Virat Kohli: కోహ్లీ రాకపై ఆర్సీబీ స్పెషల్ వీడియో వైరల్.. జెర్సీ నంబర్ 18.. తేదీ మార్చి 18..!
Virat Kohli: ఐపీఎల్ 19వ సీజన్ కోసం టీమిండియా స్టార్ బ్యాటర్ విరాట్ కోహ్లీ బెంగళూరు చేరుకున్నాడు. డిఫెండింగ్ ఛాంపియన్ రాయల్ ఛాలెంజర్స్ బెంగళూరు (ఆర్సీబీ) జట్టుతో కలిసి ప్రాక్టీస్ చేసేందుకు నగరానికి విచ్చేశాడు.
- టైటిల్ డిఫెండింగ్కు కోహ్లీ సిద్ధం: బెంగళూరులో ప్రాక్టీస్ సెషన్లకు హాజరుకానున్న విరాట్..
- గత సీజన్ హీరో మళ్లీ వచ్చేశాడు: 657 పరుగుల రికార్డును కోహ్లీ ఈసారి చెరిపివేస్తాడా?
Bangalore Virat Kohli: టీమిండియా స్టార్ బ్యాటర్ విరాట్ కోహ్లీ ఐపీఎల్ 19వ సీజన్ కోసం బెంగళూరు చేరుకోవడంతో నగరంలో సందడి మొదలైంది. డిఫెండింగ్ ఛాంపియన్ రాయల్ ఛాలెంజర్స్ బెంగళూరు (ఆర్సీబీ) జట్టుతో కలిసి ప్రాక్టీస్ సెషన్లలో పాల్గొనేందుకు ఆయన విమానాశ్రయం నుంచి నేరుగా జట్టు బస చేస్తున్న హోటల్కు చేరుకున్నారు. ఈ నెల 28వ తేదీ నుంచి ప్రారంభం కానున్న మెగా టోర్నీలో గత ఏడాది సాధించిన టైటిల్ను నిలబెట్టుకోవడమే లక్ష్యంగా ఆర్సీబీ బరిలోకి దిగుతోంది. కోహ్లీ రాకను పురస్కరించుకుని ఆర్సీబీ యాజమాన్యం తమ సోషల్ మీడియా వేదికగా ఒక పవర్ ఫుల్ వీడియోను విడుదల చేసింది. విమానాశ్రయం నుంచి కారులో వస్తున్న కోహ్లీ విజువల్స్కు ప్రసిద్ధ 'కేజీఎఫ్' సినిమా థీమ్ మ్యూజిక్ను జోడించి అభిమానుల్లో జోష్ నింపారు. ముఖ్యంగా ఆ వీడియోలో ట్రాఫిక్ సిగ్నల్పై కోహ్లీ జెర్సీ నంబర్ 18 కనిపించడం విశేషం. "అతను వస్తున్నాడని తెలుసుకోవడానికి మీరు అతన్ని చూడాల్సిన అవసరం లేదు, క్యాలెండర్ చూడండి.. సంకేతాలు కనిపిస్తాయి" అంటూ ఆర్సీబీ ఇచ్చిన క్యాప్షన్ నెట్టింట వైరల్ అవుతోంది.
కోహ్లీ రాకతో ఆర్సీబీ అభిమానులు సోషల్ మీడియాలో పండుగ వాతావరణాన్ని సృష్టించారు. సరిగ్గా మార్చి 18వ తేదీన, తన జెర్సీ నంబర్ 18 ఉన్న 'కింగ్' తన సామ్రాజ్యంలోకి అడుగుపెట్టాడని అభిమానులు కామెంట్ల వర్షం కురిపిస్తున్నారు. గత సీజన్లో ఆర్సీబీ మొట్టమొదటిసారి ఐపీఎల్ టైటిల్ గెలవడంలో కోహ్లీ పోషించిన పాత్ర అద్వితీయం. మొత్తం 8 అర్ధశతకాలతో 657 పరుగులు సాధించి జట్టును ముందుండి నడిపించారు. ఐపీఎల్ చరిత్రలోనే అత్యధికంగా 8,661 పరుగులు చేసిన ఏకైక ఆటగాడిగా కోహ్లీ తన రికార్డును మరింత సుస్థిరం చేసుకున్నారు. ఈసారి కూడా అదే జోరును కొనసాగించి జట్టుకు రెండో టైటిల్ అందిస్తారని ఫ్యాన్స్ గట్టిగా నమ్ముతున్నారు.
కర్ణాటక ప్రభుత్వ ప్రత్యేక అనుమతితో ఆర్సీబీ తమ తొలి మ్యాచ్లను సొంతగడ్డ అయిన చిన్నస్వామి స్టేడియంలోనే ఆడనుంది. షెడ్యూల్ ప్రకారం, ఈ నెల 28న జరగనున్న సీజన్ ఆరంభ మ్యాచ్లో సన్రైజర్స్ హైదరాబాద్తో ఆర్సీబీ తలపడనుంది. ఆ తర్వాత ఏప్రిల్ 5వ తేదీన చిరకాల ప్రత్యర్థి చెన్నై సూపర్ కింగ్స్తో జరిగే హై-వోల్టేజ్ మ్యాచ్ కోసం ఇప్పటికే టికెట్లు హాట్ కేకుల్లా అమ్ముడవుతున్నాయి. కోహ్లీ ప్రాక్టీస్ మొదలుపెట్టడంతో చిన్నస్వామి స్టేడియం పరిసరాల్లో భద్రతను కట్టుదిట్టం చేశారు. తన హోమ్ గ్రౌండ్లో కోహ్లీ మళ్లీ పరుగుల సునామీ సృష్టించాలని కోట్లాది మంది క్రికెట్ ప్రేమికులు ఎదురుచూస్తున్నారు.
<blockquote class="twitter-tweet"><p lang="en" dir="ltr">You don’t have to see him… to know he’s coming! Check the calendar. There will be signs… <a href="https://twitter.com/hashtag/PlayBold?src=hash&ref_src=twsrc%5Etfw">#PlayBold</a> <a href="https://twitter.com/hashtag/%E0%B2%A8%E0%B2%AE%E0%B3%8D%E0%B2%AERCB?src=hash&ref_src=twsrc%5Etfw">#ನಮ್ಮRCB</a> <a href="https://twitter.com/hashtag/IPL2026?src=hash&ref_src=twsrc%5Etfw">#IPL2026</a> <a href="https://t.co/qv8tA5ZCrA">pic.twitter.com/qv8tA5ZCrA</a></p>— Royal Challengers Bengaluru (@RCBTweets) <a href="https://twitter.com/RCBTweets/status/2034110257010798827?ref_src=twsrc%5Etfw">March 18, 2026</a></blockquote> <script async src="https://platform.twitter.com/widgets.js" charset="utf-8"></script>
Be the first to react
