రేపటి నుంచి అన్ని స్కూళ్లకు 3 రోజులు సెలవులు!

• అక్టోబర్ 27 నుంచి 29 వరకు ప్రభుత్వ, ప్రైవేటు పాఠశాలలు మూసివేత: కలెక్టర్ విజయ కృష్ణన్!

• ఏ చిన్న పొరపాటు జరిగినా ప్రాణనష్టం తప్పదు.. అధికారులకు కలెక్టర్ తీవ్ర హెచ్చరిక!

• తీర, లోతట్టు ప్రాంతాల ప్రజలను పునరావాస కేంద్రాలకు తరలించాలని అత్యవసర ఆదేశాలు!

Andhrapradesh: బంగాళాఖాతంలో దూసుకొస్తున్న ‘అర్నాబ్’ తీవ్ర తుపాను ఉత్తర కోస్తాంధ్రపై విరుచుకుపడే ప్రమాదం ఉన్న నేపథ్యంలో అనకాపల్లి జిల్లా కలెక్టర్ విజయ కృష్ణన్ ఆదివారం మధ్యాహ్నం జిల్లా స్థాయి అధికారులతో వెబ్‌ఎక్స్ ద్వారా అత్యవసర సమీక్షా సమావేశం నిర్వహించారు. రాబోయే మూడు రోజుల పాటు ఉరుములు, మెరుపులతో కూడిన భారీ నుంచి అతి భారీ వర్షాలు, పెనుగాలులు వీచే అవకాశం ఉందని వాతావరణ శాఖ హెచ్చరించిన నేపథ్యంలో ఏ చిన్న పొరపాటు జరిగినా ప్రాణనష్టం జరిగే ప్రమాదముందని, అధికార యంత్రాంగం నిరంతరం అప్రమత్తంగా ఉండి శ్రమించాలని స్పష్టం చేశారు.

స్కూళ్లకు 3 రోజులు సెలవులు – విద్యార్థుల భద్రతపై ప్రత్యేక చర్యలు

తుపాను తీవ్రతను, విద్యార్థుల ప్రాణభద్రతను దృష్టిలో ఉంచుకుని అనకాపల్లి జిల్లాలోని అన్ని ప్రభుత్వ, ప్రైవేటు పాఠశాలలకు అక్టోబర్ 27 నుంచి 29వ తేదీ వరకు వరుసగా మూడు రోజుల పాటు సెలవులు ప్రకటిస్తూ కలెక్టర్ ఉత్తర్వులు జారీ చేశారు. ఇదే తరహాలో పొరుగున ఉన్న విశాఖపట్నం జిల్లాలోనూ పాఠశాలలకు మూడు రోజుల పాటు సెలవులు ప్రకటించారు. వసతి గృహాల్లో ఉండి చదువుకునే విద్యార్థులపై ప్రత్యేక శ్రద్ధ పెట్టాలని, వారికి పరిశుభ్రమైన వేడి ఆహారం, కాచి చల్లార్చిన తాగునీరు అందించాలని హాస్టల్ వార్డెన్లు, విద్యాశాఖ అధికారులను ఆదేశించారు. బలహీనమైన హాస్టల్ భవనాలను గుర్తించి ముందస్తు రక్షణ చర్యలు తీసుకోవాలన్నారు.

పునరావాస శిబిరాలు – గర్భిణులు, రోగులకు ప్రత్యేక రక్షణ

తీర ప్రాంతాలు, లోతట్టు ప్రాంతాల్లో నివసించే ప్రజల భద్రతకు అత్యధిక ప్రాధాన్యత ఇవ్వాలని ఆదేశించారు. అత్యవసర ముప్పు పొంచి ఉన్న ప్రాంతాలను గుర్తించి, అక్కడి ప్రజలను వెంటనే సురక్షిత పునరావాస కేంద్రాలకు తరలించాలని స్పష్టం చేశారు. శిబిరాల్లో నాణ్యమైన భోజనం, సురక్షిత తాగునీరు, పారిశుద్ధ్యం ఉండేలా చూడాలన్నారు. ముఖ్యంగా కిడ్నీ వ్యాధిగ్రస్తులు, ఇతర దీర్ఘకాలిక సమస్యలు ఉన్న రోగులకు అవసరమైన ఔషధాలను సిద్ధంగా ఉంచాలన్నారు. నెలలు నిండిన గర్భిణులను గుర్తించి, కాన్పులకు ఎలాంటి ఇబ్బంది కలగకుండా సమీప కమ్యూనిటీ హెల్త్ సెంటర్లకు (సీహెచ్‌సీ) ముందే తరలించాలని వైద్యారోగ్య శాఖను ఆదేశించారు.

24 గంటల కంట్రోల్ రూమ్‌లు – అధికారులకు సెలవులు రద్దు

విపత్తు సమయంలో కమ్యూనికేషన్, విద్యుత్ సరఫరాకు ఎటువంటి అంతరాయం కలగకుండా టెలికాం సంస్థలతో సమన్వయం చేసుకోవాలని సూచించారు. విద్యుత్ అంతరాయం ఏర్పడితే తక్షణ అవసరాల కోసం జనరేటర్లు సిద్ధంగా ఉంచుకోవాలని ఆదేశించారు. కలెక్టరేట్‌తో పాటు ఆర్డీవో, మండల కార్యాలయాల్లో 24 గంటలు పనిచేసే కంట్రోల్ రూమ్‌లను అందుబాటులోకి తెచ్చారు. విపత్తు సద్దుమణిగే వరకు తహసీల్దార్లు, ఎంపీడీవోలు, ఇతర శాఖల అధికారులు తమ తమ ప్రధాన కార్యాలయాల్లోనే విధుల్లో ఉండాలని, ఎట్టి పరిస్థితుల్లోనూ అధికారులకు సెలవులు మంజూరు చేయబోమని కలెక్టర్ స్పష్టం చేశారు.

రెస్క్యూ బృందాల మోహరింపు – ప్రజలకు కీలక హెచ్చరికలు

ఏదైనా అత్యవసర పరిస్థితిని ఎదుర్కొనేందుకు అగ్నిమాపక దళాలు, ఎన్‌డీఆర్‌ఎఫ్ (NDRF), ఎస్‌డీఆర్‌ఎఫ్ (SDRF) బృందాలను సర్వసన్నద్ధంగా ఉంచారు. సముద్రం తీవ్రంగా అల్లకల్లోలంగా మారినందున మత్స్యకారులు ఎవరూ చేపల వేటకు వెళ్లకుండా కఠిన చర్యలు తీసుకోవాలని మత్స్యశాఖ అధికారులను ఆదేశించారు. తుపాను విలయం సమయంలో ప్రజలు కూడా స్వీయ నియంత్రణ పాటించాలని, ఈదురుగాలులు వీచే వేళ ఇళ్లలోనే ఉండాలని, విద్యుత్ స్తంభాలు, భారీ చెట్లు, హోర్డింగుల కింద నిలబడవద్దని హెచ్చరించారు. తెగిపడిన విద్యుత్ తీగలను తాకరాదని, పొంగిపొర్లే వాగులు, వంకలు దాటే ప్రయత్నాలు చేయరాదని యంత్రాంగం విజ్ఞప్తి చేసింది.