Land Regestration: ఏపీ ప్రభుత్వం కీలక నిర్ణయం... ఇక ఆఫీసుల చుట్టూ తిరిగే పనిలేదు!

• రైతులకు బిగ్ రిలీఫ్: భాగ పరిష్కార రిజిస్ట్రేషన్తో నేరుగా వారసుల పేరు మీదికి అసైన్డ్ భూములు!

• సచివాలయాల్లో దరఖాస్తుల విధానం బంద్: డైరెక్ట్గా రిజిస్ట్రార్ ఆఫీస్లోనే భూముల బదిలీ!

• రూ. 10 లక్షల లోపు ఆస్తి ఉంటే రూ. 100 చాలు: ఏపీలో భూ వివాదాలకు చెక్!

Land Regestration: ఆంధ్రప్రదేశ్ ప్రభుత్వం రాష్ట్రంలోని రైతులు మరియు అసైన్డ్ భూముల యజమానులకు ఊరటనిచ్చేలా కీలక నిర్ణయం తీసుకుంది. ఎన్నో ఏళ్లుగా పెండింగ్లో ఉన్న భూ సమస్యలను పరిష్కరించే దిశగా అడుగులు వేస్తూ, అసైన్డ్ భూములను వారసులు తమ పేరు మీదికి సులభంగా మార్చుకునేందుకు కొత్త విధానాన్ని అమల్లోకి తీసుకొచ్చింది. ఈ నూతన ప్రక్రియ ద్వారా లబ్ధిదారులు నామమాత్రపు రుసుము చెల్లించి సబ్రిజిస్ట్రార్ కార్యాలయంలోనే తమ ఆస్తులను వారసుల పేరిట మార్చుకోవచ్చు.

ఇన్నాళ్లూ అసైన్డ్ భూములకు సంబంధించి వారసత్వ మార్పిడి కోసం గ్రామీణ ప్రాంత ప్రజలు, రైతులు తహసీల్దార్ ఆఫీసుల చుట్టూ, గ్రామ సచివాలయాల చుట్టూ తిరగాల్సి వచ్చేది. అయితే ఇకపై అలాంటి ఇబ్బందులు లేకుండా ప్రక్రియను సరళతరం చేశారు. గ్రామ సచివాలయాల్లో వారసత్వ మ్యుటేషన్ సేవల కింద దరఖాస్తు చేసుకునే పాత విధానానికి స్వస్తి చెప్పిన ప్రభుత్వం, నేరుగా సబ్రిజిస్ట్రార్ కార్యాలయంలో 'భాగ పరిష్కార డాక్యుమెంట్' (Registration of Partition Deed) ద్వారా రిజిస్ట్రేషన్ చేసుకునే వెసులుబాటు కల్పించింది.

ఈ నూతన విధానంలో రిజిస్ట్రేషన్ ఛార్జీలను ప్రభుత్వం నామమాత్రంగా నిర్ణయించింది. ఆస్తి విలువ ₹10 లక్షల లోపు ఉంటే కేవలం ₹100 స్టాంపు డ్యూటీ చెల్లిస్తే సరిపోతుంది. ఒకవేళ ఆస్తి విలువ ₹10 లక్షల కంటే ఎక్కువగా ఉంటే ₹1,000 రుసుము చెల్లించాల్సి ఉంటుంది. సాధారణ వారసత్వ భూముల రిజిస్ట్రేషన్లకు వర్తించే నిబంధనలనే ఈ అసైన్డ్ భూములకు కూడా వర్తింపజేస్తూ ఏపీ ప్రభుత్వం ఉత్తర్వులు జారీ చేసింది.

అసైన్డ్ భూములను వారసుల పేరిట మార్చుకోవాలనుకునే వారు చనిపోయిన అసలు యజమాని డెత్ సర్టిఫికెట్ మరియు ఫ్యామిలీ మెంబర్ సర్టిఫికెట్ను తప్పనిసరిగా సమర్పించాల్సి ఉంటుంది. ఈ పత్రాలతో భాగ పరిష్కార డాక్యుమెంట్లు రాసుకుని రిజిస్ట్రేషన్ ఆఫీస్లో ఇస్తే పని పూర్తవుతుంది. ముఖ్యంగా, రిజిస్ట్రేషన్ ప్రక్రియ పూర్తయిన వెంటనే తహసీల్దార్ కార్యాలయంలో సంబంధిత వ్యక్తుల పేర్లతో ఆటోమేటిక్గా మ్యుటేషన్ ప్రక్రియ కూడా పూర్తవుతుంది.

అయితే ఈ కొత్త విధానంలో కొన్ని కీలక నిబంధనలను కూడా స్పష్టం చేశారు. ఈ విధానం వీలునామా రాయకుండా మరణించిన యజమానుల ఆస్తులకు మాత్రమే వర్తిస్తుంది. అలాగే, వారసుల పేరిట మారినప్పటికీ ఈ అసైన్డ్ భూములను ఇతరులకు వెంటనే విక్రయించడానికి వీల్లేదు. ప్రభుత్వ నిబంధనల ప్రకారం 20 ఏళ్ల కాలపరిమితి పూర్తయిన తర్వాత మాత్రమే ఈ భూములను అమ్ముకోవడానికి అనుమతి ఉంటుందని అధికారులు తెలిపారు.