Custodial Torture: రఘురామ కేసులో కీలక మలుపు..! విచారణకు ఐపీఎస్ సునీల్ నాయక్!

ఐపీఎస్ అధికారి సునీల్ నాయక్ విచారణ ప్రారంభం…

కస్టోడియల్ టార్చర్ కేసులో వేగవంతమైన దర్యాప్తు…

సునీల్ నాయక్‌ను నిలదీస్తున్న సీసీఎస్ పోలీసులు…

Custodial Torture: ఆంధ్రప్రదేశ్ రాజకీయాల్లో సంచలనం సృష్టించిన రఘురామ కృష్ణరాజు కస్టోడియల్ టార్చర్ కేసులో దర్యాప్తు వేగవంతమైంది. ఈ కేసులో ఏ7 (A7) నిందితుడిగా ఉన్న ఐపీఎస్ అధికారి సునీల్ నాయక్ గురువారం హైదరాబాద్‌లోని సీసీఎస్ (CCS) పోలీస్ స్టేషన్‌లో విచారణకు హాజరయ్యారు. గత ప్రభుత్వ హయాంలో రఘురామను కస్టడీలో ఉంచి హింసించారనే ఆరోపణలపై ప్రస్తుతం పోలీసులు లోతైన విచారణ జరుపుతున్నారు. హైకోర్టు ముందస్తు ఆదేశాల మేరకు ఆయన దర్యాప్తు అధికారుల ముందు విచారణకు రావాల్సి వచ్చింది.

ఈ విచారణ ప్రక్రియ అంతా దర్యాప్తు అధికారి దామోదర్ పర్యవేక్షణలో కొనసాగుతోంది. ఉదయం నుంచి ప్రారంభమైన ఈ విచారణ, కోర్టు ఆదేశాల ప్రకారం సాయంత్రం 5 గంటల వరకు కొనసాగనుంది. రఘురామ కృష్ణరాజును అరెస్ట్ చేసిన సమయంలో ఏం జరిగింది? కస్టడీలో ఉన్నప్పుడు నిబంధనలు ఉల్లంఘించారా? అనే కోణంలో అధికారులు సునీల్ నాయక్‌ను ప్రశ్నిస్తున్నారు. ఇప్పటికే ఈ కేసులో ఇతర అధికారుల పాత్రపై కూడా పోలీసులు ఆరా తీస్తున్నారు.

రఘురామ కృష్ణరాజు గతంలో తనను పోలీసులు కస్టడీలో చిత్రహింసలకు గురిచేశారని, తన ప్రాణాలకు ముప్పు తలపెట్టారని ఫిర్యాదు చేసిన విషయం తెలిసిందే. ఆ సమయంలో కీలక బాధ్యతల్లో ఉన్న పోలీస్ అధికారులను నిందితులుగా పేర్కొంటూ కేసు నమోదైంది. సునీల్ నాయక్ ఆ సమయంలో ఉన్నత స్థానంలో ఉండి, ఈ వ్యవహారంలో పాలుపంచుకున్నారనేది ప్రధాన ఆరోపణ. అందుకే ఈ కేసులో ఆయన పాత్రను నిర్ధారించడానికి పోలీసులు పలు ఆధారాలను సేకరిస్తున్నారు.

హైకోర్టు ఈ కేసులో సునీల్ నాయక్‌కు కొన్ని షరతులతో కూడిన వెసులుబాటు కల్పించింది. దర్యాప్తునకు పూర్తిగా సహకరించాలని, అధికారులు కోరినప్పుడు విచారణకు హాజరుకావాలని స్పష్టం చేసింది. ఒకవేళ విచారణలో పొంతన లేని సమాధానాలు చెబితే లేదా ఆధారాలను తారుమారు చేసే ప్రయత్నం చేస్తే కోర్టు ఆదేశాల ప్రకారం తదుపరి చర్యలు తీసుకునే అవకాశం ఉంది. దీంతో ఈ రోజు జరుగుతున్న విచారణ అత్యంత కీలకంగా మారింది.