IPL: ఫస్ట్ బాల్‌కే సిక్స్.. 'సిక్సర్ల' సెంచరీతో వైభవ్ సూర్యవంశీ ప్రపంచ రికార్డు! 40 లోపు బంతుల్లో..

• Sports: 514 బంతుల్లో సిక్సర్ల సెంచరీ సాధించిన వైభవ్ సూర్యవంశీ..
   
• ఐపీఎల్‌లో అత్యంత వేగవంతమైన సెంచరీ సాధించిన ఆటగాడిగా వైభవ్..

IPL: భారత క్రికెట్ సంచలనం వైభవ్ సూర్యవంశీ మైదానంలో పరుగుల వరద పారిస్తూ సరికొత్త రికార్డులను తిరగరాస్తున్నాడు. ఇప్పటికే ఐపీఎల్ చరిత్రలో అత్యంత వేగవంతమైన సెంచరీ సాధించిన ఆటగాడిగా గుర్తింపు పొందిన అతను, తాజాగా తన ఖాతాలో మరిన్ని అరుదైన ఘనతలను వేసుకున్నాడు. 40 బంతుల లోపే రెండు ఐపీఎల్ సెంచరీలు సాధించిన ఏకైక బ్యాటర్‌గా సూర్యవంశీ నిలిచాడు. ఇందులో 2025 సీజన్‌లో గుజరాత్ టైటాన్స్‌పై 35 బంతుల్లోనే సెంచరీ మార్కును అందుకోగా, ప్రస్తుత 2026 సీజన్‌లో సన్‌రైజర్స్ హైదరాబాద్‌పై కేవలం 36 బంతుల్లోనే మరో శతకాన్ని నమోదు చేసి తన సత్తా చాటాడు. శనివారం జరిగిన మ్యాచ్‌లో టీ20 ఫార్మాట్‌లో అత్యంత వేగంగా 100 సిక్సర్లు బాదిన ఆటగాడిగా ప్రపంచ రికార్డును బద్దలు కొట్టి క్రికెట్ ప్రపంచాన్ని ఆశ్చర్యపరిచాడు. టీమ్ ఇండియా స్టార్ పేసర్ మహమ్మద్ సిరాజ్ బౌలింగ్‌లో ఎదుర్కొన్న తొలి బంతికే కళ్లు చెదిరే సిక్సర్ కొట్టి ఈ చారిత్రక మైలురాయిని చేరుకున్నాడు.

కేవలం 15 ఏళ్ల వయసులోనే సూర్యవంశీ ఈ స్థాయి ప్రదర్శన చేయడం విశేషం. కేవలం 514 బంతుల్లోనే సిక్సర్ల 'సెంచరీ' పూర్తి చేసిన అతను, ఈ ఘనత సాధించిన అత్యంత పిన్న వయస్కుడైన ఆటగాడిగా రికార్డు సృష్టించాడు. నిన్న గుజరాత్‌తో జరిగిన ఉత్కంఠభరిత పోరులో సూర్యవంశీ మరోసారి మెరుపు ఇన్నింగ్స్ ఆడాడు. కేవలం 16 బంతుల్లోనే 3 ఫోర్లు, 3 సిక్సర్ల సహాయంతో 36 పరుగులు చేసి జట్టుకు మంచి ఆరంభాన్ని ఇచ్చాడు. ఈ ఇన్నింగ్స్‌లో విశేషమేమిటంటే, అతను కొట్టిన మూడు సిక్సర్లు కూడా పవర్‌ప్లేలోనే రావడం గమనార్హం. దీనితో ఒక ఐపీఎల్ సీజన్‌లో పవర్‌ప్లే ఓవర్లలో అత్యధిక సిక్సర్లు బాదిన ఆటగాడిగా కూడా సూర్యవంశీ సరికొత్త రికార్డును తన పేరిట లిఖించుకున్నాడు. అతని అసాధారణ బ్యాటింగ్ తీరు చూస్తుంటే భవిష్యత్తులో మరిన్ని రికార్డులు కనుమరుగు కావడం ఖాయంగా కనిపిస్తోంది.

ఒక ఐపీఎల్ సీజన్‌లో పవర్‌ప్లేలో (1-6 ఓవర్లు) అత్యధిక సిక్సర్లు
30 - వైభవ్ సూర్యవంశీ (2026)
29 - అభిషేక్ శర్మ (2024)
27 - అభిషేక్ శర్మ (2026)
22 - సనత్ జయసూర్య (2008)
22 - ట్రావిస్ హెడ్ (2024)
22 - యశస్వి జైస్వాల్ (2025)

వైభవ్ సూర్యవంశీ 30 సిక్సులతో అగ్రస్థానంలో ఉన్నాడు. ఆ తర్వాత స్థానాల్లో అభిషేక్ శర్మ, సనత్ జయసూర్య, ట్రావిష్ హెడ్, యశస్వీ జైశ్వాల్ ఉన్నారు.