Moolapeta: మూలపేట నుంచి భోగాపురం వరకు అభివృద్ధి పరుగులు.. రూ.650 కోట్ల మంచినీటి ప్రాజెక్టు!

స్థానిక యువతకు పరిశ్రమల్లో ఉద్యోగ అవకాశాలు.. మూలపేట–భోగాపురం మధ్య నాలుగు వరుసల రహదారి..

మత్స్యకారుల వేట నిషేధ భృతి రూ.20 వేలకు పెంపు.. మేఘవరంలో విద్యుత్ సబ్‌స్టేషన్..

సంతబొమ్మాళి: శ్రీకాకుళం జిల్లాలో అభివృద్ధి పనులకు వేగం పెంచుతున్నామని రాష్ట్ర వ్యవసాయ, మత్స్యశాఖల మంత్రి కింజరాపు అచ్చెన్నాయుడు తెలిపారు. ప్రజా సంక్షేమం, ప్రాంతీయ అభివృద్ధే లక్ష్యంగా కూటమి ప్రభుత్వం పనిచేస్తోందన్నారు. మూలపేట పోర్టు నుంచి భోగాపురం విమానాశ్రయం వరకు మౌలిక వసతులను బలోపేతం చేయడంతో ఈ ప్రాంత అభివృద్ధికి కొత్త ఊపు వస్తుందని చెప్పారు.

మంత్రి ఆదివారం సంతబొమ్మాళి మండలం మరువాడ పంచాయతీ పరిధిలోని సూరాడవానిపేటలో పర్యటించారు. దివంగత నేత, మాజీ వైస్‌ ఎంపీపీ సూరాడ భీమారావు తొలి వర్ధంతి సందర్భంగా ఆయన చిత్రపటానికి పూలమాల వేసి నివాళులర్పించారు.

మూడు దశాబ్దాల్లో మారిన ప్రాంత ముఖచిత్రం
గతంలో సరైన రహదారులు, రవాణా సౌకర్యాలు లేక ఈ ప్రాంత ప్రజలు ఎన్నో ఇబ్బందులు ఎదుర్కొన్నారని అచ్చెన్నాయుడు గుర్తు చేశారు. 1982 నుంచి దివంగత నేత కింజరాపు ఎర్రన్నాయుడు నాయకత్వంలో, ప్రజల సహకారంతో ఈ ప్రాంతాన్ని అభివృద్ధి బాటలో నడిపించామని చెప్పారు.

నాటి పరిస్థితులను, ప్రస్తుతం జరుగుతున్న అభివృద్ధిని యువత గమనించాలని సూచించారు. ప్రాంత అభివృద్ధి ప్రయాణానికి యువత కూడా అండగా నిలవాలని పిలుపునిచ్చారు.

రూ.650 కోట్లతో మంచినీటి ప్రాజెక్టు
నియోజకవర్గంలో తాగునీటి సమస్యకు శాశ్వత పరిష్కారం చూపేందుకు రూ.650 కోట్లతో మంచినీటి ప్రాజెక్టు చేపడుతున్నట్లు మంత్రి వెల్లడించారు. వంశధార జలాలను ప్రతి ఇంటికీ కుళాయి ద్వారా అందించడమే లక్ష్యమన్నారు. అర్హులైన ప్రతి ఒక్కరికీ కొత్త పింఛన్లు మంజూరు చేస్తున్నామని, గ్రామీణ ప్రాంతాల్లో సిమెంట్ రహదారుల నిర్మాణానికి కూడా ప్రాధాన్యం ఇస్తున్నామని తెలిపారు.

పరిశ్రమలతో స్థానిక యువతకు ఉపాధి
మూలపేట పోర్టు, పరిసర ప్రాంతాల్లో పరిశ్రమలు ఏర్పాటవుతుండటంతో స్థానికంగా పెద్ద ఎత్తున ఉద్యోగ, ఉపాధి అవకాశాలు వస్తాయని అచ్చెన్నాయుడు చెప్పారు. కోరమండల్ సంస్థ పరిశ్రమ ఏర్పాటు శ్రీకాకుళం జిల్లా పారిశ్రామిక ప్రగతిలో చారిత్రాత్మక ముందడుగుగా అభివర్ణించారు. 

