గోదావరి పుష్కరాలకు రాజమహేంద్రవరం సిద్ధం.. మౌలిక వసతులపై ప్రత్యేక దృష్టి!

గోదావరి పుష్కరాల ఏర్పాట్లపై మంత్రి నారాయణ సమీక్ష.. పనులు త్వరగా ప్రారంభించాలని ఆదేశం..

రూ.300 కోట్ల HAM పనుల పురోగతిపై మంత్రి నారాయణ సమీక్ష..

రాజమహేంద్రవరం: గోదావరి పుష్కరాల ఏర్పాట్లు, నగరంలో చేపట్టాల్సిన అభివృద్ధి పనులపై మున్సిపల్ శాఖ మంత్రి నారాయణ సమీక్ష నిర్వహించారు. రాజమహేంద్రవరం మున్సిపల్ కార్పొరేషన్ కార్యాలయంలో జరిగిన ఈ సమావేశానికి ఎమ్మెల్యేలు గోరంట్ల బుచ్చయ్య చౌదరి, బత్తుల బలరామకృష్ణ, మున్సిపల్ కమిషనర్ రాహుల్ మీనా, సంబంధిత అధికారులు హాజరయ్యారు.

సమీక్షలో ప్రధానంగా గోదావరి పుష్కరాల ఏర్పాట్లు, పుష్కరాలకు సంబంధించి చేపట్టాల్సిన పనుల ప్రారంభంపై చర్చించారు. పుష్కరాల సమయంలో పెద్ద సంఖ్యలో భక్తులు, ప్రజలు రాజమహేంద్రవరానికి వచ్చే అవకాశం ఉన్న నేపథ్యంలో నగరంలో మౌలిక వసతులను మెరుగుపరచడం, ప్రజలకు అవసరమైన సౌకర్యాలను కల్పించడం వంటి అంశాలపై మంత్రి అధికారులతో చర్చించారు.

ఇప్పటివరకు సుమారు రూ.100 కోట్ల అంచనా వ్యయంతో 96 అభివృద్ధి పనులకు ప్రతిపాదనలు సిద్ధం చేసినట్లు అధికారులు మంత్రికి వివరించారు. నగర అవసరాలను దృష్టిలో ఉంచుకుని ప్రతిపాదించిన ఈ పనులను ప్రజాప్రతినిధులతో సమన్వయం చేసుకుంటూ ముందుకు తీసుకెళ్లాలని మంత్రి సూచించారు.

అదే సమయంలో HAM పథకం కింద సుమారు రూ.300 కోట్లతో చేపట్టిన వివిధ పనుల పురోగతిపైనా మంత్రి నారాయణ సమీక్షించారు. ఆయా పనులు ఏ దశలో ఉన్నాయో అధికారులను అడిగి తెలుసుకున్న ఆయన, పనుల అమలులో జాప్యం లేకుండా చర్యలు తీసుకోవాలని సూచించారు.

నగరంలో ప్రజల రోజువారీ అవసరాలను నేరుగా ప్రభావితం చేసే రోడ్లు, డ్రెయిన్లు, డివైడర్లు, లైటింగ్, గ్రీనరీ వంటి మౌలిక వసతుల పనులకు ప్రాధాన్యత ఇవ్వాలని మంత్రి స్పష్టం చేశారు. ముఖ్యంగా పుష్కరాల నేపథ్యంలో ప్రజలు, భక్తులకు ఇబ్బందులు కలగకుండా అవసరమైన పనులను త్వరితగతిన ప్రారంభించాలని ఆదేశించారు.

ప్రజాప్రతినిధులతో చర్చించి స్థానికంగా అత్యవసరంగా అవసరమైన పనులను గుర్తించాలని, వాటిని వెంటనే ప్రారంభించేలా చర్యలు తీసుకోవాలని అధికారులకు మంత్రి నారాయణ సూచించారు. నగర అభివృద్ధి పనులు కేవలం ప్రతిపాదనలకే పరిమితం కాకుండా క్షేత్రస్థాయిలో వేగంగా అమలయ్యేలా అధికారులు సమన్వయంతో పనిచేయాలని ఆయన స్పష్టం చేశారు.

గోదావరి పుష్కరాలు వంటి భారీ ఆధ్యాత్మిక కార్యక్రమాలకు రాజమహేంద్రవరం కీలక కేంద్రంగా ఉండటంతో, నగర మౌలిక వసతులను ముందుగానే బలోపేతం చేయడం అవసరమని సమీక్షలో ప్రాధాన్యం ఇచ్చారు. రోడ్ల అభివృద్ధి నుంచి పారిశుధ్యం, డ్రెయినేజీ, లైటింగ్, పచ్చదనం వరకు అన్ని అంశాలను సమగ్రంగా పరిగణనలోకి తీసుకుని పనులను వేగవంతం చేయాలని మంత్రి అధికారులకు దిశానిర్దేశం చేశారు.