FLY91: తిరుపతికి FLY91 విమాన సర్వీసులు.. రాజమండ్రి, విజయవాడ, హైదరాబాద్‌తో కొత్త కనెక్టివిటీ!

తిరుపతి ప్రయాణికులకు గుడ్‌న్యూస్.. హైదరాబాద్, విజయవాడ, రాజమండ్రికి విమానాలు..

తిరుపతి–హైదరాబాద్ మధ్య రోజువారీ విమానాలు.. FLY91 కొత్త సర్వీసులు..

తిరుపతి: ప్రాంతీయ విమానయాన సంస్థ FLY91 తన విమాన నెట్‌వర్క్‌ను మరింత విస్తరించింది. తాజాగా తిరుపతిని తమ 13వ గమ్యస్థానంగా చేర్చింది. దీంతో ఆంధ్రప్రదేశ్, తెలంగాణలోని నాలుగు నగరాలను FLY91 విమాన సేవలతో అనుసంధానించనుంది. తిరుపతికి రాకపోకలను హైదరాబాద్, విజయవాడ, రాజమండ్రి నగరాలతో అనుసంధానం చేయనుంది.

తిరుపతికి విమాన సర్వీసుల కోసం బుకింగ్స్ ఇప్పటికే ప్రారంభమయ్యాయి. ప్రయాణికులు FLY91 అధికారిక వెబ్‌సైట్‌తో పాటు సంస్థకు చెందిన ట్రావెల్ ఏజెన్సీ నెట్‌వర్క్ ద్వారా టికెట్లు బుక్ చేసుకోవచ్చని సంస్థ తెలిపింది.

హైదరాబాద్‌కు ప్రతిరోజూ విమానాలు
తిరుపతి–హైదరాబాద్ మధ్య FLY91 ప్రతిరోజూ విమాన సర్వీసులు నడపనుంది. తిరుపతి–విజయవాడ మధ్య విమానాలు వారంలో మంగళవారం, గురువారం, శనివారం, ఆదివారం అందుబాటులో ఉంటాయి.

అదేవిధంగా తిరుపతి–రాజమండ్రి మధ్య సోమవారం, బుధవారం, శుక్రవారం విమాన సర్వీసులు నిర్వహించనున్నారు. దీంతో తిరుపతి నుంచి ఈ మూడు ముఖ్యమైన నగరాలకు ప్రయాణించే వారికి మరిన్ని విమాన ప్రయాణ అవకాశాలు అందుబాటులోకి రానున్నాయి.

నాలుగు నగరాలకు మెరుగైన కనెక్టివిటీ
తిరుపతిని నెట్‌వర్క్‌లో చేర్చడంతో ఆంధ్రప్రదేశ్, తెలంగాణలో FLY91 సేవలందించే నగరాల సంఖ్య నాలుగుకు చేరింది. దక్షిణ భారతదేశంలోని ముఖ్యమైన ప్రాంతాల మధ్య విమాన కనెక్టివిటీ మరింత బలోపేతం అవుతుందని సంస్థ పేర్కొంది.

తిరుపతి దేశంలోని ప్రముఖ పుణ్యక్షేత్రాల్లో ఒకటి. తిరుమలలోని శ్రీ వేంకటేశ్వర స్వామివారి ఆలయాన్ని దర్శించుకునేందుకు ప్రతి నెలా దేశ, విదేశాల నుంచి భారీ సంఖ్యలో భక్తులు తరలివస్తుంటారు. అంతేకాకుండా తిరుపతి విద్య, సాంస్కృతిక, వాణిజ్య రంగాల్లోనూ కీలక కేంద్రంగా ఉంది. ఈ నేపథ్యంలో విమాన కనెక్టివిటీ పెరగడం భక్తులతో పాటు విద్యార్థులు, వ్యాపారులు, ఇతర ప్రయాణికులకు కూడా ఉపయోగకరంగా ఉండనుంది.

‘ఆంధ్రప్రదేశ్‌కు మా నిబద్ధత మరింత బలపడింది’
FLY91 మేనేజింగ్ డైరెక్టర్, సీఈఓ మనోజ్ చాకో మాట్లాడుతూ.. తిరుపతిని నెట్‌వర్క్‌లో చేర్చడం తమ ప్రాంతీయ విస్తరణలో మరో ముఖ్యమైన మైలురాయిగా పేర్కొన్నారు. ఆంధ్రప్రదేశ్‌లో ఇప్పుడు మూడు గమ్యస్థానాలకు సేవలు అందిస్తున్నామని తెలిపారు.

తిరుపతిని మూడు కీలక నగరాలతో అనుసంధానించడం ద్వారా ముఖ్యమైన ఆధ్యాత్మిక, విద్యా, సాంస్కృతిక ప్రాంతాల మధ్య ప్రయాణం మరింత సౌకర్యవంతంగా మారుతుందని చెప్పారు. ‘కనెక్టింగ్ భారత్’ లక్ష్యంతో సురక్షితమైన, విశ్వసనీయమైన విమాన సేవల ద్వారా దేశంలోని అభివృద్ధి చెందుతున్న ప్రాంతీయ మార్కెట్లకు మెరుగైన కనెక్టివిటీ అందించడమే తమ లక్ష్యమని వెల్లడించారు.

దేశవ్యాప్తంగా 13 గమ్యస్థానాలు
తిరుపతిని కలుపుకుని FLY91 ప్రస్తుతం దేశవ్యాప్తంగా 13 గమ్యస్థానాలకు సేవలు అందిస్తోంది. వీటిలో గోవాలోని మనోహర్ ఇంటర్నేషనల్ ఎయిర్‌పోర్ట్ (మోపా), సింధుదుర్గ్, జల్గావ్, సోలాపూర్, పుణే, బెంగళూరు, హైదరాబాద్, లక్షద్వీప్‌లోని అగట్టి, కొచ్చి, హుబ్బళ్లి, రాజమండ్రి, విజయవాడ ఉన్నాయి.

తిరుపతి చేరికతో FLY91 దక్షిణ భారత ప్రాంతీయ విమాన నెట్‌వర్క్ మరింత విస్తరించింది. ముఖ్యంగా ఆంధ్రప్రదేశ్‌లోని ప్రధాన నగరాల మధ్య వేగవంతమైన విమాన ప్రయాణానికి ఇది కొత్త అవకాశాలను అందించనుంది.