర్‌సీటీసీ అందిస్తోంది. రిటర్న్ ఎకానమీ క్లాస్ విమాన టికెట్లు, ఫోర్ స్టార్ (4 స్టార్) హోటళ్లలో బస, జపాన్ టూరిస్ట్ వీసా చార్జీలు, ప్రతిరోజూ అల్పాహారం, మధ్యాహ్న భోజనం, రాత్రి భోజనం, ఎయిర్‌పోర్టు నుంచి రవాణా, ఎయిర్ కండీషన్డ్ కోచ్‌లలో స్థానిక సందర్శన, 70 ఏళ్లలోపు ప్రయాణికులకు ట్రావెల్ ఇన్సూరెన్స్, ఇంగ్లీష్ మాట్లాడే టూర్ గైడ్, వర్తించే అన్ని పన్నులు ఉంటాయి. ఈ టూర్‌లో ప్రయాణికులు ఆల్ నిప్పోన్ ఎయిర్వేస్ (ANA) విమాన సేవలను వినియోగించేలా ప్రణాళిక రూపొందించారు.

సెప్టెంబర్ 6 సాయంత్రం 6 గంటలకు ఢిల్లీ నుంచి NH838 విమానం బయలుదేరుతుంది. సెప్టెంబర్ 7 ఉదయం 5:55 గంటలకు టోక్యో హనెడా విమానాశ్రయానికి చేరుకుంటుంది. తిరుగు ప్రయాణంలో సెప్టెంబర్ 15న NH837 విమానం ఉదయం 11:10 గంటలకు హనెడా నుంచి బయలుదేరి, అదే రోజు సాయంత్రం 4:30 గంటలకు ఢిల్లీ చేరుకుంటుంది.

అయితే విమాన షెడ్యూల్ ఎయిర్‌లైన్ నిర్వహణ అవసరాలను బట్టి మారే అవకాశం ఉందని ఐఆర్‌సీటీసీ తెలిపింది. విమాన సమయాల్లో మార్పులు జరిగితే టూర్ షెడ్యూల్ లేదా సందర్శన కార్యక్రమాల్లో కూడా మార్పులు ఉండవచ్చని స్పష్టం చేసింది.

టూర్‌లో చూడబోయే ప్రముఖ ఆకర్షణలు
ఈ యాత్రలో మొదటి రెండు రోజులు టోక్యోలో గడుపుతారు. అక్కడి నుంచి పర్యాటకులను ప్రముఖ పర్యాటక ప్రదేశాలకు తీసుకెళ్తారు. 

టోక్యోలో
అసకుసా ఆలయం
నకమిసే డోరి వీధి
ఉయెనో పార్క్
ఒడైబా
టీమ్‌ల్యాబ్ ప్లానెట్స్
మౌంట్ ఫుజీ, హకోనే ప్రాంతం
మౌంట్ ఫుజీ ఐదో స్టేషన్ (వాతావరణం అనుకూలిస్తే)
లేకపోతే ఓషినో హక్కాయ్ సందర్శన
ఓవాకుదాని వ్యాలీ
హకోనే రోప్‌వే ప్రయాణం
హకోనే పైరేట్ షిప్‌లో సరస్సు విహారం
నాగోయా
టయోటా మ్యూజియం
SCMAGLEV రైల్వే మ్యూజియం
క్యోటో
అరషియామా బాంబూ ఫారెస్ట్
కింకాకు-జి ఆలయం
ఫుషిమి ఇనారి తైషా ఆలయం
ఒసాకా, నారా
ఒసాకా కోట
నారా డీర్ పార్క్
తొడై-జి ఆలయం
హిరోషిమా
హిరోషిమా పీస్ మెమోరియల్ పార్క్
మియాజిమా ద్వీపం
ఇట్సుకుషిమా శ్రైన్

ఈ టూర్‌లో ప్రత్యేక ఆకర్షణగా ప్రపంచప్రసిద్ధ షింకాన్సెన్ బుల్లెట్ ట్రైన్ ప్రయాణాన్ని కూడా ఏర్పాటు చేశారు. షిన్-ఒసాకా స్టేషన్ నుంచి హిరోషిమా స్టేషన్ వరకు బుల్లెట్ ట్రైన్‌లో ప్రయాణించే అవకాశం పర్యాటకులకు లభిస్తుంది.

బుకింగ్‌కు అవసరమైన పత్రాలు 
ఈ టూర్‌లో పాల్గొనాలనుకునే వారు కొన్ని తప్పనిసరి అర్హతలను పూర్తి చేయాలి. తిరుగు ప్రయాణ తేదీ నుంచి కనీసం ఆరు నెలల గడువు ఉన్న పాస్‌పోర్ట్ ఉండాలి. పాన్ కార్డు సమర్పించాలి, జపాన్ వీసా కోసం అవసరమైన ఆర్థిక, ఉద్యోగ సంబంధిత పత్రాలు సమర్పించాలి.

ఐఆర్‌సీటీసీ సూచనలు
టూర్ ప్రణాళిక ప్రస్తుతం సూచనాత్మక (Indicative) షెడ్యూల్ మాత్రమేనని ఐఆర్‌సీటీసీ పేర్కొంది. నిర్వహణ అవసరాలు, విమాన సంస్థల షెడ్యూల్ మార్పులు లేదా ఇతర అనివార్య కారణాల వల్ల ప్రయాణ వివరాలు, సందర్శన కార్యక్రమాల్లో మార్పులు జరిగే అవకాశం ఉందని తెలిపింది.

జపాన్ సంస్కృతి, చరిత్ర, ఆధునిక సాంకేతికత, ప్రకృతి అందాలను ఒకే పర్యటనలో అనుభవించాలని భావించే వారికి ఈ ఐఆర్‌సీటీసీ ప్రత్యేక టూర్ మంచి అవకాశంగా చెప్పొచ్చు. విమాన ప్రయాణం నుంచి వీసా, వసతి, భోజనం, స్థానిక సందర్శనలు వరకు అన్ని సదుపాయాలు ఒకే ప్యాకేజీలో ఉండటం ఈ టూర్ ప్రత్యేకతగా నిలుస్తోంది.