సుమారు రూ.2,250 కోట్ల పెట్టుబడులతో రానున్న ఈ ప్రాజెక్టుతో యువతకు ఉద్యోగ అవకాశాలు పెరుగుతాయని తెలిపారు. స్థానిక యువతకు ముందుగానే ఉచిత శిక్షణ అందించి, పరిశ్రమల్లో ఉద్యోగాల విషయంలో వారికి తొలి ప్రాధాన్యం కల్పించేలా చర్యలు తీసుకుంటామని మంత్రి చెప్పారు.

మూలపేట–భోగాపురం నాలుగు వరుసల రహదారి 
మూలపేట పోర్టు నుంచి భోగాపురం విమానాశ్రయం వరకు సముద్ర తీరాన్ని ఆనుకుని నాలుగు వరుసల జాతీయ రహదారి నిర్మాణానికి చర్యలు తీసుకుంటున్నామని అచ్చెన్నాయుడు వెల్లడించారు.

ఈ రహదారి పూర్తయితే రవాణా సౌకర్యాలు మరింత మెరుగవుతాయని, వాణిజ్య, పారిశ్రామిక కార్యకలాపాలు వేగం పుంజుకుంటాయని చెప్పారు. పోర్టు, పరిశ్రమలు, విమానాశ్రయాన్ని అనుసంధానించే ఈ మార్గం భవిష్యత్‌లో ప్రాంతీయ ఆర్థిక అభివృద్ధికి కీలకంగా మారుతుందని తెలిపారు.

మత్స్యకారులకు మరింత ఆర్థిక భరోసా 
మత్స్యకారుల సంక్షేమానికి ప్రభుత్వం ప్రత్యేక ప్రాధాన్యం ఇస్తోందని మంత్రి తెలిపారు. గత వైకాపా ప్రభుత్వంలో వేట నిషేధ కాలంలో మత్స్యకారులకు రూ.10 వేల భృతి ఇచ్చేవారని, కూటమి ప్రభుత్వం దాన్ని రూ.20 వేలకు పెంచిందని చెప్పారు.

దీంతో లక్షలాది మత్స్యకార కుటుంబాలకు ఆర్థిక భరోసా లభిస్తోందన్నారు. సామాజిక భద్రత పింఛన్‌ను కూడా రూ.3 వేల నుంచి రూ.4 వేలకు పెంచామని తెలిపారు. డీజిల్ సబ్సిడీ, పింఛన్ పెంపు వంటి చర్యలతో మత్స్యకారుల ఆర్థిక భద్రతను బలోపేతం చేస్తున్నామని చెప్పారు.

గత ప్రభుత్వ హయాంలో మత్స్యకారులకు అవసరమైన వలలు, బోట్లు వంటి సదుపాయాల పంపిణీ జరగలేదని అచ్చెన్నాయుడు విమర్శించారు. మత్స్యకారుల జీవనోపాధిని బలోపేతం చేయడం తమ ప్రభుత్వ బాధ్యత అని స్పష్టం చేశారు.

మేఘవరంలో కొత్త విద్యుత్ సబ్‌స్టేషన్ 
మత్స్యకార గ్రామాల్లో విద్యుత్ సరఫరా సమస్యలు, లో-వోల్టేజీ ఇబ్బందులకు పరిష్కారం చూపేందుకు మేఘవరంలో కొత్త విద్యుత్ సబ్‌స్టేషన్ మంజూరు చేసినట్లు మంత్రి తెలిపారు. ప్రతి గ్రామంలో రహదారులు, తాగునీరు, విద్యుత్‌తో పాటు ఇతర మౌలిక వసతులను మెరుగుపరిచేందుకు ప్రభుత్వం చర్యలు తీసుకుంటోందన్నారు.

పెట్టుబడులు, పరిశ్రమలు, రహదారులు, తాగునీరు, విద్యుత్, మత్స్యకారుల సంక్షేమం వంటి అన్ని రంగాల్లో సమగ్ర అభివృద్ధి సాధించడమే ప్రభుత్వ లక్ష్యమని అచ్చెన్నాయుడు తెలిపారు. ప్రజా సంక్షేమం కోసం ఇచ్చిన ప్రతి హామీని అమలు చేస్తూ నియోజకవర్గాన్ని అన్ని రంగాల్లో ముందుకు తీసుకెళ్లేందుకు కృషి చేస్తామని స్పష్టం చేశారు.